అంత‌కంత‌కు వేడి పెంచుతున్న 'థ‌గ్ లైఫ్‌'

క‌మ‌ల్ హాస‌న్- మ‌ణిర‌త్నం అరుదైన క‌ల‌యిక‌లో రూపొందుతున్న 'థ‌గ్ లైఫ్' మోస్ట్ అవైటెడ్ సినిమాల జాబితాలో ఉంది. ఈ సినిమా కోసం మ‌ణిర‌త్నం చేయని ప్ర‌య‌త్నం లేదు. టైటిల్ ఎంపిక నుంచి స్టార్ల ఎంపిక వ‌ర‌కూ ప్ర‌తి దాంట్లో ప‌ర్ఫెక్ష‌న్ కోసం మ‌ణి స‌ర్ ప్ర‌య‌త్నిస్తున్నారు. అయితే తొలి నుంచి ఈ చిత్రానికి కొన్ని క‌లిసి రావ‌డం లేదు. ఈ మూవీలో తొలుత అనుకున్న స్టార్లు కొంద‌రు ఆక‌స్మికంగా మూవీ నుంచి వైదొల‌గ‌డంతో ఆ పాత్ర‌ల్లోకి వేరొక‌రిని ఎంపిక చేసుకోవాల్సిన ప‌రిస్థితి వ‌చ్చింది.

తాజా స‌మాచారం మేర‌కు..ప్రముఖ హిందీ నటుడు అలీ ఫజల్ పాన్-ఇండియా యాక్షన్ డ్రామా థగ్ లైఫ్‌లో కీలక పాత్ర పోషిస్తున్నట్లు క‌థ‌నాలొస్తున్నాయి. మిర్జాపూర్, ఫ్యూరియస్ 7 లాంటి సిరీస్ ల‌తో అత‌డు నిరూపించాడు. ఇప్పుడు థ‌గ్ లైఫ్ లో త‌న పార్ట్ చిత్రీక‌ర‌ణ‌ను పూర్తి చేయ‌నున్నాడ‌ని తెలిసింది.

జాతీయ వార్తా పోర్టల్‌తో తాజా ఇంటర్వ్యూలో అలీ ఫజల్ మాట్లాడుతూ- భారతీయ సినీప‌రిశ్ర‌మ‌లోని ఇద్దరు లెజెండ్స్ తో కలిసి పనిచేయడంపై తన ఉత్సాహాన్ని వ్యక్తం చేశారు. ``థగ్ లైఫ్ కోసం మణి సర్ విజన్‌లో భాగమైనందుకు నేను థ్రిల్డ్‌గా ఉన్నాను. ఈ కాన్వాస్‌కు నేను ఏదో ఒక ప్రాముఖ్యతను తీసుకువస్తానని మాత్రమే ఆశిస్తున్నాను. కమల్ సర్‌తో కలిసి పని చేయడం.. మూవీ గురించి ఆయ‌న‌తో నోట్స్ పంచుకోవడం కూడా గౌరవంగా ఉంది. నాకు ఈ పాత్రను అప్పగించినందుకు మణి సర్‌కి కృతజ్ఞతలు తెలుపుతున్నాను. మంచి పాత్ర‌ను తెరపైకి తీసుకురావడానికి నేను ఆత్రుతగా ఉన్నాను`` అని అలీ ఫజల్ అన్నారు.

36 సంవత్సరాల క్రితం విడుదలైన మ‌ణిర‌త్నం- క‌మ‌ల్ హాస‌న్ ల‌ ఐకానిక్ గ్యాంగ్‌స్టర్ డ్రామా `నాయగన్` తర్వాత మ‌ళ్లీ ఇప్ప‌టికి థ‌గ్ లైఫ్ తో అదే జోడీ రిపీట‌వుతోంది. థగ్ లైఫ్‌లో త్రిష, శింబు, సన్యా మల్హోత్రా త‌దిత‌రులు కీలక పాత్రలు పోషిస్తున్నారు. ఈ చిత్రానికి ఏఆర్ రెహమాన్ సంగీతం అందించనున్నారు. థగ్ లైఫ్ ఈ ఏడాది డిసెంబర్‌లో థియేట‌ర్ల‌లో విడుదల కానుంది.