విజయ్ పొలిటికల్ ఎంట్రీపై రాజశేఖర్ కామెంట్.. కూతుళ్ల పెళ్లిపై కూడా ప్రస్తావిస్తూ!

టాలీవుడ్ యాంగ్రీ మ్యాన్ రాజశేఖర్ మళ్ళీ ఫామ్‌లోకి వచ్చారు. ఇటీవల 'బైకర్' సినిమాతో సూపర్ హిట్ కొట్టిన ఆయన, తాజాగా తన వ్యక్తిగత విషయాలపై మనసు విప్పారు. ముఖ్యంగా తన ఇద్దరు కుమార్తెలు శివాని, శివాత్మికల పెళ్లి వార్తలపై వస్తున్న రూమర్లకు చెక్ పెట్టడమే కాకుండా, తమిళ స్టార్ హీరో విజయ్ రాజకీయ రంగ ప్రవేశంపై కూడా ఆసక్తికర వ్యాఖ్యలు చేశారు.

రాజశేఖర్ కుమార్తెలు, టాలీవుడ్ యంగ్ హీరోయిన్స్ శివాని, శివాత్మిక ఇప్పటికే హీరోయిన్లుగా మంచి గుర్తింపు తెచ్చుకున్నారు. వీరి పెళ్లి ఎప్పుడన్నది టాలీవుడ్‌లో చర్చనీయాంశంగా మారింది. దీనిపై రాజశేఖర్ స్పందిస్తూ.."మా అమ్మాయిలకు పెళ్లి సంబంధాలు వస్తున్న మాట నిజమే..అన్వేషణ కూడా జరుగుతోంది.కానీ, వారు మాత్రం ఇప్పుడు పెళ్లి కంటే కెరీర్‌కే ప్రాధాన్యత ఇస్తున్నారు. సినిమాల్లో ఇంకా మంచి పాత్రలు చేయాలని వారు కోరుకుంటున్నారు. అందుకే వారి నిర్ణయానికి తండ్రిగా నేను పూర్తి మద్దతు ఇస్తున్నా" అంటూ స్పష్టం చేశారు.

రాజకీయాలపై ఆసక్తికర వ్యాఖ్యలు:

సినిమాలతో పాటు రాజకీయాల గురించి కూడా రాజశేఖర్ తన అభిప్రాయాలను పంచుకున్నారు. గతంలో తాము రాజకీయాల్లో ఉన్నప్పుడు తమ సొంత డబ్బుతోనే సేవ చేశామని గుర్తు చేసుకున్నారు. ప్రస్తుతం తన భార్య జీవితకు పాలిటిక్స్ మీద పెద్దగా ఇంట్రెస్ట్ లేదని చెప్పారు. ఇదే సమయంలో తమిళ నటుడు విజయ్ రాజకీయాల్లోకి రావడంపై స్పందిస్తూ.. విజయ్‌కి తమిళనాడు ఎన్నికల్లో గెలిచే అవకాశాలు చాలా ఎక్కువగా ఉన్నాయని, ఆయన రాజకీయ ప్రయాణం విజయవంతం కావాలని కోరుకుంటున్నట్లు తెలిపారు.

బైకర్’ మూవీతో అదిరిపోయే రీ-ఎంట్రీ:

రాజశేఖర్ చాలా కాలం తర్వాత ‘బైకర్’ సినిమాతో వెండితెరపై మెరిశారు. శర్వానంద్ హీరోగా నటించిన ఈ చిత్రంలో రాజశేఖర్ తండ్రి పాత్రలో జీవించేశారని చెప్పాలి. అభిలాష్ రెడ్డి దర్శకత్వంలో వచ్చిన ఈ ‘మోటో క్రాస్ డ్రామా’ ప్రేక్షకులను విపరీతంగా ఆకట్టుకుంటోంది. ముఖ్యంగా శర్వానంద్-రాజశేఖర్ మధ్య వచ్చే ఎమోషనల్ సీన్లు థియేటర్లలో ప్రేక్షకులను కంటతడి పెట్టిస్తున్నాయి. ఈ సినిమా సక్సెస్‌తో రాజశేఖర్ సెకండ్ ఇన్నింగ్స్ గ్రాండ్‌గా మొదలైందని సినీ విశ్లేషకులు అభిప్రాయపడుతున్నారు.

టాలెంటెడ్ డాటర్స్ శివాని, శివాత్మిక:

రాజశేఖర్ కుమార్తెలు కేవలం స్టార్ కిడ్స్ అనిపించుకోకుండా తమకంటూ ఒక ప్రత్యేక శైలిని ఏర్పరచుకున్నారు. పెద్ద కుమార్తె శివాని అద్భుతం, కోట బొమ్మాళి పీఎస్ చిత్రాలతో ఆకట్టుకోగా.. చిన్న కుమార్తె శివాత్మిక దొరసాని, రంగమార్తాండ వంటి సినిమాలతో తనలోని నటిని నిరూపించుకుంది. ఇక ప్రస్తుతం వీరిద్దరూ నటనతో పాటు నిర్మాణ రంగంలో కూడా రాణిస్తూ బిజీగా ఉన్నారు. అందుకే తండ్రి రాజశేఖర్ కూడా వారిని తొందరపెట్టకుండా కెరీర్‌లో మరింత ఎత్తుకు ఎదగాలని ఆశిస్తున్నారు. ఏదేమైనా రాజశేఖర్ ఫ్యామిలీ ఇప్పుడు బైకర్ మూవీ ద్వారా మళ్ళీ వార్తల్లో నిలిచింది!