చరిత్ర తిరగరాసిన గిల్.. 117 బంతుల్లోనే డబుల్ సెంచరీ.. వన్డేల్లో ప్రపంచ రికార్డు

ఏం కొట్టుడు సామీ ఇదీ.. ఇంత పిచ్చకొట్టుడు మా జిందగీల చూడలే’ అని స్టేడియంకు వచ్చిన ప్రేక్షకులు.. టీవీలు చూస్తున్న ప్రేక్షకులు ఊర్రూతలూగిపోయారు.. ఏమన్నా మ్యాచ్ నా ఇదీ..‘అస్సాంలో మ్యాచ్ జరిగింది కాబట్టి.. బంతి కొడితే అస్సామే అన్నట్టుగా సాగింది. విండీస్ వీరులు మూడు సెంచరీలతో విధ్వంసం సృష్టిస్తే.. మనోళ్లు తక్కువ తిన్నారా..? విండీసోళ్లకు ఈ అర్ధరాత్రి నిజంగానే చుక్కలు చూపించారు. బంతి పడడమే ఆలస్యం.. చుక్కల్లా ఎగిరి ప్రేక్షకుల్లో పడిపోవడం.. రోహిత్ దంచికొడితే.. మన కెప్టెన్ గిల్ తన జీవితంలోనే బీభత్సమైన ఆటతో పెను విధ్వంసమే సృష్టించారు. క్రికెట్ హిస్టరీ బుక్స్ చెదరగొట్టే విధ్వంసం.. విండీస్ బౌలర్లను మైదానంలో నిలబెట్టి నరికేసిన పరుగుల వేట.. ఇదీ శుభ్‌మన్ గిల్ సృష్టించిన సునామీ.. కేవలం 117 బంతుల్లోనే డబుల్ సెంచరీ తోసిపారేసి ప్రపంచ క్రికెట్ రికార్డులను తుత్తునియలు చేస్తూ ‘ప్రిన్స్’ కాదు.. నేనే ఈ రాజ్యాంగానికి ‘రాజు’ అని గర్జించాడు..

టీమిండియా కెప్టెన్.. యంగ్ సెన్సేషన్ శుభ్‌మన్ గిల్ వెస్టిండీస్‌‌పై ఆడిన విధ్వంసకర ఇన్నింగ్స్‌తో ప్రపంచ క్రికెట్ దృష్టిని తనవైపు తిప్పుకున్నాడు. ప్రత్యర్థి బౌలర్లకు ఏమాత్రం అవకాశమివ్వకుండా మైదానంలో పరుగుల వర్షం కురిపించిన గిల్, వన్డే క్రికెట్ చరిత్రలోనే అత్యంత వేగవంతమైన ద్విశతకం నమోదు చేసి సరికొత్త రికార్డు నెలకొల్పాడు. గతంలో ఇషాన్ కిషన్ పేరిట ఉన్న 126 బంతుల రికార్డును అధిగమిస్తూ కేవలం 117 బంతుల్లోనే 200 పరుగుల మార్క్‌ను చేరుకుని ఆధునిక క్రికెట్‌లో తన ఆధిపత్యాన్ని చాటుకున్నాడు.

ఇన్నింగ్స్ ఆరంభం నుంచే మైదానంలో పక్కా ప్రణాళికతో కనిపించిన గిల్, విండీస్ బౌలర్ల లైన్ అండ్ లెంగ్త్‌ను పూర్తిగా దెబ్బతీశాడు. క్లాస్ షాట్లతో పాటు పవర్ హిట్టింగ్‌ను రంగరించి మైదానమంతా బౌండరీల వర్షం కురిపించాడు. కేవలం 117 బంతుల్లోనే ద్విశతకం పూర్తి చేసిన అతడు.. ఆ తర్వాత కూడా ఏమాత్రం అలసట లేకుండా ధాటిగా ఆడాడు. తన ఇన్నింగ్స్‌లో 24 ఫోర్లు, 7 భారీ సిక్సర్లు బాది చివరకు 133 బంతుల్లో 223 పరుగులతో నాటౌట్‌గా నిలిచాడు. ఈ విస్ఫోటక ఇన్నింగ్స్ భారత జట్టుకు భారీ స్కోరును అందించడమే కాకుండా ప్రత్యర్థి జట్టుకు కోలుకోలేని దెబ్బతీసింది.

ఈ ఘనతతో వన్డే కెరీర్‌లో గిల్ తన రెండో ద్విశతకాన్ని ఖాతాలో వేసుకున్నాడు. గతంలో న్యూజిలాండ్‌పై 208 పరుగులు చేసిన గిల్.. తాజా ఇన్నింగ్స్‌తో ప్రపంచంలోనే ఒకటికంటే ఎక్కువ డబుల్ సెంచరీ సాధించిన దిగ్గజ బ్యాటర్ల సరసన నిలిచాడు. నాయకత్వ బాధ్యతలను భుజాన వేసుకుని.. ఒత్తిడిని సైతం జయించి కెప్టెన్సీ ఇన్నింగ్స్‌తో జట్టును ముందుండి నడిపించిన తీరు అతడి మానసిక దృఢత్వానికి అద్దం పడుతోంది.

ఈ చారిత్రాత్మక ద్విశతకంతో వన్డేల్లో అత్యధిక వ్యక్తిగత స్కోరు సాధించిన బ్యాటర్ల జాబితాలో గిల్ మూడో స్థానానికి ఎగబాకాడు. రోహిత్ శర్మ సాధించిన 264 పరుగులు, న్యూజిలాండర్ మార్టిన్ గప్టిల్ 237 పరుగుల తర్వాతి స్థానంలో 223 పరుగులతో నిలిచి.. వీరేంద్ర సెహ్వాగ్, క్రిస్ గేల్, సచిన్ టెండూల్కర్ వంటి దిగ్గజాల సరసన కొత్త అధ్యాయాన్ని లిఖించాడు.

సాధారణంగా స్థిరత్వానికి, సరైన షాట్ల ఎంపికకు పేరుగాంచిన శుభ్‌మన్ గిల్.. ఈ ఇన్నింగ్స్‌తో ఒక మ్యాచ్ రూపురేఖలను ఏ స్థాయిలో మార్చేయవచ్చో నిరూపించాడు. ఒత్తిడిలోనూ నిగ్రహం కోల్పోకుండా ఆత్మవిశ్వాసంతో ఆడితే అసాధ్యమైన రికార్డులైనా సుసాధ్యమవుతాయని ఈ ప్రదర్శన చాటిచెప్పింది. ప్రపంచ వేదికపై భారత క్రికెట్ పతాకాన్ని మరోసారి అగ్రస్థానంలో నిలిపిన ఈ చారిత్రాత్మక ఇన్నింగ్స్.. క్రమశిక్షణ.. పట్టుదలతో శ్రమిస్తే సాధించలేనిది ఏదీ లేదని చాటుతూ రాబోయే తరాల క్రీడాకారులకు గొప్ప స్ఫూర్తిగా నిలుస్తుంది.

వన్డేల్లో అత్యధిక వ్యక్తిగత స్కోర్లు

1. రోహిత్ శర్మ – 264

2. మార్టిన్ గప్టిల్ – 237*

3. శుభ్‌మన్ గిల్ – 223*

4. వీరేంద్ర సెహ్వాగ్ – 219

5. క్రిస్ గేల్ – 215

6. ఫఖర్ జమాన్ – 210*

7. పథుమ్ నిస్సాంక – 210*

8. ఇషాన్ కిషన్ – 210

9. రోహిత్ శర్మ – 209

10. రోహిత్ శర్మ – 208*

11. శుభ్‌మన్ గిల్ – 208

12. గ్లెన్ మ్యాక్స్‌వెల్ – 201*

13. సచిన్ టెండూల్కర్ – 200*

14. సయీద్ అన్వర్ – 194

15. చార్లెస్ కోవెంట్రీ – 194*

16. ఫఖర్ జమాన్ – 193

17. జార్జ్ మున్సీ – 191

18. మార్టిన్ గప్టిల్ – 189*

19. సనత్ జయసూర్య – 189

20. వివ్ రిచర్డ్స్ – 189*