ప్రపంచ క్రికెట్ ను షేక్ చేసే హెచ్చరిక ఇదీ

నమీబియాలోని విండ్‌హోక్‌ వేదికగా జరిగిన ఏకైక టీ20 మ్యాచ్‌లో నమీబియా క్రికెట్‌ జట్టు చారిత్రక విజయాన్ని నమోదు చేసింది. డొనోవాన్ ఫెరెర్రా సారథ్యంలోని స్టార్ ఆటగాళ్లు క్వింటన్ డి కాక్ వంటి వారు ఉన్న పటిష్టమైన దక్షిణాఫ్రికా జట్టును, పసికూనగా భావించే నమీబియా 4 వికెట్ల తేడాతో ఓడించింది. చివరి బంతి వరకు ఉత్కంఠగా సాగిన ఈ మ్యాచ్‌లో నమీబియా సాధించిన విజయం, ప్రపంచ క్రికెట్‌లోని పెద్ద జట్లకు గట్టి హెచ్చరిక పంపింది.

* మ్యాచ్ వివరాలు: ఉత్కంఠభరిత విజయం

దక్షిణాఫ్రికా కెప్టెన్ డొనోవాన్ ఫెరీరా టాస్ గెలిచి ముందుగా బ్యాటింగ్ ఎంచుకున్నా, ఆ నిర్ణయం బెడిసికొట్టింది. నమీబియా బౌలర్ల ధాటికి ప్రొటీస్ జట్టు నిర్ణీత 20 ఓవర్లలో 8 వికెట్లు కోల్పోయి కేవలం 134 పరుగులు మాత్రమే చేయగలిగింది. వారి జట్టులో జేసన్ స్మిత్ (31) తప్ప మరెవరూ 30 పరుగుల మార్కును చేరుకోలేకపోయారు.

*దక్షిణాఫ్రికా స్కోరు: 134/8 (20 ఓవర్లలో)

నమీబియా బౌలింగ్‌లో కీలక పాత్ర పోషించారు ట్రంపెల్‌మ్యాన్ (3 వికెట్లు), మాక్స్ హీంగో (2 వికెట్లు)తో రాణించారు. 135 పరుగుల స్వల్ప లక్ష్యాన్ని ఛేదించడంలో నమీబియా కూడా మొదట్లో తడబడింది (51/3 మరియు 84/5), కానీ జట్టు స్ఫూర్తి.. క్రమశిక్షణతో ఆడిన ఆటగాళ్లు పట్టు వదల్లేదు. ఆఖరి బంతి వరకు సాగిన పోరాటంలో నమీబియా 6 వికెట్లు కోల్పోయి 138 పరుగులు చేసి చిరస్మరణీయ విజయాన్ని సొంతం చేసుకుంది.

* పెద్ద జట్లకు హెచ్చరిక ఎందుకు?

నమీబియా విజయం కేవలం ఒక అప్‌సెట్ మాత్రమే కాదు.. ఇది అంతర్జాతీయ క్రికెట్‌లోని ప్రస్తుత ధోరణిని సూచిస్తుంది. పెద్ద దేశాల క్రికెట్ బోర్డులకు ఒక హెచ్చరికగా మారింది.

ప్రపంచ క్రికెట్‌లో అంతరం తగ్గడం హెచ్చరిక

ఒకప్పుడు 'పసికూన'గా భావించే జట్లు ఇప్పుడు అఫ్గానిస్థాన్, నెదర్లాండ్స్ మాదిరిగా పెద్ద జట్లను ఓడించడం సర్వసాధారణంగా మారింది. 2023 వన్డే ప్రపంచకప్‌లో అఫ్గాన్ (ఇంగ్లాండ్, పాకిస్థాన్‌లపై), నెదర్లాండ్స్ (దక్షిణాఫ్రికాపై) సాధించిన విజయాలు ఈ ధోరణికి నిదర్శనం. నమీబియా విజయం కూడా ఈ సమతుల్యత పెరుగుదలకు మరో ఉదాహరణ.

ఫ్రాంచైజీ లీగ్‌ల వైపు మొగ్గు చూపుతున్న ప్రధాన జట్టు ఆటగాళ్లు జాతీయ బాధ్యత, నిబద్ధత , జట్టు స్ఫూర్తిని కోల్పోతున్నారనే విమర్శలు ఉన్నాయి. నమీబియా ఆటగాళ్లు తమ పరిమిత వనరులతోనూ చూపిన క్రమశిక్షణ, దక్షిణాఫ్రికా ఆటగాళ్లలో లోపించిన క్రీడా స్ఫూర్తికి పూర్తి విరుద్ధంగా నిలిచింది.

ఫ్రాంచైజీ క్రికెట్ డబ్బు, ప్రజాదరణ తెచ్చినప్పటికీ, దేశానికి ఆడే గౌరవాన్ని భర్తీ చేయలేదు. డబ్బు కోసం జాతీయ కర్తవ్యాలను విస్మరించడం క్రీడా ఆత్మను దెబ్బతీస్తుందని ఈ ఫలితం స్పష్టం చేసింది.

ఐసీసీ పూర్తి సభ్యత్వం లేని జట్టు విజయం

ఐసీసీలో పూర్తి సభ్యత్వం ఉన్న జట్టుపై నమీబియాకు ఇది మొదటి విజయం. అసోసియేట్ జట్టు చేతిలో దక్షిణాఫ్రికా ఓడిపోవడం చరిత్రలో ఇది రెండోసారి 2022 టీ20 ప్రపంచకప్‌లో నెదర్లాండ్స్ చేతిలో తొలిసారి ఓడింది..

ఈ విజయం క్రికెట్ ప్రపంచంలో ఇకపై ఏ జట్టునూ తేలిగ్గా తీసుకోకూడదనే సందేశాన్ని ఇస్తోంది. అంకితభావం, క్రమశిక్షణ, మరియు జట్టు స్ఫూర్తితో కృషి చేస్తే ఏ దేశమైనా దిగ్గజాలను మట్టికరిపించగలదని నమీబియా నిరూపించింది.