కలకలం: ఒంగోలులో చిక్కిన నకిలీ సర్టిఫికెట్ల ముఠా

ప్రకాశం జిల్లాలో భారీ నకిలీ సర్టిఫికెట్ల ముఠా పట్టుబడింది. నకిలీ సర్టిఫికెట్లు తయారు చేసి విద్యార్థులకు అమ్ముతున్న ముఠాను ప్రకాశం జిల్లా పోలీసులు అరెస్ట్ చేశారు. ఒక మహిళతో సహా ఏడుగురు నిందితులను పోలీసులు అరెస్ట్ చేశారు.

ఏకంగా ఏపీలోని 11 జిల్లాల్లో బ్రాంచ్ లు ఏర్పాటు చేసుకొని దేశవ్యాప్తంగా 9 రాష్ట్రాల్లో నకిలీ సర్టిఫికెట్లు అమ్ముతున్నట్టు పోలీసులు గుర్తించారు. 5 లక్షల 47వేల రూపాయల బ్యాంక్ అకౌంట్ ను సీజ్ చేశారు. నకిలీ సర్టిఫికెట్లు తయారు చేస్తున్న కంప్యూటర్, సామగ్రి స్వాధీనం చేసుకున్నారు.

ప్రకాశం జిల్లా ఎస్పీ సిద్ధార్థ్ కౌశల్ ఈ కేసు వివరాలను వెల్లడించాడు. విశాఖపట్నం జిల్లా శిలారపు బాల శ్రీనివాసరావు వైజాగ్ లోని జవహర్ లాల్ నెహ్రూ టెక్నికల్ సెంటర్ (జేఎన్.టీ.యూ) పేరుతో ఓ స్వచ్ఛంద సంస్థను రిజిస్టర్ చేశాడు. తన భార్య సుజాతను దీనికి వైఎస్ చైర్మన్ చేశాడు. ప్రకాశం జిల్లా యద్దనపూడికి చెందిన జంపని వెంకటేశ్వర్లు అనే వ్యక్తితో కలిసి దందా ప్రారంభించాడని పోలీసులు తెలిపారు.

ఈ ముఠా రాష్ట్రంలోని  వివిధ ప్రాంతాలకు చెందిన మరో నలుగురు వ్యక్తులతో కలిసి ఆన్ లైన్ లో కోర్సులున్నాయని.. దరఖాస్తు చేసుకుంటే క్లాసులు నిర్వహించి పరీక్షల అనంతరం సర్టిఫికెట్లు ఇస్తామని దేశవ్యాప్తంగా ఆన్ లైన్ లో ప్రచారం నిర్వహించి భారీగా సొమ్ములు వసూలు చేసి డూప్లికేట్ సర్టిఫికెట్లు ఇస్తున్నారు.

వీరి చేతిలో మోసపోయిన ఓ బ్రాంచ్ నిర్వాహకుడు ఇచ్చిన సమాచారంతో పోలీసులు ఈ అంతరాష్ట్ర నకిలీ సర్టిఫికెట్ల ముఠా గుట్టును రట్టు చేశారు.