గచ్చిబౌలి హోటల్లో అమెరికా వ్యాపారవేత్త మృతి
| హైదరాబాద్ గచ్చిబౌలిలోని ఓ స్టార్ హోటల్లో అమెరికాకు చెందిన వ్యాపారవేత్త మిచెల్ బ్రియాన్ లీ (41) అనుమానాస్పద స్థితిలో మృతి చెందారు. కాలిఫోర్నియాకు చెందిన ఆయన నవంబర్ 2న వ్యాపార భాగస్వామితో కలిసి హైదరాబాద్కు వచ్చారు. నవంబర్ 5న హోటల్ గదిలో కదలకుండా పడి ఉండటాన్ని గుర్తించిన సిబ్బంది వైద్యులకు సమాచారం ఇచ్చారు. అప్పటికే ఆయన మరణించినట్లు వైద్యులు నిర్ధారించారు. పోలీసులు కేసు నమోదు చేసి దర్యాప్తు చేస్తున్నారు. పోస్టుమార్టం నివేదికతో మరణానికి కారణం తెలియనుంది.
హైదరాబాద్లోని గచ్చిబౌలిలో ఓ అమెరికన్ వ్యాపారవేత్త హోటల్ గదిలో మృతి చెందాడు. 41 ఏళ్ల మిచెల్ బ్రియాన్ లీ మరణం గురువారం సాయంత్రం వెలుగులోకి వచ్చింది.
కాలిఫోర్నియాకు చెందిన బ్రియాన్ లీ నవంబర్ 2న తన వ్యాపార భాగస్వామి డేవిడ్తో కలిసి హైదరాబాద్కు వచ్చారు. వ్యాపార పనుల కోసం వచ్చిన వీరిద్దరూ గచ్చిబౌలిలోని ఓ స్టార్ హోటల్లో ఉంటున్నారు.
నవంబర్ 4వ తేదీ సాయంత్రం నుంచి బ్రియాన్ లీ ఫోన్ కాల్స్కు స్పందించలేదు. దీంతో హోటల్ సిబ్బందికి అనుమానం వచ్చింది. నవంబర్ 5న సాయంత్రం 6:30 గంటల సమయంలో 12వ అంతస్తులోని ఆయన గదిని మాస్టర్ కీతో తెరిచారు. అప్పటికే బ్రియాన్ మంచంపై కదలకుండా పడి ఉన్నారు. వెంటనే అంబులెన్స్కు సమాచారం ఇచ్చారు.
హోటల్కు చేరుకున్న వైద్య సిబ్బంది ఆయన అప్పటికే మరణించినట్లు తెలిపారు. విషయం తెలుసుకున్న గచ్చిబౌలి పోలీసులు అక్కడికి చేరుకుని వివరాలు సేకరించారు. మృతదేహాన్ని పోస్టుమార్టం కోసం తరలించి కేసు నమోదు చేశారు.
అయితే బ్రియాన్ లీ ఎలా మరణించారనే విషయం ఇంకా తెలియాల్సి ఉంది. పోస్టుమార్టం నివేదిక వచ్చిన తర్వాత మరణానికి గల కారణంపై స్పష్టత వచ్చే అవకాశం ఉంది. ప్రస్తుతం పోలీసులు హోటల్లో జరిగిన పరిణామాలపై దర్యాప్తు చేస్తున్నారు.