'ఇంటర్వెల్' అనుకుంటే 'క్లైమాక్స్' మిస్సయింది.. పశ్చిమాసియాలో మళ్లీ యుద్ధం 'సీజన్-2' షురూ!

పశ్చిమాసియా యుద్ధం ముగిసే దశకు చేరిందని.. ఇక థియేటర్లలో లైట్లు పడిపోతాయని ప్రపంచం థంబ్స్ అప్ సింబల్ చూపించి ఊపిరి పీల్చుకుంది. కానీ అక్కడున్నది డైరెక్టర్ కాదు కదా.. ట్విస్టుల మీద ట్విస్టులు ఇవ్వడానికి.. "ఇంకా కొన్ని రోజుల్లో శాంతి ఒప్పందం కుదురుతుంది. అందరూ ఇళ్లకు వెళ్లొచ్చు" అంటూ అమెరికా అధ్యక్షుడు డొనాల్డ్ ట్రంప్ మైక్ పట్టుకుని ప్రకటించినప్పుడు.. పెట్రోల్ బంకుల ఓనర్ల నుంచి స్టాక్ మార్కెట్ బ్రోకర్ల వరకు అందరూ హ్యాపీగా రిలాక్స్ అయ్యారు. కానీ ఇప్పుడు చూస్తుంటే ఆ ప్రకటన సినిమా ఇంటర్వెల్‌కు ముందు వచ్చే "హ్యాపీ ఎండింగ్" ట్రైలర్‌లా మారిపోయింది. ఇంటర్వెల్ తర్వాత అసలు సినిమా మొదలైనట్టు, కథ మళ్లీ మొదటికి వచ్చింది.

'ఆత్మరక్షణ' అనే అస్త్రం.. హోర్ముజ్ జలసంధి క్లోజ్!

మూడు నెలల పాటు నాన్‌స్టాప్‌గా సాగిన ఘర్షణల తర్వాత.. కాల్పుల విరమణ అమల్లోకి వచ్చిందని అందరూ సంబరపడ్డారు. అయితే "నువ్వు నన్ను కొట్టావు.. లేదు నువ్వే నన్ను ముందెళ్లావు" అంటూ ఇరు దేశాలు మళ్లీ "ఆత్మరక్షణ" అనే పాత డైలాగ్‌తో రంగంలోకి దిగాయి. అమెరికా వరుసగా వైమానిక దాడులు చేయడంతో ఇరాన్‌కు ఎక్కడో కాలింది. అంతే.. ప్రపంచ చమురు రవాణాకు గుండెకాయ లాంటి హోర్ముజ్ జలసంధిని పూర్తిగా మూసివేస్తున్నట్లు బోర్డు తిప్పేసింది.ఆర్థిక నిపుణుల మైండ్ బ్లాక్ అయిపోయింది. "చమురు ధరలు తగ్గుతాయి.. ఈ నెల జీతం మిగులుతుంది" అని ఆశించిన సామాన్యుడికి "బాబూ.. ఇంకోసారి మీ జేబులు ఖాళీ చేయడానికి సిద్ధం చేసుకోండి" అన్నట్టుగా అంతర్జాతీయ మార్కెట్ హింట్ ఇస్తోంది.

అయితే ఇక్కడే ఒక కామెడీ నడుస్తోంది. అమెరికా ఏమో "అదేం లేదు.. వాణిజ్య నౌకలు ఎప్పటిలాగే హ్యాపీగా తిరుగుతున్నాయి" అని బిల్డప్ ఇస్తుంటే ఇరాన్ రివల్యూషనరీ గార్డ్స్ మాత్రం "మేము అప్పుడే రెండు నౌకలను టార్గెట్ చేశాం, వికెట్లు పడ్డాయి" అని స్కోరు బోర్డు తిప్పుతున్నారు. ఎవరి మాట నమ్మాలో తెలియక ప్రపంచ దేశాలు తలలు పట్టుకుంటున్నాయి.

లెబనాన్ టు ఇజ్రాయెల్: నెరవేరని 'శాంతి' కబుర్లు

ఇక కథ ఇక్కడితో ఆగితే అది వెస్ట్ ఆసియా ఎందుకు అవుతుంది? మరోవైపు ఇజ్రాయెల్-హెజ్బొల్లా మధ్య ఘర్షణలు పార్ట్-2 రేంజ్‌లో ఊపందుకున్నాయి. లెబనాన్ దక్షిణ ప్రాంతాల్లో ఇజ్రాయెల్ వైమానిక దాడుల పరంపర కొనసాగిస్తూనే ఉంది. పలువురు పౌరులు ప్రాణాలు కోల్పోతున్నా.. యుద్ధ పిపాస మాత్రం తగ్గడం లేదు. దీనివల్ల యుద్ధం ఒక్క దేశానికి పరిమితం కాకుండా మొత్తం ఏరియా మొత్తానికి పాకేలా ఉంది.

ఐక్యరాజ్యసమితి ప్రధాన కార్యదర్శి ఆంటోనియో గుటెర్రెస్ ఎప్పటిలాగే తన పాత రికార్డును మళ్లీ ప్లే చేశారు. "ఇది లోకల్ గొడవ కాదు బాబోయ్.. ప్రాంతీయ మహాయుద్ధంగా మారే ప్రమాదం ఉంది. ప్రపంచ ఆర్థిక వ్యవస్థకు కోలుకోలేని దెబ్బ తగులుతుంది" అంటూ తీవ్ర ఆందోళన వ్యక్తం చేశారు. ఆయన ఆందోళన వ్యక్తం చేయడం.. వీళ్లు దాడులు చేసుకోవడం.. ఇదొక లూప్ లాగా సాగుతూనే ఉంది.