టైమ్ స్క్వైర్ లో కత్తులతో మహిళ బీభత్సం.. ఇద్దరిపై దాడి.. పోలీసుల కాల్పుల్లో మృతి

అమెరికాలోని ప్రముఖ పర్యాటక కేంద్రమైన న్యూయార్క్ టైమ్స్ స్క్వేర్ తీవ్ర దిగ్భ్రాంతికరమైన ఘటనకు వేదికైంది. సోమవారం మధ్యాహ్నం ఓ మధ్యవయస్కురాలైన మహిళ రెండు కత్తులు పట్టుకుని తీవ్ర స్థాయిలో విరుచుకుపడింది. ఈ ఆకస్మిక దాడిలో ఓ మహిళ మృతి చెందగా.. మరో వ్యక్తి అత్యంత ప్రమాదకర స్థితిలో ఆసుపత్రిలో చికిత్స పొందుతున్నాడు. పోలీసులు జరిపిన కాల్పుల్లో తీవ్రంగా గాయపడిన నిందితురాలు ఆసుపత్రిలో కన్నుమూసింది.

రద్దీగా ఉండే ప్రాంతంలో భయాందోళనలు

న్యూయార్క్ నగరంలోని వెస్ట్ 42వ స్ట్రీట్ , సెవెన్త్ అవెన్యూ కూడలిలో ఈ ఘటన జరిగింది. ఎప్పుడూ వేలమంది స్థానికులు, అంతర్జాతీయ పర్యాటకులతో రద్దీగా ఉండే ఈ ప్రాంతంలో సదరు మహిళ హఠాత్తుగా రెండు కత్తులతో ప్రజలపైకి దూసుకొచ్చింది. ఎటువంటి ముందస్తు హెచ్చరికలు లేదా తగాదాలు లేకుండానే ఆమె అక్కడ ఉన్న వారిపై దాడికి దిగింది. కళ్లముందే దాడులు జరుగుతుండటంతో ప్రాణభయంతో జనాలు చెల్లాచెదురుగా పరుగులు తీశారు.

ఈ కత్తిపోట్లలో తీవ్రంగా గాయపడిన మహిళను అత్యవసర వైద్య సేవల సిబ్బంది సమీపంలోని ఆసుపత్రికి తరలించారు. అయితే పరిస్థితి విషమించడంతో ఆమె చికిత్స పొందుతూ మరణించినట్లు అధికారులు ధృవీకరించారు. మరో పురుషుడికి తీవ్ర గాయాలు కాగా, ప్రస్తుతం ఆయన ప్రాణాపాయ స్థితిలో అత్యవసర విభాగంలో చికిత్స పొందుతున్నాడు. బాధితుల పూర్తి వివరాలను పోలీసులు ఇంకా అధికారికంగా వెల్లడించలేదు.

పోలీసుల హెచ్చరికలు.. కాల్పులు

దాడి అనంతరం నిందితురాలు కత్తులు పట్టుకుని సమీపంలోని పోలీస్ స్టేషన్ వైపు వేగంగా అడుగులు వేసింది. ఆమెను నిరోధించేందుకు పోలీసులు తీవ్రంగా ప్రయత్నించారు. కత్తులను కింద పడేయాలని పలుమార్లు స్పష్టమైన హెచ్చరికలు జారీ చేసినప్పటికీ ఆమె పోలీసుల మాటలను లెక్కచేయకుండా వారివైపే కత్తులతో ముందుకు వచ్చింది.

పరిస్థితి చేయిదాటిపోతుండటంతో పాటు సాధారణ ప్రజల భద్రతను దృష్టిలో ఉంచుకుని పోలీసులు ఆమెపై కాల్పులు జరిపారు. తుపాకీ గుళ్లకు గురై కుప్పకూలిన నిందితురాలిని వెంటనే ఆసుపత్రికి తరలించగా వైద్యులు ఆమె మృతి చెందినట్లు ప్రకటించారు.

దర్యాప్తు వేగవంతం

ఈ ఘటన వెనుక ఎలాంటి ఉగ్రవాద కోణం ఉన్నట్లు ఆధారాలు లభించలేదని న్యూయార్క్ పోలీస్ డిపార్ట్‌మెంట్ స్పష్టం చేసింది. నిందితురాలు తీవ్ర మానసిక అస్థిరతతో బాధపడుతూ ఒంటరిగానే ఈ దాడికి పాల్పడి ఉండవచ్చని ప్రాథమికంగా భావిస్తున్నారు. అత్యంత భద్రత కలిగిన టైమ్స్ స్క్వేర్ ప్రాంతంలో ఈ ఘోరం జరగడంతో నగరంలో భద్రతా ఏర్పాట్లపై మళ్లీ చర్చ మొదలైంది. ప్రస్తుతం ఈ ఘటనపై పోలీసులు లోతైన దర్యాప్తు జరుపుతున్నారు.