ఆ బిడ్డ నీది కానప్పుడు భరణం ఎందుకు..? సుప్రీం సంచలన తీర్పు..

వివాహ వ్యవస్థలో నైతికత, చట్టపరమైన బాధ్యతల మధ్య ఉన్న సన్నని గీతను సుప్రీం కోర్టు ఇచ్చిన తీర్పు స్పష్టం చేసింది. డీఎన్ఏ పరీక్షా ఫలితాల ఆధారంగా సుప్రీం వెలువరించిన నిర్ణయం భరణం కేసుల్లో కీలక మైలురాయిగా నిలుస్తుంది. భారతదేశంలో భరణం చట్టాలు సాధారణంగా మహిళలు, పిల్లలకు రక్షణ కవచంలా పనిచేస్తాయి. అయితే, ఒక వ్యక్తికి పుట్టని బిడ్డకు కూడా సదరు తాళి కట్టిన భర్తే భరణం చెల్లించాలా..? అనే సంక్లిష్టమైన ప్రశ్నకు సుప్రీంకోర్టు తీర్పు ద్వారా సమాధానం ఇచ్చింది. జస్టిస్ విజయ్ బిష్ణోయ్, జస్టిస్ ఉజ్జల్ భుయాన్‌తో కూడిన ధర్మాసనం, శాస్త్రీయ ఆధారాల ముందు భావోద్వేగాలకు తావులేదని తేల్చి చెప్పింది.

కేసు నేపథ్యం..

ఈ వివాదం 2016లో ప్రారంభమైంది. వివాహమైన కొద్ది కాలానికే ఆ దంపతులు విడిపోయారు. ఆ తర్వాత సదరు మహిళ ఒక ఆడబిడ్డకు జన్మనిచ్చింది. తనకు పుట్టిన కుమార్తెకు భర్త జీవన భృతి కల్పించాల్సిన బాధ్యత ఉందని ఆమె ఫ్యామిలీ కోర్టును ఆశ్రయించింది. ఆ బిడ్డ తనది కాదని భర్త వాదించడమే కాకుండా, నిజానిజాల కోసం డీఎన్ఏ పరీక్షకు పట్టుబట్టాడు. ఈ కేసులో అత్యంత కీలకమైన మలుపు డీఎన్ఏ నివేదిక. పరీక్షా ఫలితాల్లో సదరు బిడ్డకు ఆ వ్యక్తికి ఎటువంటి జన్యుపరమైన సంబంధం లేదని తేలింది. బిడ్డ తనది కాదని శాస్త్రీయంగా నిరూపితమైనందున, ఆ బిడ్డకు భరణం చెల్లించాల్సిన అవసరం లేదని, కేవలం భార్యకు మాత్రమే మెయింటెనెన్స్ ఇవ్వాలని ట్రయల్ కోర్టు తీర్పు ఇచ్చింది. అయితే సదరు మహిళ ఈ తీర్పును సుప్రీంకోర్టులో సవాల్ చేయగా, దిగువ కోర్టు ఇచ్చిన తీర్పు సబబేనని ధర్మాసనం స్పష్టం చేసింది. ‘వేరొకరి వల్ల పుట్టిన బిడ్డను పోషించమని చట్టబద్ధంగా భర్తను ఆదేశించలేం’ అని అత్యున్నత ధర్మాసనం పేర్కొంది.

చట్టం, నైతికత

సాధారణంగా హిందూ వివాహ చట్టం ప్రకారం, భార్యాబిడ్డల బాధ్యత భర్తదే. కానీ, ఇక్కడ 'తండ్రి' ఎవరు అనే విషయంపై స్పష్టత వచ్చింది. విడాకులు లేదా విడిపోవడం అనేది ఆ జంట మధ్య జరిగిన విషయం కాబట్టి, భార్యగా ఆమెకు భరణం పొందే హక్కు ఉంది. చట్టం ప్రకారం ఒక వ్యక్తి తన సంతానానికి మాత్రమే సంరక్షుడిగా ఉంటాడు. ఇక్కడ వివాహేతర సంబంధం వల్ల పుట్టిన బిడ్డకు చట్టబద్ధమైన తండ్రి ఆ వ్యక్తి కానప్పుడు, ఆర్థిక బాధ్యత కూడా ఉండదని కోర్టు తేల్చింది.

సమాజంపై ప్రభావం

ఈ తీర్పు భవిష్యత్తులో వచ్చే అనేక భరణం కేసులపై ప్రభావం చూపుతుంది. భరణం చట్టాలను అడ్డం పెట్టుకొని వివాహేతర సంబంధాల ద్వారా పుట్టిన బిడ్డల భారాన్ని కూడా భర్తపై మోపాలని చూసే ధోరణికి ఇది అడ్డుకట్ట వేస్తుంది. సాక్ష్యాధారాల చట్టంలోని సెక్షన్ 112 ప్రకారం.. వివాహ బంధంలో ఉండగా పుట్టిన బిడ్డ ఆ భర్తదే అని భావిస్తారు. కానీ, డీఎన్ఏ పరీక్ష ద్వారా దానిని కాదని నిరూపిస్తే, ఆ పాత నిబంధన చెల్లదని ఈ తీర్పు మరోసారి గుర్తు చేసింది.

ఈ తీర్పు ద్వారా సుప్రీం స్పష్టమైన సందేశాన్ని ఇచ్చింది. బాధ్యత అనేది కేవలం కాగితాల మీద ఉండే బంధం వల్ల మాత్రమే రాదు, అది నైతికత, సత్యంపై ఆధారపడి ఉంటుంది. భార్యకు భరణం ఇవ్వడం ఆమె ప్రాథమిక హక్కు అయినప్పటికీ, తండ్రి కాని వ్యక్తిపై బిడ్డ పోషణ భారాన్ని మోపడం అన్యాయమని కోర్టు భావించింది. ఇది పురుషుల హక్కుల పరిరక్షణలో ముఖ్యమైన తీర్పుగా నిలిచిపోతుంది.