మేఘాలయ హనీమూన్ మర్డర్ కేసులో భారీ ట్విస్ట్.. పోలీసుల మిస్టేక్ వల్లేనా?

మేఘాలయ హనీమూన్ హత్య కేసులో ప్రధాన నిందితురాలు సోనమ్ రఘువంశీకి బెయిల్ రావడం ఇప్పుడు పెద్ద చర్చకు దారితీసింది. పక్కా ఆధారాలు ఉన్నా ఆమె బయటకు రావడానికి పోలీసుల నిర్లక్ష్యమే కారణమని తెలుస్తోంది. ఎఫ్ఐఆర్ నమోదు చేసేటప్పుడు పోలీసులు చేసిన ఒక చిన్న పొరపాటు, ఆమె అరెస్టు ప్రక్రియలో పాటించని నిబంధనలు నిందితురాలికి వరంగా మారాయి. చట్టంలో లేని సెక్షన్లను నమోదు చేయడంతో కోర్టు ఆమెకు బెయిల్ మంజూరు చేసింది. ఆ వివరాలు ఇలా వున్నాయి ..

ఎఫ్ఐఆర్‌లో వింత సెక్షన్:

భారతీయ న్యాయ సంహిత ప్రకారం హత్య కేసులో నిందితులపై సెక్షన్ 103(1) వంటివి నమోదు చేయాలి. కానీ, పోలీసులు సోనమ్ అరెస్టు సమయంలో ఎఫ్ఐఆర్‌లో సెక్షన్ 403(1) అని రాశారు. అసలు బీఎన్‌ఎస్‌ చట్టంలోనే ఇలాంటి సెక్షన్ లేకపోవడం గమనార్హం. ఇది కేవలం పొరపాటున జరిగిన సాంకేతిక తప్పిదం అని పోలీసులు వాదించినప్పటికీ, కోర్టు మాత్రం అన్ని పత్రాల్లోనూ ఇదే తప్పు ఉండటాన్ని తీవ్రంగా పరిగణించింది.

అరెస్టు ప్రక్రియలో లోపాలు:

కేవలం సెక్షన్ మిస్టేక్ మాత్రమే కాదు, సోనమ్‌ను అరెస్టు చేసినప్పుడు ఆమెకు చట్టపరమైన హక్కులను కల్పించలేదని కోర్టు గుర్తించింది. నిందితురాలిని కోర్టులో హాజరుపరిచినప్పుడు తన న్యాయవాదిని కలిసే అవకాశం ఇచ్చినట్లు ఎక్కడా రికార్డుల్లో లేదు. దీనివల్ల ఆమె తన అరెస్టును మొదట్లోనే సవాల్ చేయలేకపోయిందని షిల్లాంగ్ కోర్టు అభిప్రాయపడింది. పోలీసుల ఈ తప్పిదాలన్నీ నిందితురాలికి అనుకూలంగా మారి బెయిల్ వచ్చేలా చేశాయి.

సుప్రీం కోర్టు తీర్పుతో బెయిల్:

విహాన్ కుమార్ వర్సెస్ స్టేట్ ఆఫ్ హర్యానా (2025) కేసులో సుప్రీం కోర్టు ఇచ్చిన గత తీర్పును ఆధారంగా చేసుకుని షిల్లాంగ్ కోర్టు సోనమ్‌కు బెయిల్ ఇచ్చింది. రూ. 50,000 వ్యక్తిగత పూచీకత్తుపై ఆమెను విడుదల చేస్తూ కొన్ని షరతులు విధించింది. అనుమతి లేకుండా సోనమ్ షిల్లాంగ్‌ జిల్లాను విడిచి వెళ్లకూడదని ఆదేశించింది. అయితే ఇంతటి దారుణమైన హత్య కేసులో చిన్న పొరపాట్ల వల్ల నిందితురాలు బయటకు రావడంపై విమర్శలు వ్యక్తమవుతున్నాయి.

హైకోర్టుకు వెళ్తున్న కుటుంబం:

నిందితురాలికి బెయిల్ రావడంపై మృతుడు రఘువంశీ కుటుంబం తీవ్ర ఆవేదన వ్యక్తం చేస్తోంది. పోలీసుల నిర్లక్ష్యం వల్లే తమకు అన్యాయం జరుగుతోందని వారు ఆరోపిస్తున్నారు. ఈ బెయిల్‌ను రద్దు చేయాలని కోరుతూ మేఘాలయ హైకోర్టును ఆశ్రయించేందుకు వారు సిద్ధమవుతున్నారు. పక్కాగా ప్లాన్ చేసి జరిగిన హత్యలో సాంకేతిక కారణాలతో నిందితులు తప్పించుకోవడం బాధాకరమని వాపోతున్నారు.

పోలీసులు కేసు నమోదు చేసేటప్పుడు ఎంత జాగ్రత్తగా ఉండాలో ఈ ఘటన నిరూపిస్తోంది. ఒక చిన్న నంబర్ తేడా లేదా సెక్షన్ తప్పుగా వేయడం వల్ల నేరస్థులు చట్టం నుంచి సులభంగా తప్పించుకునే అవకాశం ఉంటుంది. ఈ హనీమూన్ హత్య కేసులో తదుపరి విచారణ ఎలా సాగుతుందో, హైకోర్టు ఎలాంటి నిర్ణయం తీసుకుంటుందో వేచి చూడాలి. ఏది ఏమైనా, బాధితులకు న్యాయం జరగాలంటే దర్యాప్తు సంస్థలు మరింత అప్రమత్తంగా ఉండాలి.