ఇరాన్ లో రాజరికం పునరాగమనం? అగ్రరాజ్యం మద్దతుతో రెజా పహ్లవీ సంచలన వ్యాఖ్యలు!

ఇరాన్‌లో ప్రస్తుతం ఉన్న ఇస్లామిక్ రిపబ్లిక్ ప్రభుత్వం పశ్చిమ దేశాల దాడులతో పతనం అంచున ఉందన్న వార్తల నేపథ్యంలో, బహిష్కృత మాజీ యువరాజు రెజా పహ్లవీ సంచలన వ్యాఖ్యలు చేశారు. ఒకవేళ ఇరాన్‌లో ప్రస్తుత పాలన ముగిస్తే, దేశ బాధ్యతలను స్వీకరించడానికి తాను సిద్ధంగా ఉన్నట్లు ఆయన ప్రకటించారు. 1979లో ఇస్లామిక్ విప్లవం తర్వాత తన కుటుంబాన్ని దేశం నుంచి బహిష్కరించినప్పటికీ, ఇరాన్ ప్రజల సంక్షేమం కోసం తిరిగి రావాలనుకుంటున్నట్లు పేర్కొన్నారు. దశాబ్దాలుగా అమెరికాలో ఉంటున్న పహ్లవీ, ఇప్పుడు ఇరాన్ రాజకీయాల్లోకి అధికారికంగా రీ-ఎంట్రీ ఇవ్వడానికి పావులు కదుపుతున్నారు.

అభివృద్ధికి మాస్టర్ ప్లాన్!

కేవలం అధికారాన్ని ఆశించడమే కాదు.. ఇరాన్‌ను తిరిగి గాడిలో పెట్టడానికి పహ్లవీ ఒక సమగ్ర ప్రణాళికను సిద్ధం చేశారు. దీనికి 'ఇరాన్ ప్రోస్పెరిటీ ప్రాజెక్ట్' (Iran Prosperity Project) అని పేరు పెట్టారు. యుద్ధం, అంతర్జాతీయ ఆంక్షల వల్ల చిన్నాభిన్నమైన దేశ ఆర్థిక వ్యవస్థను పునర్నిర్మించడం, దేశంలో శాంతి నెలకొల్పడం, మౌలిక సదుపాయాల మెరుగు ఈ ప్రాజెక్ట్ ప్రధాన లక్ష్యం. ఇరాన్ వద్ద ఉన్న అపారమైన చమురు సంపదను ప్రజల శ్రేయస్సు కోసం వాడతామని, ఇస్లామిక్ పాలనలో కోల్పోయిన అంతర్జాతీయ గౌరవాన్ని తిరిగి తెస్తానని హామీ ఇస్తున్నారు.

పహ్లవీ వంశం పతనం!

రెజా పహ్లవీ ఇరాన్ చివరి రాజు మహ్మద్ రెజా షా పహ్లవీ కుమారుడు. 1979లో ఇరాన్‌లో ఇస్లామిక్ విప్లవం మొదలై.. భారీ ఎత్తున అల్లర్లు చెలరేగడంతో మహ్మద్ రెజా షా పహ్లవీ తన ప్రాణాలు కాపాడుకోవడానికి అమెరికాకు పారిపోయారు. ఆ తర్వాత అయతుల్లా ఖమేనీ నేతృత్వంలో ఇస్లామిక్ ప్రభుత్వం ఏర్పడి, రాజరికాన్ని పూర్తిగా రద్దు చేయడమే కాకుండా పహ్లవీ కుటుంబాన్ని దేశం నుంచి బహిష్కరించింది. అప్పటి నుంచి ఈ కుటుంబం విదేశాల్లో ఉంటూ ప్రభుత్వానికి వ్యతిరేకంగా గళం విప్పుతోంది. ఇప్పుడు యుద్ధ పరిస్థితులు మళ్లీ ఈ రాజవంశానికి కొత్త ఆశలు చిగురింపజేస్తున్నాయి.

యువత ఆలోచన

ఇరాన్‌లో పెరుగుతున్న నిరుద్యోగం, ద్రవ్యోల్బణం, కఠినమైన మతపరమైన నిబంధనల వల్ల విసిగిపోయిన ఒక వర్గం పహ్లవీ కాలం నాటి స్వేచ్ఛాయుత జీవనాన్ని కోరుకుంటున్నట్లు వార్తలు వస్తున్నాయి. ముఖ్యంగా మహిళా హక్కుల కోసం పోరాడుతున్న వారు, పాత రాజరికం కాలంలో ఉన్న సామాజిక స్వేచ్ఛను గుర్తు చేసుకుంటున్నారు. అయితే, మెజారిటీ ప్రజలు మళ్లీ రాజరికానికి మొగ్గు చూపుతారా? లేదా ప్రజాస్వామ్య వ్యవస్థను కోరుకుంటారా? అనేది సందేహమే. పహ్లవీ మాత్రం తాను కేవలం దేశాన్ని మార్పు వైపు నడిపించే ఒక సంధానకర్తగా ఉంటానని, భవిష్యత్తును ప్రజలే నిర్ణయిస్తారని చెబుతున్నారు.

రెజా పహ్లవీ రాక ఇరాన్‌లో పెను మార్పులకు దారితీయవచ్చు లేదా మరింత అంతర్యుద్ధానికి దారితీయవచ్చు. అమెరికా మద్దతు ఉన్న పహ్లవీ అధికారంలోకి వస్తే పశ్చిమ దేశాలతో ఇరాన్ సంబంధాలు మెరుగుపడే అవకాశం ఉంది. కానీ, 45 ఏళ్ల పాటు ఇరాన్ రాజకీయాల్లో లేని వ్యక్తిని ప్రజలు ఎంత వరకు నమ్ముతారనేది పెద్ద ప్రశ్న. యుద్ధం ముగిసిన తర్వాత ఇరాన్ ఒక కొత్త ప్రజాస్వామ్య దేశంగా మారుతుందా? లేక పహ్లవీ సారథ్యంలో మళ్లీ రాజరికం వైపు వెళ్తుందా? అన్నది కాలమే నిర్ణయించాలి. ఏది ఏమైనా, ఇరాన్ రాజకీయ చదరంగంలో పహ్లవీ ఇప్పుడు ఒక బలమైన పావుగా మారారు.