అమెరికా లేకపోతే హైదరాబాద్ రెవెన్యూ ఎలా పెరుగుతుంది రేవంత్ రెడ్డి?

హైదరాబాద్ కు ఐటీ వచ్చిందే అమెరికా నుంచి.. అక్కడి కంపెనీల నుంచి.. ఈ చిన్న లాజిక్ ను మరిచిపోయిన సీఎం రేవంత్ రెడ్డి ఇప్పుడు ఏదో అమెరికా వల్ల ఆపద వచ్చింది ఆ దేశాన్ని పక్కనపెట్టడం.. ఇతర దేశాలకు వెళ్లాలని సూచించడంపై భిన్నాభిప్రాయాలు వ్యక్తమవుతున్నాయి. తెలంగాణ ముఖ్యమంత్రిగా రేవంత్ రెడ్డి చేసిన వ్యాఖ్యలు ప్రస్తుతం నెట్టింట్లోనూ, రాజకీయ వర్గాల్లోనూ చర్చనీయాంశంగా మారాయి. అమెరికాపై ఆధారపడకుండా, జర్మనీ, జపాన్, సౌత్ కొరియా వంటి దేశాల్లో ఉద్యోగ, ఉపాధి అవకాశాలను వెతుక్కోవచ్చని ఆయన చేసిన తాజా కామెంట్స్‌పై భిన్నాభిప్రాయాలు వ్యక్తమవుతున్నాయి. హైదరాబాద్ అభివృద్ధిలో అమెరికా పాత్రను, ప్రస్తుత అంతర్జాతీయ పరిస్థితులను దృష్టిలో ఉంచుకుని ఈ వ్యాఖ్యలు సరైనవి కావనే భావన వ్యక్తమవుతోంది.

హైదరాబాద్ అభివృద్ధిలో అమెరికా కీలకం

నిస్సందేహంగా హైదరాబాద్ 'సైబరాబాద్'గా రూపుదిద్దుకోవడంలో, ముఖ్యంగా ఐటీ రంగం అభివృద్ధిలో అమెరికా పాత్ర అపారం. 1990ల చివర్లో మైక్రోసాఫ్ట్, ఒరాకిల్ వంటి అగ్రశ్రేణి అమెరికన్ కంపెనీలు హైదరాబాద్‌లో తమ కార్యకలాపాలను ప్రారంభించడంతోనే ఈ నగరం ప్రపంచ పటంలో కీలక ఐటీ కేంద్రంగా నిలిచింది. ఈ అమెరికన్ సంస్థల పెట్టుబడులు, అంతర్జాతీయ ప్రాజెక్టుల వల్ల లక్షలాది ఉద్యోగాలు, ఉపాధి అవకాశాలు ఏర్పడ్డాయి. పరోక్షంగా రియల్ ఎస్టేట్, మౌలిక సదుపాయాలు, ఇతర అనుబంధ రంగాలు కూడా గణనీయంగా అభివృద్ధి చెందాయి. ఈ అభివృద్ధి వల్లనే హైదరాబాద్ రాష్ట్ర ప్రభుత్వానికి అధిక రెవెన్యూ సమకూర్చే ప్రధాన నగరంగా మారింది.

ట్రంప్ ప్రభుత్వ ఆంక్షలు తాత్కాలికమేనా?

అమెరికాలో ప్రస్తుత అధ్యక్షుడు డొనాల్డ్ ట్రంప్ విధానాలు 'అమెరికా ఫస్ట్' అనే నినాదంతో, టారిఫ్ వార్ తో సహా కఠినమైన వీసా నిబంధనలు.. ఆంక్షలు విధించడం నిజమే. ఈ విధానాల వల్ల తాత్కాలికంగా భారతీయ ఐటీ నిపుణులకు, కంపెనీలకు కొన్ని ఇబ్బందులు ఎదురవుతున్నాయి. అయితే అమెరికా విధానాలు ఎప్పుడూ ఒకే విధంగా ఉండవని, డెమోక్రాట్స్ అధికారంలోకి వస్తే మళ్లీ పరిస్థితులు మెరుగుపడతాయని, భారతీయ ఐటీ నిపుణులకు పాత రోజులు తిరిగి వస్తాయని చాలా మంది ఎన్నారైలు.. నిపుణులు అభిప్రాయపడుతున్నారు. ట్రంప్ విధానాలు వ్యక్తిగతమైనవి, తాత్కాలిక రాజకీయ పరిణామాలు కావచ్చు. వాటి కారణంగా, దశాబ్దాలుగా బలపడిన భారత్-అమెరికా వ్యూహాత్మక సంబంధాలను, ఆర్థిక బంధాలను పూర్తిగా విస్మరించడం సరైనది కాదనేది ఎక్కువ మంది వాదన.

ప్రత్యామ్నాయ మార్గాల ఆలోచన: సాధ్యమా?

సీఎం రేవంత్ రెడ్డి పేర్కొన్న విధంగా, జర్మనీ, జపాన్, సౌత్ కొరియా వంటి దేశాలు సాంకేతికంగా, ఆర్థికంగా శక్తివంతమైనవే. ఈ దేశాల్లో ఉపాధి, పెట్టుబడుల అవకాశాలు అన్వేషించడం స్వాగతించదగిన విషయమే. ఏకైక దేశంపై ఆధారపడటం కంటే, ప్రపంచవ్యాప్తంగా మార్కెట్‌ను విస్తరించుకోవడం రాష్ట్రానికి మంచిదే.అయితే, ఇక్కడ రెండు ప్రధాన అంశాలను పరిగణించాలి.. అమెరికా ఐటీ మార్కెట్ పరిమాణం, భారతీయ ఐటీ కంపెనీల ఆదాయంలో దాని వాటా చాలా పెద్దది. జర్మనీ, జపాన్ వంటి దేశాలు మంచి అవకాశాలు కల్పించినా, అమెరికన్ మార్కెట్‌కు అవి పూర్తిగా ప్రత్యామ్నాయం కాలేవు. జర్మనీ, జపాన్, సౌత్ కొరియా వంటి దేశాల్లో ఉపాధి పొందాలంటే, అక్కడి స్థానిక భాషల్లో ప్రావీణ్యం, విభిన్నమైన సాంస్కృతిక అనుసంధానం అవసరం. అమెరికన్, ఆంగ్ల-ఆధారిత మార్కెట్‌తో పోలిస్తే ఇక్కడ సవాళ్లు ఎక్కువ.

*ఆలోచనలో తేడా: వాస్తవికతను గుర్తించాలి

భారతదేశ ఆర్థిక స్థితిని అమెరికాతో పోల్చినప్పుడు, ఈ వ్యాఖ్యల్లోని వాస్తవికత లోపిస్తుందనే విమర్శ ఉంది. అమెరికా జీడీపీ (స్థూల దేశీయోత్పత్తి) , ఆర్థిక ప్రభావం ప్రపంచంలోనే అత్యధికం. భారతదేశం, చైనా వంటి అధిక జనాభా గల దేశాల వృద్ధికి సైతం అమెరికన్ మార్కెట్ , పెట్టుబడులు చాలా కీలకం.

తెలంగాణ ముఖ్యమంత్రిగా, రాష్ట్ర ఆర్థిక ప్రయోజనాల దృష్ట్యా, అంతర్జాతీయంగా స్థిరమైన.. వ్యూహాత్మక విధానాలను పాటించడం అవసరం. ఇంగ్లీష్ పరిజ్ఞానం అనేది కేవలం భాషా నైపుణ్యం మాత్రమే కాదు, అది అంతర్జాతీయ వ్యాపారంలో ఒక వ్యూహాత్మక సాధనం . ఈ నేపథ్యంలో వ్యక్తిగత విమర్శలకు తావు ఇవ్వకుండా, ప్రస్తుత అంతర్జాతీయ ఆర్థిక చిత్రపటాన్ని.. అమెరికాతో హైదరాబాద్ కున్న చారిత్రక, ఆర్థిక బంధాన్ని పరిగణనలోకి తీసుకుని సీఎం రేవంత్ రెడ్డి వ్యాఖ్యలు చేసి ఉంటే బాగుండేదనేది చాలా మంది నెటిజన్ల, విశ్లేషకుల అభిప్రాయం.