ఆ ఎమ్మెల్యేలపై సీఎం ఫైర్.. మీటింగ్ లో ఏమన్నారంటే?

గ్రామ పంచాయతీ ఎన్నికల ఫలితాలు బయటకు వచ్చినప్పటి నుంచి కాంగ్రెస్‌ శిబిరంలో రెండు భావాలు స్పష్టంగా కనిపిస్తున్నాయి. ఒకవైపు సంఖ్యల పరంగా చూసుకుంటే పార్టీకి ఇది స్పష్టమైన విజయం. మరోవైపు, ‘గెలిచినా సరే.. ఎక్కడో తడబాటు జరిగింది’ అన్న అసంతృప్తి పార్టీ అధిష్ఠానంలో గట్టిగానే ఉంది. ఈ రెండు భావాల మధ్యే సీఎం రేవంత్‌రెడ్డి అసహనం వ్యక్తం అవుతుంది. పంచాయతీ ఎన్నికల్లో కాంగ్రెస్‌ సత్తా చాటినప్పటికీ, పార్టీకి పట్టున్న కొన్ని నియోజకవర్గాల్లో ఎదురైన పరాజయాలు, అంతర్గత అసమన్వయం ఇప్పుడు పెద్ద రాజకీయ చర్చగా మారాయి.

అసంతృప్తికి అద్దం..

పంచాయతీ ఎన్నికల ఫలితాలపై కాంగ్రెస్‌ అధిష్ఠానం నిర్వహించిన టెలీకాన్ఫరెన్స్‌ ఈ అసంతృప్తికి అద్దం పట్టింది. సీఎం రేవంత్‌రెడ్డి, టీపీసీసీ అధ్యక్షుడు మహేశ్‌కుమార్‌ గౌడ్‌, రాష్ట్ర వ్యవహారాల ఇన్‌చార్జి మీనాక్షి నటరాజన్‌ హాజరైన ఈ సమావేశంలో నేరుగా పనితీరు మీదే ఫోకస్‌ పెట్టారు. ముఖ్యంగా రెబల్స్‌ను నియంత్రించడంలో విఫలమైన ఎమ్మెల్యేలు, నియోజకవర్గ ఇన్‌చార్జులపై తీవ్ర అసహనం వ్యక్తమైంది. ‘పార్టీ అధికారంలోకి వచ్చిన తర్వాత కూడా ఈ స్థాయి నిర్లక్ష్యం ఎలా?’ అన్న ప్రశ్న ఈ సమావేశం మొత్తం వినిపించింది.

గ్రామ పంచాయతీ ఎన్నికల్లో కాంగ్రెస్‌ మొత్తంగా చూస్తే ఆధిపత్యం సాధించింది. మూడు విడతల్లో జరిగిన ఎన్నికల్లో 12,733 సర్పంచ్ స్థానాలకు గానూ 7,010 స్థానాలను కాంగ్రెస్‌ గెలుచుకుంది. ఇది సుమారు 56 శాతం. బీఆర్ఎస్ 3,502 స్థానాలతో రెండో స్థానంలో నిలవగా, బీజేపీ 688 స్థానాలకు పరిమితమైంది. సంఖ్యలు చూస్తే ఇది స్పష్టమైన విజయం. కానీ రాజకీయాల్లో గెలుపు అనేది కేవలం సంఖ్యలకే పరిమితం కాదు. పార్టీకి బలంగా ఉన్న ప్రాంతాల్లో ఓడిపోవడం, అంతర్గత పోటీ వల్ల నష్టం జరగడం.. ఇవన్నీ రేవంత్‌రెడ్డిని తీవ్రంగా కలచివేశాయి.

ఆ ఎమ్మెల్యేల పనితీరుపై అసహనం..

సమావేశంలో ముఖ్యంగా 16 మంది కాంగ్రెస్‌ ఎమ్మెల్యేల పనితీరుపై సీఎం ఆగ్రహం వ్యక్తం చేసినట్లు సమాచారం. రెబల్స్‌ను సమన్వయం చేయడంలో విఫలం కావడం, బంధువులను అభ్యర్థులుగా నిలబెట్టడం, స్థానిక నాయకత్వాన్ని పక్కన పెట్టడం వంటి అంశాలను తీవ్రంగా తప్పుబట్టారు. ఇవన్నీ పార్టీకి తీరని నష్టం చేశాయని వ్యాఖ్యానించారు. గ్రామ స్థాయిలో పార్టీ ప్రతిష్ఠ దెబ్బతింటే, దాని ప్రభావం నేరుగా రాబోయే అసెంబ్లీ, లోక్‌సభ ఎన్నికలపై పడుతుందని అధిష్ఠానం స్పష్టంగా హెచ్చరించింది.

ఈ ఆగ్రహం వెనుక ఉన్న అసలు భయం ఏంటంటే.. అధికారంలోకి వచ్చిన ఏడాది తిరగకముందే పార్టీ లోపలే నిర్లక్ష్యం, అహంకారం మొదలవుతుందన్న సంకేతం. పంచాయతీ ఎన్నికలు చిన్నవే అని తేలిగ్గా తీసుకున్న చోట్లే నష్టం జరిగిందన్న భావన కాంగ్రెస్‌ నేతల్లో స్పష్టంగా ఉంది. ‘గ్రామమే గడ్డ. అక్కడ బలహీనమైతే పైస్థాయిలో ఎంత గెలిచినా ప్రయోజనం ఉండదు’ అన్నది రేవంత్‌రెడ్డి రాజకీయ దృష్టికోణం.

పార్టీ నాయకులకు వార్నింగ్..

ఇక ఈ పరిణామం కాంగ్రెస్‌ లోపలి రాజకీయాలకు కూడా హెచ్చరిక. అధికారంలోకి వచ్చిన పార్టీగా కాంగ్రెస్‌పై ప్రజల అంచనాలు భారీగా ఉన్నాయి. అదే సమయంలో ప్రతిపక్షాలు చిన్న అవకాశాన్ని కూడా పెద్ద ఆయుధంగా మలుచుకునేందుకు సిద్ధంగా ఉన్నాయి. ఇలాంటి పరిస్థితుల్లో పార్టీ నేతల మధ్య సమన్వయం లేకపోవడం, వ్యక్తిగత ప్రయోజనాలకు ప్రాధాన్యం ఇవ్వడం రాజకీయంగా ప్రమాదకరం. అందుకే ఈసారి రేవంత్‌రెడ్డి మాటలు కేవలం ఆగ్రహంగా కాకుండా, స్పష్టమైన వార్నింగ్‌లా మారాయి.

లోపాలను సరిదిద్దుకోవాలి..

ఈ సమావేశం తర్వాత ఎమ్మెల్యేలు, నియోజకవర్గ బాధ్యులు వైఖరి మార్చుకుంటారా? పార్టీ క్రమశిక్షణను గట్టిగా అమలు చేస్తారా? అన్నది కీలకంగా మారింది. గ్రామ పంచాయతీ ఎన్నికల్లో వచ్చిన విజయం కాంగ్రెస్‌కు ఊపిరి ఇచ్చినా, అదే సమయంలో లోపాలను బయటపెట్టింది. ఇప్పుడు ఆ లోపాలను సరిదిద్దుకుంటేనే ఈ విజయం నిలబడుతుంది. లేకపోతే.. గెలిచినా గెలుపు భారంగా మారే ప్రమాదం ఉందన్న సందేశాన్ని ఈ ఆగ్రహం స్పష్టంగా చెబుతోంది.