దేశ ప్రయోజనాల విషయంలో రాజీ పడం.. అమెరికాకు మోడీ హెచ్చరిక
| అమెరికా తాజాగా భారత్‌పై 50% వరకు అదనపు సుంకాలు విధించడం దేశవ్యాప్తంగా చర్చనీయాంశమైంది.
అమెరికా తాజాగా భారత్‌పై 50% వరకు అదనపు సుంకాలు విధించడం దేశవ్యాప్తంగా చర్చనీయాంశమైంది. ఈ పరిణామంపై ప్రధాని నరేంద్ర మోదీ ఘాటుగా స్పందించారు. అహ్మదాబాద్‌లో జరిగిన ఒక సభలో ఆయన మాట్లాడుతూ, దేశ ప్రయోజనాల విషయంలో ఎంతటి అంతర్జాతీయ ఒత్తిడి వచ్చినా వెనక్కి తగ్గేది లేదని స్పష్టం చేశారు.మోదీ స్పష్టంగా చెబుతూ “రైతులు, చిన్న వ్యాపారులు, సాధారణ ప్రజలు నష్టపోకుండా ఉండటం మా ప్రధాన కర్తవ్యము. ఎవరి ఒత్తిడికీ లోనుకావడం జరగదు. భారత్ తన స్వీయ గౌరవం, ఆర్థిక భద్రత కోసం అవసరమైతే కఠిన నిర్ణయాలు తీసుకోవడానికి వెనుకాడదు” అని తెలిపారు.
-రైతులు, చిన్న వ్యాపారులకు ధైర్యం
మోదీ హామీ ఇస్తూ రైతులు, చిన్న వ్యాపారుల గురించి ప్రత్యేకంగా ప్రస్తావించారు. “వీరి కష్టంతోనే దేశ ఆర్థిక బలానికి పునాది పడింది. వారికి ఎలాంటి ప్రతికూల ప్రభావం పడకుండా అన్ని రకాల చర్యలు తీసుకుంటాం. అమెరికా నిర్ణయాలు మన మార్కెట్లపై ప్రభావం చూపే అవకాశం ఉన్నా, దాన్ని సమర్థవంతంగా ఎదుర్కొంటాం” అని అన్నారు.
-ఆత్మనిర్బర్ భారత్ దిశగా అడుగులు
ఈ సందర్భంలో ప్రధాని మళ్లీ ‘ఆత్మనిర్భర్ భారత్’ స్ఫూర్తిని ప్రస్తావించారు. “బయటి దేశాలపై ఆధారపడకుండా, మన వనరులను వినియోగించుకుంటూ, స్వదేశీ ఉత్పత్తులకు ప్రాధాన్యం ఇవ్వాలి. రైతు నుంచి పరిశ్రమల వరకు స్వావలంబనతో ముందుకు సాగితే ఏ దేశం ఒత్తిడి చేయలేను” అని చెప్పారు. ఆయన ప్రకారం భారత్ ఇప్పటికే రక్షణ, తయారీ, వ్యవసాయం, టెక్నాలజీ వంటి రంగాల్లో ఆత్మనిర్భర్ దిశగా బలమైన అడుగులు వేస్తోందని, ఈ దిశలో మరింత వేగం పెంచాలని అన్నారు.
- అంతర్జాతీయ వేదికలపై భారత్ ధైర్యస్వరం
మోదీ వ్యాఖ్యలతో స్పష్టమైంది ఏమిటంటే అమెరికా సహా ఏ దేశం ఒత్తిడి తీసుకొచ్చినా భారత్ తన నిర్ణయాలను ప్రజల ప్రయోజనాలకే కట్టుబడేలా తీసుకుంటుందనేది. ఇటీవల వరుసగా వాణిజ్య వివాదాలపై భారత్ గట్టి సమాధానం ఇస్తోందని ఆయన వ్యాఖ్యల ద్వారా మరోసారి తేలిపోయింది.
- రాజకీయ విశ్లేషకుల అభిప్రాయం
రాజకీయ నిపుణులు చెబుతున్నట్లుగా, అమెరికా విధించిన అధిక సుంకాలు కొంతకాలం వాణిజ్య సంబంధాలపై ప్రభావం చూపినా, భారత్ దీన్ని ఒక అవకాశంగా మార్చుకోవచ్చని భావిస్తున్నారు. స్వదేశీ తయారీ, ఎగుమతుల విస్తరణ, కొత్త మార్కెట్ల అన్వేషణ ద్వారా భారత్ మరింత బలపడే అవకాశం ఉందని విశ్లేషకులు పేర్కొంటున్నారు.
ప్రధాని మోదీ వ్యాఖ్యలు మరోసారి చూపించాయి.. అంతర్జాతీయ వేదికలపై భారత్ ఇక బలహీనంగా కాకుండా ధైర్యంగా, గర్వంగా నిలబడుతోందని. రైతులు, చిన్న వ్యాపారుల ప్రయోజనాలే ప్రధానమని స్పష్టంగా చెప్పడం ఆయన ఆర్థిక విధానాల దిశను తెలియజేస్తుంది. అమెరికా సుంకాల నిర్ణయం ఎంతటి సవాళ్లను తెచ్చినా, భారత్ ఆత్మనిర్భర్ దిశలో ముందుకు సాగుతుందని మోదీ ధీమా దేశ ప్రజలకు ధైర్యాన్నిస్తోంది.