పవన్ కళ్యాణ్ వీరాభిమాని నిరంజన్ కన్నుమూత.. నెరవేరిన చివరి కోరిక

జనసేన అధినేత, ఆంధ్రప్రదేశ్ ఉప ముఖ్యమంత్రి పవన్ కళ్యాణ్ వీరాభిమాని పొనుగోటి నిరంజన్ మృతి వార్త అభిమానులను, స్థానికులను తీవ్ర విషాదంలో ముంచెత్తింది. హనుమకొండలోని హనుమాన్ నగర్‌కు చెందిన నిరంజన్ గత కొంతకాలంగా అరుదైన జన్యుపరమైన వ్యాధి డ్యూచెన్ మస్కులర్ డిస్ట్రోఫీ తో పోరాడుతున్నాడు. అయితే బుధవారం తెల్లవారుజామున హైదరాబాద్‌లోని ఓ ప్రైవేట్ ఆస్పత్రిలో చికిత్స పొందుతూ అతడు తుదిశ్వాస విడిచాడు.

నెరవేరిన జీవితకాల కోరిక

పొనుగోటి రాము, మానస దంపతుల కుమారుడైన నిరంజన్ చిన్నప్పటి నుంచే పవన్ కళ్యాణ్‌కు వీరాభిమానిగా మారాడు. ఒక్కసారైనా తన అభిమాన హీరోను కలవాలని, మాట్లాడాలని అతడు కలలు కనేవాడు. నిరంజన్ పరిస్థితి, అతడి ఆఖరి కోరిక గురించి తెలుసుకున్న పవన్ కళ్యాణ్ మానవత్వంతో స్పందించారు. గత జూన్ 17న స్వయంగా హనుమకొండకు వెళ్లి నిరంజన్‌ను పరామర్శించారు.

మంచానికే పరిమితమైన నిరంజన్‌ను ఆప్యాయంగా హత్తుకుని ధైర్యం చెప్పారు. తిరుమల శ్రీ వెంకటేశ్వరస్వామి లడ్డు ప్రసాదాన్ని అందించి, శాలువ కప్పి ఆశీర్వదించారు. ఈ సందర్భంగా పవన్ కళ్యాణ్ నటించిన సినిమాల డైలాగులను నిరంజన్ అనుకరిస్తూ చేసిన వీడియోలను చూసి పవన్ ఎంతో ఆనందించారు. అనంతరం జనసేన డైరీలో ఇలా రాశారు. ప్రియమైన నిరంజన్‌కు ప్రేమతో... దుర్గామాత ఆశీస్సులతో నువ్వు చల్లగా ఉండాలని కోరుకుంటున్నా అని పవన్ కళ్యాణ్ రాసుకొచ్చాడు. అంతేకాకుండా నిరంజన్ కుటుంబానికి ఆర్థిక సాయం ప్రకటించి, భవిష్యత్తులో అన్ని విధాలుగా అండగా ఉంటామని పవన్ కళ్యాణ్ హామీ ఇచ్చారు.

మిగిలిపోయిన ‘ఓజీ 2’ కల

ఆ భేటీలో మరో భావోద్వేగ క్షణం కూడా చోటుచేసుకుంది. త్వరలో విడుదలయ్యే "ఓజీ 2" సినిమాను మనిద్దరం కలిసి చూస్తామని, సినిమా విడుదలైతే నువ్వే నా స్పెషల్ గెస్ట్ అని పవన్ కళ్యాణ్ నిరంజన్‌కు మాట ఇచ్చారు. ఆ మాటతో నిరంజన్ ముఖంలో కనిపించిన ఆనందం వర్ణనాతీతం. అయితే విధి వక్రించడంతో ఆ కల నెరవేరకుండానే నిరంజన్ ఈ లోకాన్ని విడిచిపెట్టాడు.

మృత్యువుతో పోరాడి..

కండరాలను క్రమంగా బలహీనపరిచే డ్యూచెన్ మస్కులర్ డిస్ట్రోఫీ వ్యాధి కారణంగా నిరంజన్ ఆరోగ్యం రోజురోజుకూ క్షీణించింది. చివరికి కిడ్నీలు కూడా దెబ్బతినడంతో పలు ఆస్పత్రుల్లో చికిత్స అందించినప్పటికీ ఫలితం లేకుండా పోయింది.

నిరంజన్ మృతితో కుటుంబ సభ్యులు కన్నీరుమున్నీరుగా విలపిస్తున్నారు. హనుమకొండలోని హనుమాన్ నగర్ ప్రాంతమంతా విషాదంలో మునిగిపోయింది. పవన్ కళ్యాణ్ స్వయంగా వచ్చి తన అభిమానిని పరామర్శించిన సంఘటన ఇప్పటికీ అందరి మనసుల్లో నిలిచిపోయింది. అయితే ఆ అపురూపమైన భేటీ జరిగిన కొద్ది రోజులకే నిరంజన్ మృతి చెందడం పవన్ అభిమానులను తీవ్రంగా కలిచివేస్తోంది.

నిరంజన్ జీవితం చిన్నదైనా అతని ధైర్యం, చిరునవ్వు, తన అభిమాన హీరోను కలవాలనే తపన ఎంతో మందికి స్ఫూర్తిగా నిలిచాయి. అతని చివరి కోరిక నెరవేరినా, పవన్ కళ్యాణ్‌తో కలిసి "ఓజీ 2" సినిమా చూడాలనే కల మాత్రం కలగానే మిగిలిపోయింది. నిరంజన్ ఆత్మకు శాంతి చేకూరాలని సోషల్ మీడియా వేదికగా అభిమానులు సంతాపం వ్యక్తం చేస్తున్నారు.