లక్ష కోట్ల ఎగుమతులపై యుద్ధం దెబ్బ: తెలుగు రైతన్నలకూ తప్పని తిప్పలు!

మిడిల్ఈస్ట్ లో యుద్ధం నేపథ్యంలో భారతదేశం నుంచి పశ్చిమాసియా దేశాలకు జరిగే వ్యవసాయ ఎగుమతులు ఇప్పుడు సంక్షోభంలో పడ్డాయి. ముఖ్యంగా నౌకా రవాణా మార్గాల్లో అంతరాయాలు కలగడం, బీమా వ్యయాలు భారీగా పెరగడం, సరఫరాలో అనిశ్చితి నెలకొనడం వల్ల ఈ పరిస్థితి తలెత్తిందని జీటీఆర్‌ఐ వ్యవస్థాపకుడు అజయ్ శ్రీవాస్తవ తెలిపారు. మన దేశం నుంచి ఎగుమతి అయ్యే మొత్తం వ్యవసాయ ఉత్పత్తుల్లో ఐదో వంతుకు పైగా (21.8%) కేవలం ఈ పశ్చిమాసియా దేశాలకే వెళ్తున్నాయి. దశాబ్దాలుగా మన ఆహార ఉత్పత్తులకు గల్ఫ్ ప్రాంతం ఒక కీలక మార్కెట్‌గా మారింది, కానీ ప్రస్తుత ఉద్రిక్తతలు ఆ బంధాన్ని దెబ్బతీస్తున్నాయి.

తెలుగు రాష్ట్రాల బియ్యం రైతులకు కష్టాలేనా?

ఈ యుద్ధ ప్రభావం మన ఆంధ్రప్రదేశ్, తెలంగాణ రాష్ట్రాల్లోని రైతులపై నేరుగా పడనుంది. గతేడాది పశ్చిమాసియాకు భారత్ 4.43 బిలియన్ డాలర్ల విలువైన బియ్యాన్ని ఎగుమతి చేసింది. ఆశ్చర్యకరమైన విషయం ఏంటంటే, భారత్ చేసే మొత్తం బియ్యం ఎగుమతుల్లో 36.7 శాతం వాటా ఈ దేశాలదే. ముఖ్యంగా ఏపీ, తెలంగాణతో పాటు పంజాబ్, హరియాణ వంటి రాష్ట్రాల నుంచి గల్ఫ్ మార్కెట్లకు బియ్యం అధికంగా వెళ్తుంటాయి. ఇప్పుడు అక్కడ యుద్ధం వల్ల రవాణా ఆగిపోతే, మన ఊరి మిల్లుల్లో బియ్యం నిల్వలు పెరిగిపోయి, రైతులకు మద్దతు ధర దక్కడం కష్టంగా మారవచ్చు.

సుగంధ ద్రవ్యాల నుంచి పాల ఉత్పత్తుల వరకు..

బియ్యం మాత్రమే కాదు, పశ్చిమాసియాకు మనం పంపే కూరగాయలు, సుగంధ ద్రవ్యాల వాటా చాలా పెద్దది. ప్రపంచవ్యాప్తంగా భారత్ చేసే ఎగుమతుల్లో సుమారు 29.2 శాతం వాటా ఈ ప్రాంతానిదే. అరటి ఎగుమతులు 396.5 మిలియన్ డాలర్లు, ఉల్లి, వెల్లుల్లి ఎగుమతులు 111 మిలియన్ డాలర్లుగా ఉన్నాయి.

యాలకులు, జాజికాయ (295.5 మిలియన్ డాలర్లు), జీలకర్ర, ధనియాలు (163 మిలియన్ డాలర్లు), అల్లం, పసుపు (173 మిలియన్ డాలర్లు) వంటివి కూడా భారీగా ఎగుమతి అవుతున్నాయి. వీటితో పాటు కాఫీ, తేయాకు, పంచదార, సుమారు 1.81 బిలియన్ డాలర్ల విలువైన మాంసం, చేపల ఉత్పత్తులు కూడా ఇబ్బందుల్లో పడే అవకాశం ఉంది.

ప్రభుత్వం ఇచ్చిన చిన్న ఊరట కష్టకాలంలో ఎగుమతిదారులను ఆదుకోవడానికి ప్రభుత్వం కొన్ని సడలింపులను ప్రకటించింది. ఎక్స్‌పోర్ట్ ప్రమోషన్ కేపిటల్ గూడ్స్ (ఈపీసీజీ) అనుమతులకు సంబంధించి ఎక్స్‌పోర్ట్ ఆబ్లిగేషన్ (ఈఓ) సమయాన్ని 2026, ఆగస్టు 31 వరకు ఆటోమేటిక్‌గా పొడిగించారు. దీని కోసం ప్రత్యేకంగా దరఖాస్తు చేయాల్సిన అవసరం, రుసుము చెల్లించాల్సిన అవసరం గానీ లేదు. అంతేకాకుండా, ఓడరేవుల్లో రవాణా ఛార్జీలను తగ్గించాలని లేదా రద్దు చేయాలని ప్రభుత్వం పోర్టులకు సూచించింది.

యుద్ధం ఎక్కడో జరిగినా, దాని ప్రభావం మన పొలాల వరకు వస్తుందని ఈ గణాంకాలు చెబుతున్నాయి. ఒకవైపు పశ్చిమాసియాలో మార్కెట్ దెబ్బతింటుంటే, మరోవైపు ఐస్‌లాండ్ వంటి దేశాలు భారత్‌లో పెట్టుబడులు పెట్టడానికి ఆసక్తి చూపుతుండటం కొంత ఆశాజనకమైన విషయం. పర్యావరణ హిత ఇంధనం, ఫిషరీస్ వంటి రంగాల్లో కొత్త ఒప్పందాలు కుదిరే అవకాశం ఉంది. ఏదేమైనా, మన అన్నదాతల కష్టం వృథా కాకుండా ఉండాలంటే పశ్చిమాసియాలో త్వరగా శాంతి నెలకొనడం చాలా అవసరం.