ఉత్తర అమెరికాలోనే అత్యంత ఎత్తైన శ్రీరామ విగ్రహం.. ఆ అద్భుతం జరిగిందిలా..

కెనడాలోని మిస్సిసాగా నగరం ఆధ్యాత్మిక శోభతో వెలిగిపోయింది. ఉత్తర అమెరికాలోనే అత్యంత ఎత్తైన శ్రీరామ విగ్రహాన్ని ఇక్కడ అత్యంత వైభవంగా ఆవిష్కరించారు. 51 అడుగుల ఎత్తైన ఈ భగవాన్ శ్రీరామ విగ్రహం ఇప్పుడు భక్తి, సంస్కృతి, అద్భుతమైన సాంకేతిక నైపుణ్యానికి ప్రతీకగా నిలుస్తోంది.

* సాంకేతికత, సంస్కృతుల సమ్మేళనం

ఈ అద్భుత విగ్రహాన్ని భారతదేశంలోని మానేసర్‌లోని మతు రామ్ ఆర్ట్ సెంటర్‌లో ప్రసిద్ధ శిల్పి నరేశ్ కుమార్ కుమావత్ రూపొందించారు. విగ్రహం తయారీలో విమానాల తయారీలో ఉపయోగించే నాణ్యమైన ఫైబర్ గ్లాస్, స్టీల్ పదార్థాలను వాడటం విశేషం.

విగ్రహాన్ని పలు భాగాలుగా భారతదేశంలో తయారు చేసి, అనంతరం కెనడాకు రవాణా చేశారు. అక్కడ అమెరికన్ ఇంజినీర్ల బృందం ఈ భాగాలను కలిపి మిస్సిసాగాలోని హిందూ హెరిటేజ్ సెంటర్ వద్ద ప్రతిష్ఠించారు. ఈ నిర్మాణం సాంకేతికత, సంస్కృతి సమ్మేళనాన్ని చాటుతోంది.

* భక్తుల పండుగ, ప్రముఖుల సందడి

ఆవిష్కరణ వేడుక మహోజ్వలంగా జరిగింది. ఈ కార్యక్రమానికి కెనడా నుండే కాక, న్యూయార్క్, న్యూజెర్సీ వంటి ప్రాంతాల నుండి కూడా భక్తులు వేలాదిగా తరలివచ్చారు. నిర్వాహకులు తెలిపిన వివరాల ప్రకారం, 10,000 మందికి పైగా భక్తులు హాజరయ్యారు.

ఈ వేడుకకు కెనడా మహిళా సమానత్వ మంత్రిణి రెచర్ వాల్డెజ్, ట్రెజరీ బోర్డ్ అధ్యక్షుడు షఫ్కత్ అలీ, మరియు అంతర్జాతీయ వాణిజ్య మంత్రి మనీందర్ సిద్ధూ తదితర ప్రముఖులు హాజరై తమ గౌరవాన్ని చాటుకున్నారు.

మంత్రి మనీందర్ సిద్ధూ మాట్లాడుతూ "ఇది కెనడాకు గర్వకారణం. మన సాంస్కృతిక ఐక్యతకు ఈ విగ్రహం ప్రతీక" అన్నారు.

హిందూ హెరిటేజ్ సెంటర్ వ్యవస్థాపకుడు.. ప్రధాన పూజారి ఆచార్య సురేందర్ శర్మ శాస్త్రి, "ఈ విగ్రహ ఆవిష్కరణ భక్త సమాజానికి ఆధ్యాత్మిక బహుమతి. ధర్మమే మన మార్గదర్శకమని ఇది గుర్తు చేస్తుంది" అని ఉద్ఘాటించారు.

ఈవెంట్ నిర్వాహకుడు కుషాగ్ర శర్మ మాట్లాడుతూ "ఇది కేవలం భక్తి ఉత్సవమే కాదు, సంస్కృతుల సమన్వయానికి, ఆధ్యాత్మిక వారసత్వానికి చిహ్నం" అని తెలిపారు.

* గమ్యానికి తొలి ఆధ్యాత్మిక స్వాగతం

ఈ భవ్య శ్రీరామ విగ్రహం టొరొంటో పియర్సన్ అంతర్జాతీయ విమానాశ్రయానికి సమీపంలో ఉండటం వలన, కెనడాకు వచ్చే ప్రయాణికులకు కనబడే తొలి ఆధ్యాత్మిక స్మారక చిహ్నంగా నిలవనుంది. భక్తి, ఐక్యత, భారతీయ సాంస్కృతిక గౌరవాన్ని ప్రపంచానికి చాటే ఈ విగ్రహం మిస్సిసాగా నగరానికే తలమానికంగా మారింది.