కోహినూర్ వజ్రంపై నిలదీత: ఇంగ్లండ్ పర్యాటకులకు కేరళ మహిళల ‘షాక్’ వీడియో వైరల్!

కేరళ పర్యటనకు వచ్చిన ఇంగ్లండ్ పర్యాటకులకు స్థానిక మహిళలు ఊహించని 'దోపిడీ' షాక్ ఇచ్చారు. వలస పాలనలో దోచుకున్న సంపద, ముఖ్యంగా కోహినూర్ వజ్రం, సుగంధ ద్రవ్యాలను ఎప్పుడు తిరిగి ఇస్తారంటూ సరదాగా, కానీ గంభీరమైన ప్రశ్న సంధించారు. ఈ హాస్యభరితమైన సంభాషణకు సంబంధించిన వీడియో సోషల్ మీడియాలో విపరీతంగా చక్కర్లు కొడుతోంది.

* తిరువనంతపురంలో చమత్కార సంభాషణ

కేరళలోని తిరువనంతపురంలోని పద్మనాభస్వామి ఆలయం సమీపంలో ఈ సంఘటన జరిగింది. ఇంగ్లండ్‌కు చెందిన ఒక ట్రావెల్ కంటెంట్ క్రియేటర్స్ జంట నడుచుకుంటూ వెళ్తుండగా స్థానిక మహిళలు వారిని పలకరించారు. వారు ఇంగ్లండ్ పౌరులని తెలుసుకున్న వెంటనే ఒక మహిళ చురుకైన ప్రశ్నతో వారిని నిలదీశారు. "మీరు మమ్మల్ని దోచుకున్నారు. నిధి, నల్ల మిరియాలు, అన్నీ. కోహినూర్ ఒక విలువైన, అరుదైన వజ్రం. మీరు దానిని ఇక్కడి నుంచి దోచుకున్నారు. ఎప్పుడు తిరిగి ఇస్తారు?" ఈ ఊహించని ప్రశ్నతో పర్యాటక జంట కాస్త ఆశ్చర్యానికి గురయ్యారు. అయినప్పటికీ వారు వెంటనే తేరుకుని నవ్వుతూ, చమత్కారంగా బదులిచ్చారు. "మీరు మా పూర్వీకులతో మాట్లాడాలి," అని ఒకరు అనగా, "మేము మా రాజు కింగ్ ఛార్ల్స్‌తో మాట్లాడి మీకు చెబుతాం!" అని మరొకరు నవ్వుతూ సమాధానమిచ్చారు. ఈ సరదా సంభాషణ అక్కడ నవ్వులు పూయించింది.

* సోషల్ మీడియాలో మిశ్రమ స్పందనలు

బ్రిటీష్ పర్యాటకులు ఈ వీడియోను తమ సోషల్ మీడియా హ్యాండిల్‌లో పంచుకుంటూ, తమ ప్రయాణంలో ఇది "అత్యంత ఇబ్బందికరమైన క్షణాల్లో" ఒకటిగా అభివర్ణించారు. అయితే వలస పాలన చారిత్రక వారసత్వం గురించి ఆలోచించేలా చేసిందని కూడా వారు అంగీకరించారు. ఈ వీడియో వైరల్ అయిన తరువాత, నెటిజన్ల నుండి మిశ్రమ స్పందన వచ్చింది, కానీ మెజారిటీ మహిళా వాదనకు మద్దతు పలికారు.

అనేక మంది నెటిజన్లు కేరళ మహిళల ధైర్యాన్ని, చురుకైన ప్రతిస్పందనను ప్రశంసించారు. “ఆమె నూటికి నూరు శాతం నిజం చెప్పింది,” “బ్రిటిష్ మ్యూజియం దొంగిలించబడిన వలస ట్రోఫీల కేబినెట్,” వంటి వ్యాఖ్యలు చేస్తూ ఆమె వాదనను బలంగా సమర్థించారు. కొందరు "ఆమెకు సరదాగా ఉందంతే, మీరు ఇంతగా కంగారు పడనవసరం లేదు" అంటూ బ్రిటీష్ హ్యూమర్‌ను గుర్తు చేశారు. మరికొందరు పర్యాటకులకు సానుభూతి చూపారు, ఎందుకంటే వారు స్వయంగా వలస పాలనకు బాధ్యులు కారని పేర్కొన్నారు.

*చారిత్రక వలస దోపిడీకి ప్రతీక: కోహినూర్

ఈ చిన్న హాస్య సంభాషణ వెనుక భారతదేశ వలస చరిత్రలోని చేదు నిజం దాగి ఉంది. బ్రిటీష్ పాలనలో, కోహినూర్ వజ్రంతో పాటు అపారమైన సంపద భారతదేశం నుండి బ్రిటన్‌కు తరలిపోయాయి. కోహినూర్ వజ్రం ప్రపంచవ్యాప్తంగా వలస దోపిడీకి ప్రతీకగా నిలిచింది. కేరళ మహిళల ఈ ప్రశ్నాస్త్రం ఆ చారిత్రక అన్యాయాన్ని మరోసారి ప్రపంచానికి గుర్తుచేసింది.

మొత్తంగా ఈ చిన్న హాస్యమిశ్రమ సంఘటన భారతదేశంపై బ్రిటీష్ వలస పాలన ప్రభావాన్ని.. దాని వారసత్వాన్ని ప్రతిబింబించే ఒక పెద్ద సందేశాన్ని బలంగా పంపింది.