ఫ్యూచర్ ఫుట్ వేర్ టెక్నాలజీ వీడియో వైరల్.. మీరూ ఓ లుక్కేయండి!

జపాన్ వినూత్న సాంకేతిక పరిజ్ఞానంలో ముందుంటుంది అనే సంగతి తెలిసిందే. అక్కడ కనిపిస్తోన్న టెక్నాలజీకి సంబంధించిన వీడియోలు చూసినవారికి గతంలో అది గ్రాఫిక్సేమో అనే సందేహం కలగగా ఇప్పుడైతే అది నిజంగా నిజమా.. లేక, ఏఐ సృష్టా అనే సందేహాలు వస్తున్నాయి. ఆ స్థాయిలో అక్కడ టెక్నాలజీ వాడకం ఉంటుందని చెబుతారు. ఈ క్రమంలో తాజాగా మరో వీడియో నెట్టింట సంచలనంగా మారింది.

అవును... తాజాగా సోషల్ మీడియాలో ఓ వీడియో హల్ చల్ చేస్తోంది. జపాన్ లో భవిష్యత్ పాదరక్షల సాంకేతికతను చూపిస్తోన్న ఆ వీడియోలో "సెల్ఫ్ సైజింగ్ స్నీకర్ పాడ్" అనే ఓ అద్భుత ఆవిష్కరణ దర్శనమిస్తోంది. ఈ సమయంలో ఆ వీడియోపై నెటిజన్లు విభిన్నంగా స్పందిస్తున్నారు! ఇందులో భాగంగా... ఈ వీడియో నిజం అయితే బాగుండు అని కొంతమంది ఆశపడుతున్నారు.

ఇదే సమయంలో.. అది ఏఐ సృష్టించిన వీడియో అని మరొకరు అంటున్నారు. ఇంకొకరైతే.. జపాన్ లో ఏదైనా సాధ్యమే అంటూ ఆ దేశం సాంకేతికపై తన అభిమానాన్ని ప్రదర్శిస్తున్నారు! ఎక్స్, ఇన్ స్టాగ్రామ్, టిక్ టాక్, ఫేస్ బుక్ మొదలైన సోషల్ మీడియా ఫ్లాట్ ఫామ్ లలో విస్తృతంగా షేర్ చేయబడుతున్న ఈ వీడియోలో.. ఒక వ్యక్తి పాదాన్ని స్కాన్ చేసి, తక్షణమే అతడికి సరిగ్గా సరిపోయే స్నీకర్ ను అమర్చుతుంది.

అయితే ఈ వీడియోలో ఇది బ్రాండ్ కి సంబంధించిన అనే విషయం ప్రస్తావించకపోవడంతో.. ఇది ఏఐ అనే చాలా మంది నమ్ముతున్నారు! అదే విధంగా ఏ అఫిషియల్ సోర్సు కూడా ఆ ఫుటేజ్ ని ధృవీకరించలేదు! దీంతో ఎటువంటి నిర్దారణలూ లేక ఆ ఫుటేజ్ ఆన్ లైన్ మిస్టరీ వీడియోగా మిగిలిపోతోంది! మరోవైపు ఓ ఇన్ స్టాగ్రామ్ యూజర్ మాత్రం 10 నెలల క్రితమే దీనిపై తన ఆలోచనను పంచుకున్నట్లు తెలిపాడు!

ఇందులో భాగంగా... బిలోదిబ్రైన్ అనే అకౌంట్ హోల్డర్ 10 నెలల క్రితమే తనకు ఈ ఆలోచన వచ్చిందని, దాన్ని లింక్డ్ ఇన్ లో పోస్ట్ చేసినట్లు తెలిపారు. తాను భవిష్యత్తును చూస్తాను అని, తన ఆలోచనలను తాను వ్యక్తపరుస్తానని.. అవి తర్వాత ధృవీకరించబడినప్పుడు తనకు చాలా నచ్చుతుందని రాసుకొచ్చాడు.