అమెరికాలో ఉండే భారతీయులకు కేంద్రం గుడ్ న్యూస్

అమెరికాలో నివసిస్తున్న భారతీయ ప్రవాసులకు, భారత్ నుంచి తమ వారికి సరుకులు పంపాలనుకునే వారికి కేంద్ర ప్రభుత్వం శుభవార్త అందించింది. సుమారు రెండు నెలలుగా నిలిచిపోయిన అమెరికాకు అన్ని రకాల అంతర్జాతీయ పోస్టల్ సేవలను భారత పోస్టల్ శాఖ మళ్లీ పునరుద్ధరించింది. ఈ నిర్ణయం బుధవారం నుంచి (అక్టోబర్ 15, 2025) తక్షణమే అమల్లోకి వచ్చినట్లు కేంద్ర కమ్యూనికేషన్ల మంత్రిత్వ శాఖ మంగళవారం ప్రకటించింది.

నిలిపివేత వెనుక డొనాల్డ్ ట్రంప్ టారిఫ్‌లు!

గతంలో, అమెరికా అధ్యక్షుడు డొనాల్డ్ ట్రంప్ జారీ చేసిన ఎగ్జిక్యూటివ్ ఆర్డర్ నెం. 14324 (జులై 30, 2025) కారణంగా ఈ సేవలు ఆగస్టు 25, 2025 నుంచి నిలిచిపోయాయి. అంతకుముందు, $800 వరకు విలువైన వస్తువులపై కస్టమ్స్ డ్యూటీ మినహాయింపు ఉండేది. కొత్త ఉత్తర్వుల ప్రకారం, ఈ మినహాయింపు రద్దు చేయబడింది. అంతర్జాతీయ ఎమర్జెన్సీ ఎకనామిక్ పవర్స్ యాక్ట్ (IEEPA) టారిఫ్ విధానం కింద అన్ని వస్తువులపై సుంకాలు తప్పనిసరి అయ్యాయి. అయితే, ఈ సుంకాలను ఎలా వసూలు చేయాలి, ప్రభుత్వానికి ఎవరు చెల్లించాలి అనే విధానాలపై అమెరికా కస్టమ్స్ (CBP) నుంచి స్పష్టత లేకపోవడం ప్రధాన సమస్యగా మారింది.

ఎయిర్ క్యారియర్స్ నిరాకరణ:

ఈ గందరగోళం కారణంగా అమెరికాకు వెళ్లే విమానయాన సంస్థలు (ఎయిర్ క్యారియర్లు) ఆగస్టు 25 తర్వాత పోస్టల్ సరుకులను స్వీకరించడానికి నిరాకరించాయి. దీంతో భారత్ తప్పనిసరి పరిస్థితుల్లో సేవలను తాత్కాలికంగా ఆపాల్సి వచ్చింది. పునరుద్ధరణతో కమ్యూనికేషన్ బంధం మళ్లీ బలపడింది.

తాజా ప్రకటన ప్రకారం, భారత్ నుంచి అమెరికాకు ఇప్పుడు అన్ని రకాల పోస్టల్ సేవలు అందుబాటులోకి వచ్చాయి.

ఎక్స్‌ప్రెస్ మెయిల్ సర్వీసులు (EMS)

ఎయిర్ పార్సిల్స్

రిజిస్టర్డ్ లెటర్స్/ప్యాకెట్స్

అంతర్జాతీయ మెయిల్

పోస్టల్ శాఖ ప్రకారం, అంతర్జాతీయ కొరియర్‌లు లేదా వాణిజ్య సరుకులతో పోలిస్తే, పోస్టల్ వస్తువులపై అదనపు లేదా ఉత్పత్తి-నిర్దిష్ట సుంకాలు విధించబడవు.

కొత్త సుంకం నిబంధన

అమెరికా కస్టమ్స్ నిబంధనల ప్రకారం, ఇప్పుడు భారత్ నుంచి వెళ్లే పోస్టల్ షిప్‌మెంట్‌లపై కన్‌సైన్‌మెంట్ విలువలో 50 శాతం చొప్పున ఫ్లాట్ కస్టమ్స్ సుంకం వర్తిస్తుంది. ఈ మొత్తాన్ని బుకింగ్ సమయంలోనే భారత్‌లో ముందుగానే వసూలు చేస్తారు. ఈ సులభతరమైన డ్యూటీ విధానం ఎంఎస్‌ఎంఈలు (MSMEs), చిన్న వ్యాపారులు, చేతివృత్తులవారు, ఈ-కామర్స్ ఎగుమతిదారులకు ఆర్థిక భారాన్ని తగ్గిస్తుంది. పోస్టల్ టారిఫ్‌లలో ఎటువంటి మార్పు ఉండదని, ఇది ఎగుమతిదారులకు మరింత లాభదాయకంగా ఉంటుందని పోస్టల్ శాఖ స్పష్టం చేసింది.

ఎలా బుక్ చేసుకోవాలి?

భారతీయ పౌరులు , వ్యాపారులు తమ పార్సిళ్లను ఈ మార్గాల ద్వారా బుక్ చేసుకోవచ్చు:

సమీప పోస్టాఫీసులు

ఇంటర్నేషనల్ బిజినెస్ సెంటర్ (IBC)

డాక్ ఘర్ నిర్యాత్ కేంద్రాలు

ఆన్‌లైన్ సెల్ఫ్-సర్వీస్ పోర్టల్ (www.indiapost.gov.in)

ఈ నిర్ణయం అమెరికాలో ఉన్న లక్షలాది మంది భారతీయులకు, ఇరు దేశాల మధ్య వాణిజ్య సంబంధాలు కొనసాగించే చిన్న వ్యాపారులకు పెద్ద ఊరట నిచ్చింది.