గ్లోబల్ డిమాండ్.. లోకల్ సంక్షోభం: శ్రామిక రంగానికి మేల్కొలుపు పిలుపు

ప్రపంచవ్యాప్తంగా జనాభా నిర్మాణంలో చోటుచేసుకుంటున్న విప్లవాత్మక మార్పులు రాబోయే రోజుల్లో భారత కార్మిక రంగాన్ని పెను సవాళ్లలోకి నెట్టబోతున్నాయనే హెచ్చరికలు ఆర్థిక వర్గాల్లో తీవ్ర చర్చకు దారితీస్తున్నాయి. రానున్న ఐదేళ్లలో భారత్‌లో ప్లంబర్లు, ఎలక్ట్రీషియన్లు, డ్రైవర్లు, నర్సులు వంటి 'బ్లూ కాలర్' నైపుణ్యం కలిగిన శ్రామిక సిబ్బంది కొరత తీవ్రం కానుందని వస్తున్న అంచనాలు కేవలం ఒక హెచ్చరిక మాత్రమే కాదు.. దేశ పారిశ్రామిక, సేవా రంగాలకు ఒక మేల్కొలుపు పిలుపు. ఒకవైపు అపారమైన మానవ వనరులు ఉండి కూడా దేశీయంగా శ్రామిక కొరత ఏర్పడే విచిత్రమైన పరిస్థితి వైపు భారత్ అడుగులు వేస్తోందా అనే అనుమానాలు ఇప్పుడు నిజమౌతున్నాయి.

అభివృద్ధి చెందిన పాశ్చాత్య దేశాలతో పాటు జపాన్, దక్షిణ కొరియా, కెనడా, ఆస్ట్రేలియా వంటి దేశాలు ప్రస్తుతం తీవ్రమైన 'డెమోగ్రాఫిక్ క్రైసిస్' జననాల రేటు పతనం, వృద్ధుల జనాభా పెరుగుదల ను ఎదుర్కొంటున్నాయి. అక్కడ పరిశ్రమలను నడపడానికి, రోజువారీ పౌర సేవలను అందించడానికి స్థానిక కార్మికులు దొరకని పరిస్థితి నెలకొంది. ఈ శూన్యాన్ని పూరించడానికి ఆయా దేశాలు తమ వీసా విధానాలను సరళీకరిస్తూ విదేశీ శ్రామిక శక్తిని పెద్దఎత్తున ఆహ్వానిస్తున్నాయి. అధిక వేతనాలు, ఆకర్షణీయమైన జీవన ప్రమాణాలు, సామాజిక భద్రత ఆశచూపుతున్న అంతర్జాతీయ మార్కెట్ వైపు సహజంగానే భారతీయ నైపుణ్య కార్మికులు మొగ్గు చూపుతున్నారు. ఫలితంగా మన దేశంలోని ప్రతిభావంతమైన శ్రామిక శక్తి విదేశాలకు తరలిపోతోంది.

అంతర్గత సంక్షోభం.. పెరగనున్న వ్యయాలు

ఈ శ్రామిక వలసల ప్రభావం రాబోయే రోజుల్లో భారతదేశ మౌలిక వసతుల రంగంపై తీవ్రంగా పడనుంది. దేశీయంగా రియల్ ఎస్టేట్, నిర్మాణ రంగం, విద్యుత్, రవాణా, ఆరోగ్య రంగాలు ప్రస్తుతం శరవేగంగా విస్తరిస్తున్నాయి. ఇలాంటి తరుణంలో నైపుణ్యం కలిగిన ప్లంబర్లు, ఎలక్ట్రీషియన్లు, నర్సుల కొరత ఏర్పడితే ప్రాజెక్టులు ఆలస్యం కావడమే కాకుండా సేవల నాణ్యత దెబ్బతింటుంది. శ్రామికుల కొరత వల్ల దేశీయంగా వారి వేతనాలు, సేవా రుసుములు గణనీయంగా పెరగడం ఖాయం. ఇది అంతిమంగా సామాన్య వినియోగదారుడిపై భారాన్ని పెంచి, ద్రవ్యోల్బణానికి దారితీసే ప్రమాదం ఉంది.

విదేశీ మారకద్రవ్యం (రెమిటెన్సెస్) రూపంలో దేశంలోకి నిధులు రావడం ఆర్థిక వ్యవస్థకు లాభదాయకమే అయినప్పటికీ, దేశీయ అవసరాలను పణంగా పెట్టి సాధించే ప్రగతి దీర్ఘకాలంలో నష్టాన్ని చేకూరుస్తుంది.

కార్యాచరణకు ఇదే సరైన సమయం

ఈ సవాలును అధిగమించడానికి ప్రభుత్వం, పారిశ్రామిక రంగాలు తక్షణమే ఉమ్మడి వ్యూహాన్ని అమలు చేయాలి. భారతదేశంలో ప్రస్తుతం ఉన్న అపారమైన యువ జనాభాను ఒక 'ఆస్తి'గా మార్చుకోవాలి. కేంద్ర, రాష్ట్ర ప్రభుత్వాల ఆధ్వర్యంలోని స్కిల్ డెవలప్‌మెంట్ (నైపుణ్యాభివృద్ధి) కేంద్రాలు, ఐటీఐల స్థాయిని అంతర్జాతీయ ప్రమాణాలకు అనుగుణంగా ఆధునీకరించాలి. సాంప్రదాయ పద్ధతుల్లోనే కాకుండా మారుతున్న కాలానికి అనుగుణంగా స్మార్ట్ హోమ్ అప్లయన్సెస్, గ్రీన్ ఎనర్జీ, ఆధునిక ప్లంబింగ్ సిస్టమ్స్‌పై యువతకు శిక్షణ ఇవ్వాలి. మన దేశంలో బ్లూ కాలర్ ఉద్యోగాల పట్ల ఉన్న సామాజిక దృక్పథం మారాలి. కార్పొరేట్ సంస్థలు ఈ విభాగాల్లో పనిచేసే వారికి మెరుగైన వేతనాలు, పిఎఫ్, ఇన్సూరెన్స్ వంటి సామాజిక భద్రతలను కల్పిస్తే యువత విదేశాల వైపు చూడటం తగ్గుతుంది.

రాబోయే దశాబ్దంలో భారతదేశం ప్రపంచంలోనే మూడో అతిపెద్ద ఆర్థిక వ్యవస్థగా అవతరించాలని లక్ష్యంగా పెట్టుకుంది. ఈ లక్ష్యం నెరవేరాలంటే కేవలం 'వైట్ కాలర్' సాఫ్ట్‌వేర్ ఉద్యోగులు మాత్రమే సరిపోరు. దేశ ఆర్థిక చక్రాలను నడిపే 'బ్లూ కాలర్' శ్రామికులు కూడా అంతే ముఖ్యం. అంతర్జాతీయ డిమాండ్‌ను తట్టుకుంటూనే, దేశీయ అవసరాలకు ఎక్కడా గండి పడకుండా చూసుకోవాల్సిన గురుతర బాధ్యత పాలకులపై ఉంది. ఇప్పటికైనా ప్రభుత్వం శ్రామిక సరఫరా గొలుసును బలోపేతం చేసే దీర్ఘకాలిక ప్రణాళికలను యుద్ధప్రాతిపదికన చేపట్టాలి. లేనిచో, చేతులు కాలాక ఆకులు పట్టుకున్న చందంగా మారుతుంది.