భారీ బ్యాట‌రీతో ప‌ని లేదు..టైర్ల‌లోనే ట్రాక్ట‌ర్ ఇంధ‌నం.. వ్య‌వ‌సాయ రంగంలో స‌రికొత్త విప్ల‌వం!

ఇన్నోవేష‌న్ అనేది రొటీన్ గా కాదు.. స‌ర్ ప్రైజింగ్ గా ఉండాలి. అలా ఉన్న‌ప్పుడే కిక్కు. అలాంటి కిక్కిచ్చే వార్త ఇది. సాధారణంగా పొలం దున్నే లేదా బ‌రువును మోసే ట్రాక్టర్ చక్రం పని కేవలం వాహనాన్ని మోయడం.. ముందుకు నడపడం మాత్రమే. కానీ జర్మనీకి చెందిన ఇంజనీర్లు ఈ చక్రాలకు ఒక వినూత్నమైన అదనపు బాధ్యతను అప్పగించారు. భారీ ట్రాక్టర్ల చక్రాల లోపల ఉండే ఖాళీ ప్రదేశాన్ని హైడ్రోజన్ ఇంధనాన్ని నిల్వ చేసే హై-ప్రెజర్ వెసెల్స్‌గా మార్చారు.`హోర్మన్ వెహికల్ ఇంజనీరింగ్` అభివృద్ధి చేసిన ఈ సాంకేతికత ద్వారా ట్రాక్టర్ బాడీలో అదనపు స్థలాన్ని ఆక్రమించకుండానే ఎక్కువ ఇంధనాన్ని నింపుకునే వీలు కలుగుతుంది.

హైడ్రోజన్ ట్రాక్టర్ల విషయంలో ప్రధాన సమస్య బరువు కాదు... పరిమాణం.. హైడ్రోజన్ ఇంధనం డీజిల్‌తో పోలిస్తే తక్కువ శక్తిని ఇస్తుంది.. అందుకే ఎక్కువ గంటలు పొలంలో పనిచేయాలంటే భారీ ట్యాంకులు అవసరమవుతాయి. ఉదాహరణకు ప్రస్తుత `ఫెండ్ట్ హెలియోస్` ప్రోటోటైప్ ట్రాక్టర్లు కేవలం 5 నుండి 8 గంటలు మాత్రమే పనిచేయగలవు. కానీ రైతులు డీజిల్ ట్రాక్టర్ల మాదిరిగా రోజంతా నిరంతరాయంగా పనిచేసే యంత్రాలను కోరుకుంటారు. ఈ లోటును పూడ్చేందుకే చక్రాలలో ఇంధన నిల్వ అనే వినూత్న ఆలోచన పుట్టింది.

హోర్మన్ కంపెనీ ప్రతినిధులు వోక్మార్ వోగెల్- స్టీఫన్ ప్రాజర్ నేతృత్వంలో సాగుతున్న ఈ ప్రాజెక్టుకు యూరోపియన్ యూనియన్ మద్దతు లభిస్తోంది. పెద్ద అగ్రికల్చర్ టైర్లలో ఉండే ఖాళీ స్థలంలో కార్బన్-ఫైబర్ రీఇన్‌ఫోర్స్డ్ ట్యాంకులను అమర్చడం ద్వారా క్యాబిన్ లేదా రూఫ్ పైన అదనపు ట్యాంకుల భారం తగ్గుతుంది. అయితే.. తిరుగుతున్న చక్రం నుండి హైడ్రోజన్ ప్రవాహాన్ని నియంత్రించడం .. ప్రెజర్ సీల్స్ నిర్వహించడం వంటి సవాళ్లను ఇంజనీర్లు సమర్థవంతంగా అధిగమించారు.

ఈ సాంకేతికతలో కేవలం ఇంధన నిల్వ మాత్రమే కాదు.. చక్రం లోపలే విద్యుత్ డ్రైవ్ సిస్టమ్‌ను కూడా అమర్చారు. అంటే... ఒకే మోడ్యులర్ యూనిట్ ఇంధనాన్ని నిల్వ చేయడంతో పాటు శక్తిని కూడా అందిస్తుంది. ఈ మోటార్ తయారీలో ఎటువంటి అరుదైన ఖనిజాలను వాడకపోవడం విశేషం. దీనివల్ల తయారీ ఖర్చు తగ్గడమే కాకుండా పర్యావరణానికి కూడా మేలు జరుగుతుంది. ఈ వ్యవస్థ వల్ల ట్రాక్టర్ల డిజైన్ మరింత సింపుల్ గా శక్తివంతంగా మారుతుంది.

భారీ బ్యాటరీల అవసరం లేకుండానే... కేవలం ఈ చక్రాల టెక్నాలజీతో హైడ్రోజన్ ట్రాక్టర్లు ఇకపై రోజంతా పొలంలో పనిచేయగలవు. డీజిల్ ఇంజన్లకు ప్రత్యామ్నాయంగా వస్తున్న ఈ గ్రీన్ టెక్నాలజీ భవిష్యత్తులో వ్యవసాయ రంగాన్ని పూర్తిగా మార్చివేస్తుందని నిపుణులు భావిస్తున్నారు. త్వరలోనే ఈ జర్మన్ ఇంజనీరింగ్ అద్భుతం ప్రపంచవ్యాప్తంగా అందుబాటులోకి రానుంది. అయితే భార‌త‌దేశంలో రైతుల‌కు ఈ టెక్నాల‌జీని వేగంగా అందుబాటులోకి తెచ్చేందుకు ప్ర‌భుత్వాలు ఎలాంటి ప్ర‌య‌త్నాలు చేస్తాయి? అన్న‌ది వేచి చూడాలి.