ఏపీ లో 43.7% ప్రజలు, తెలంగాణ లో 37.2% ప్రజలు అప్పుల్లో ఉన్నారు.. ఇవీ మన రాష్ట్రాల ఘనత

దేశవ్యాప్తంగా ప్రజలు ఆర్థిక ఇబ్బందులను ఎదుర్కొంటున్న తరుణంలో కేంద్ర గణాంకాల శాఖ తాజా సర్వే లెక్కలు తెలుగు రాష్ట్రాల పరిస్థితిని బహిర్గతం చేశాయి. ఈ నివేదిక ప్రకారం ఆంధ్రప్రదేశ్, తెలంగాణ రాష్ట్రాల ప్రజలు అత్యధికంగా అప్పుల భారంతో సతమతమవుతున్నారు. అభివృద్ధి చెందిన రాష్ట్రాలుగా పేరున్న ఈ రెండు రాష్ట్రాలు ఇప్పుడు అప్పుల ఊబిలో కూరుకుపోయి కొత్త సవాళ్లను ఎదుర్కొంటున్నాయి.

* అప్పుల భారంలో అగ్రస్థానం

2020-21 ఆర్థిక సంవత్సరానికి సంబంధించిన సర్వే ప్రకారం, ఆంధ్రప్రదేశ్‌ (ఏపీ ) రాష్ట్రంలో ఏకంగా 43.7% మంది ప్రజలు అప్పుల్లో ఉన్నారు. ఈ సంఖ్య దేశంలోనే అత్యధికం కావడం గమనార్హం. ఆంధ్రప్రదేశ్ ఈ విషయంలో దేశంలోనే మొదటి స్థానంలో నిలిచింది. మరోవైపు, తెలంగాణ రాష్ట్రంలో 37.2% మంది ప్రజలు అప్పుల్లో చిక్కుకున్నారని లెక్కలు చెబుతున్నాయి. దీంతో తెలుగు రాష్ట్రాలు వరుసగా మొదటి, రెండో స్థానాల్లో నిలిచాయి. 

* ఫైనాన్షియల్ ఇంక్లూజన్‌లో ఏపీ మెరుగ్గా ఉన్నా...

అప్పుల భారం ఉన్నప్పటికీ, ఆర్థిక సేవలు (ఫైనాన్షియల్ ఇంక్లూజన్) వినియోగంలో ఆంధ్రప్రదేశ్ రాష్ట్రం మెరుగైన ప్రగతి సాధించింది. 15 ఏళ్లకు పైబడిన వారిలో 92.3% మంది బ్యాంకింగ్ వ్యవస్థలో భాగస్వాములయ్యారు. ఫైనాన్షియల్ ఇంక్లూజన్ రేటులో ఆంధ్రప్రదేశ్ దేశవ్యాప్తంగా రెండో స్థానంలో నిలిచింది.

*ఇదే సమయంలో తెలంగాణ రాష్ట్రం 86.5%తో 14వ స్థానంలో నిలిచింది.

దీని అర్థం ఏమిటంటే ప్రజలకు ఆర్థిక సేవలు అందుబాటులో ఉన్నా, అప్పుల భారం నుంచి బయటపడలేకపోతున్నారనే సంకేతం స్పష్టమవుతోంది. బ్యాంకింగ్ వ్యవస్థ విస్తరించినా, ప్రజలు అప్పులపై ఆధారపడాల్సిన పరిస్థితి కొనసాగుతోందని ఈ గణాంకాలు సూచిస్తున్నాయి.

* దక్షిణాది vs ఈశాన్య రాష్ట్రాల పోలిక

దక్షిణాది రాష్ట్రాల్లో సగటున 92.1% మంది ఫైనాన్షియల్ ఇంక్లూజన్ పరిధిలో ఉన్నప్పటికీ, 31.8% మంది అప్పుల్లో ఉన్నారు. ఆర్థిక సేవలు అందుబాటులో ఉన్నా, ప్రజల ఆదాయాలు, ఖర్చులు సమన్వయం కావడంలో సమస్యలు ఉన్నాయనే విషయం ఇక్కడ స్పష్టమవుతోంది.

దీనికి విరుద్ధంగా, ఈశాన్య రాష్ట్రాల్లో 80.2% మంది ఫైనాన్షియల్ ఇంక్లూజన్ పరిధిలో ఉన్నప్పటికీ, కేవలం 7.4% మందికే అప్పులు ఉన్నట్లు సర్వే చెబుతోంది. అంటే ఆర్థిక సేవలు తక్కువగా ఉన్నా, ప్రజలు అప్పులలో చిక్కుకోకుండా జాగ్రత్తగా వ్యవహరిస్తున్నారని అర్థం.

* కుటుంబ పరిమాణం, సామాజిక వర్గాల ప్రభావం

సర్వేలో కొన్ని ఆసక్తికర అంశాలు కూడా వెల్లడయ్యాయి. ఎక్కువమంది సభ్యులు ఉన్న కుటుంబాలపై అప్పుల భారం తక్కువగా ఉండగా, తక్కువమంది సభ్యులు ఉన్న కుటుంబాలు ఎక్కువగా అప్పుల్లో ఉన్నట్లు తేలింది. ఓబీసీల్లో 16.6% మంది, గిరిజనుల్లో 11% మంది అప్పుల్లో ఉన్నారు. పురుషులలో 89.8%, మహిళల్లో 84.5% మంది మాత్రమే ఆర్థిక సేవలను వినియోగిస్తున్నారని గణాంకాలు చెబుతున్నాయి.

* సవాళ్లు, పరిష్కారాలు

ఆర్థిక సేవలు అందుబాటులోకి వచ్చినప్పటికీ, ప్రజల ఆదాయాలు పెరగకపోవడం, జీవన వ్యయం, ఖర్చులు పెరగడం వల్ల అప్పులపై ఆధారపడే పరిస్థితి ఏర్పడింది. ఈ ధోరణి తెలుగు రాష్ట్రాల్లో మరింత స్పష్టంగా కనబడుతోంది.

బ్యాంకింగ్ వ్యవస్థ విస్తరించినప్పటికీ, ప్రజల ఆర్థిక స్థితి మెరుగుపడాలంటే... ఆర్థిక అవగాహన పెంపు, ఆదాయ వృద్ధి పట్ల ప్రభుత్వాలు దృష్టి సారించాల్సిన అవసరం ఉంది. లేకపోతే, అప్పుల చక్రం ఆగే అవకాశం కనిపించడం లేదు. తెలుగు రాష్ట్రాలు అభివృద్ధిలో ముందంజలో ఉన్నా, ఈ అప్పుల భారం ప్రజల సుస్థిర ఆర్థిక ప్రగతికి పెద్ద సవాలుగా పరిణమించే ప్రమాదం ఉంది.