ట్రంప్ పై బిగ్ బాంబ్ పోస్ట్.. ఏమైందో కానీ డిలీట్.. మస్క్ మరో దుమారం

అమెరికా అధ్యక్షుడు డొనాల్డ్‌ ట్రంప్‌ , ప్రపంచ కుబేరుడు ఎలాన్‌ మస్క్‌ మధ్య బహిరంగ విమర్శలు పెరుగుతున్న నేపథ్యంలో, ట్రంప్‌పై తీవ్ర ఆరోపణలు చేస్తూ మస్క్‌ చేసిన ఒక పోస్ట్‌ తాజాగా కలకలం రేపింది. "అతిపెద్ద బాంబు పేల్చాల్సిన సమయం ఆసన్నమైంది" అంటూ మస్క్‌ కొన్ని గంటల క్రితం ఒక పోస్ట్‌ చేశారు. అందులో సెక్స్‌ కుంభకోణంలో నిందితుడైన ఎప్‌స్టైన్‌కు సంబంధించిన దర్యాప్తు ఫైళ్లలో ట్రంప్‌ పేరు కూడా ఉందని ఆరోపించారు. అందువల్లే దర్యాప్తులో వెల్లడైన విషయాలను ఇప్పటివరకు బహిరంగంగా బయటపెట్టలేదని విమర్శించారు. భవిష్యత్తులో దీనికి సంబంధించిన నిజానిజాలు బయటపడతాయని కూడా ఆయన పేర్కొన్నారు. ఈ పోస్ట్‌ తీవ్ర సంచలనం సృష్టించినప్పటికీ, తాజాగా ఆయన దాన్ని తొలగించారు. ఇది ఇద్దరి మధ్య సయోధ్యకు సూచనగా కొందరు భావిస్తున్నారు.

- శాంతికి సంకేతమా?

మస్క్‌ తన పోస్ట్‌ను తొలగించిన తర్వాత, ట్రంప్‌తో శాంతి కుదుర్చుకోవాలని అమెరికన్ ఫండ్ మేనేజర్ బిల్‌ అక్‌మాన్ మస్క్‌ను కోరారు. ఈ ఇద్దరికీ మద్దతుగా మాట్లాడిన ఆయన "మనం విడిగా ఉండటం కంటే కలిసి ఉంటేనే బలంగా ఉంటాం" అని పోస్ట్ చేశారు. దీనికి మస్క్‌ "మీరు చెప్పింది తప్పుకాదు" అని బదులివ్వడం గమనార్హం. వైట్‌హౌస్ ప్రతినిధులు సైతం అధ్యక్షుడు ట్రంప్‌ మస్క్‌పై బహిరంగ విమర్శలు చేయకుండా కృషి చేస్తున్నారని ఒక మీడియా కథనం పేర్కొంది. ఈ పరిణామాలు ట్రంప్‌, మస్క్‌ల మధ్య సంబంధాలు మెరుగుపడే అవకాశం ఉందని సూచిస్తున్నాయి.

- ట్రంప్‌ స్పందన – కంపెనీ షేర్లపై ప్రభావం

ఇదిలా ఉంటే, ఈ విభేదాలపై అధ్యక్షుడు ట్రంప్‌ను మీడియా ప్రశ్నించగా, ఆయన స్పందన ఆసక్తికరంగా ఉంది. "నేను చాలా బిజీగా ఉన్నా. చైనా, రష్యా, ఇరాన్‌ సంబంధిత విషయాలపై పని చేస్తున్నా. నాకు చాలా పనులున్నాయి. ఎలాన్‌ మస్క్‌ గురించి ఇప్పుడు ఆలోచించడం లేదు. ఆయన బాగుండాలని మాత్రమే కోరుకుంటున్నా. మేం అన్ని విషయాలను పరిగణనలోకి తీసుకుంటున్నాం. ఆయన (మస్క్‌) చాలా సబ్సిడీలు పొందారు. పెద్ద మొత్తంలో డబ్బులు అందుకున్నారు. దాన్ని పరిశీలించాల్సిన అవసరం ఉంది. అంతా పారదర్శకంగానే జరిగిందా? అనేది చూడాలి. మస్క్‌ లేకపోయినా మా ప్రభుత్వం కొనసాగుతుంది. ఎవరు లేకపోయినా అమెరికాకు ఏం కాదు.. ఒక్క నేను తప్ప" అని బదులిచ్చారు. ఈ పరిణామాలు మస్క్‌ కంపెనీపై తీవ్ర ప్రభావం చూపించాయి. ఈ సంస్థ షేర్లు దారుణంగా పతనమైన సంగతి తెలిసిందే.

మొత్తంగా, ట్రంప్‌, మస్క్‌ల మధ్య ఉన్న విభేదాలు, మస్క్‌ పోస్ట్‌ను తొలగించడం, ఇతరుల జోక్యం ఈ మొత్తం వ్యవహారం అమెరికా రాజకీయ, ఆర్థిక వర్గాల్లో చర్చనీయాంశంగా మారింది. వారిద్దరి మధ్య భవిష్యత్తు సంబంధాలు ఎలా ఉంటాయో వేచి చూడాలి.