దుబాయ్ రియల్ ఎస్టేట్ కుదేలు.. 50 శాతం పడిపోయిన విక్రయాలు.. భారత్ వైపు ఇన్వెస్టర్లు!

దశాబ్ద కాలంగా ప్రపంచ ధనవంతులకు.. పెట్టుబడిదారులకు "స్వర్గధామం"గా విరాజిల్లిన దుబాయ్ రియల్ ఎస్టేట్ మార్కెట్ అనూహ్యంగా సంక్షోభంలో కూరుకుపోయింది. పశ్చిమాసియాలో నెలకొన్న తీవ్ర భౌగోళిక రాజకీయ ఉద్రిక్తతలు.. యుద్ధ వాతావరణం అంతర్జాతీయ ఆర్థిక వ్యవస్థను కుదిపేస్తున్నాయి. ఈ ప్రభావం దుబాయ్ ప్రాపర్టీ మార్కెట్‌పై స్పష్టంగా కనిపిస్తోంది. 2026 మార్చి నాటికి అందిన గణాంకాల ప్రకారం.. దుబాయ్‌లో ప్రాపర్టీ విక్రయాలు దాదాపు 49 శాతం నుంచి 50 శాతం వరకు పడిపోవడం ప్రపంచ మార్కెట్లను విస్మయానికి గురిచేస్తోంది.

కుదేలైన "సేఫ్ హెవెన్" నమ్మకం

గత ఐదేళ్లుగా దుబాయ్ రియల్ ఎస్టేట్ అద్భుతమైన వృద్ధిని నమోదు చేసింది. పన్ను రాయితీలు, గోల్డెన్ వీసా వంటి వెసులుబాట్లు ప్రపంచవ్యాప్తంగా ఉన్న ఇన్వెస్టర్లను ఆకర్షించాయి. అయితే ప్రస్తుత ప్రాంతీయ భద్రతా ఆందోళనలు ఈ నమ్మకాన్ని దెబ్బతీశాయి. దుబాయ్‌ను అత్యంత సురక్షితమైన ప్రాంతంగా భావించిన విదేశీయులు.. ఇప్పుడు తమ పెట్టుబడుల భద్రతపై ఆందోళన చెందుతున్నారు.

ముఖ్యంగా దుబాయ్ మార్కెట్‌లో కీలక పాత్ర పోషించే భారతీయ పెట్టుబడిదారులు ఇప్పుడు పునరాలోచనలో పడ్డారు. దుబాయ్ విదేశీ ఇన్వెస్టర్లలో భారతీయుల వాటా సుమారు 20-22 శాతం. యుద్ధ మేఘాలు కమ్ముకోవడంతో తమ మూలధనాన్ని సురక్షిత ప్రాంతాలకు మళ్లించే ప్రయత్నంలో ఎన్నారైలు, సంపన్న భారతీయులు ఉన్నారు.

భారత్‌కు వరంగా మారిన సంక్షోభం

దుబాయ్‌లో నెలకొన్న అనిశ్చితి భారత రియల్ ఎస్టేట్ రంగానికి కొత్త ఊపిరి పోస్తోంది. "హై రిటర్న్స్ కంటే స్థిరత్వం ముఖ్యం" అని భావిస్తున్న ఇన్వెస్టర్లు ఇప్పుడు స్వదేశం వైపు చూస్తున్నారు. ఫలితంగా హైదరాబాద్, బెంగళూరు, ముంబై వంటి నగరాల్లో లగ్జరీ హౌసింగ్ సెగ్మెంట్‌కు డిమాండ్ ఒక్కసారిగా పెరిగింది.

భాగ్యనగరంలోని పశ్చిమ కారిడార్ (గచ్చిబౌలి, కోకాపేట, తెల్లాపూర్) అంతర్జాతీయ ప్రమాణాలతో కూడిన ప్రాజెక్టులకు నిలయంగా మారింది. రాజకీయ స్థిరత్వం, మెరుగైన మౌలిక సదుపాయాల వల్ల ఎన్నారైల మొదటి ఛాయిస్‌గా హైదరాబాద్ నిలుస్తోంది. ఐటీ హబ్ బెంగళూరులోని ప్రీమియం విల్లా ప్రాజెక్టులు, ముంబైలోని హై-ఎండ్ అపార్ట్‌మెంట్‌లకు విదేశీ పెట్టుబడులు పోటెత్తుతున్నాయి.

మార్కెట్ గణాంకాలు.. ఆందోళనకర అంశాలు

దుబాయ్ మార్కెట్‌లో అద్దె రాబడులు ఇప్పటికీ ఆశాజనకంగానే ఉన్నప్పటికీ, ఆస్తి విలువ పడిపోవడం ఇన్వెస్టర్లను భయపెడుతోంది. "కేవలం అద్దె కోసం ప్రాణాలను, ఆస్తులను పణంగా పెట్టలేం" అన్నది సగటు ఇన్వెస్టర్ అభిప్రాయంగా కనిపిస్తోంది. దుబాయ్‌లోని ప్రముఖ రియల్ ఎస్టేట్ డెవలపర్ల షేర్లు స్టాక్ మార్కెట్‌లో భారీగా క్షీణించాయి. విక్రయాల విలువ సగానికి పడిపోవడంతో మార్కెట్‌లో నగదు లభ్యత కొరత ఏర్పడింది. ఇది నిర్మాణంలో ఉన్న ప్రాజెక్టుల పురోగతిపై కూడా ప్రభావం చూపే అవకాశం ఉంది.

విశ్లేషకుల అభిప్రాయం ప్రకారం.. పశ్చిమాసియాలో ఉద్రిక్తతలు త్వరగా సర్దుమణగకపోతే దుబాయ్ మార్కెట్ కోలుకోవడానికి చాలా సమయం పడుతుంది. అదే సమయంలో భారతదేశం ప్రపంచంలోనే అత్యంత వేగంగా ఎదుగుతున్న ఆర్థిక వ్యవస్థగా ఉండటం, ఇక్కడ రియల్ ఎస్టేట్ నియంత్రణ చట్టాలు (రెరా) పటిష్టంగా ఉండటం పెట్టుబడిదారులకు కొండంత అండగా మారుతోంది.

ముఖ్యంగా హైదరాబాద్ వంటి నగరాల్లో భూముల ధరలు, లగ్జరీ ఫ్లాట్ల ధరలు రాబోయే రోజుల్లో కొత్త రికార్డులను సృష్టించే అవకాశం ఉందని మార్కెట్ నిపుణులు అంచనా వేస్తున్నారు. వెరసి, ఒక దేశంలోని భౌగోళిక రాజకీయ సంక్షోభం, మరో దేశ రియల్ ఎస్టేట్ రంగానికి "గోల్డెన్ ఛాన్స్"గా మారుతోంది.