ప్రపంచానికి ఊరట.. ఇరాన్‌తో డీల్.. ట్రంప్ కీలక ప్రకటన

అమెరికా-ఇరాన్ మధ్య దీర్ఘకాలంగా కొనసాగుతున్న తీవ్ర ఉద్రిక్తతల నడుమ ఒక ఊరటనిచ్చే పరిణామం చోటుచేసుకుంది. ఇరాన్‌పై భారీ స్థాయిలో సైనిక దాడి చేసేందుకు అమెరికా సైన్యం సర్వసిద్ధంగా ఉన్నప్పటికీ ఆ ప్రణాళికలను తాత్కాలికంగా నిలిపివేస్తున్నట్లు అమెరికా అధ్యక్షుడు డొనాల్డ్ ట్రంప్ సంచలన ప్రకటన చేశారు. ఇరు దేశాల నడుమ శాంతి ఒప్పందం కుదిరే సంకేతాలు స్పష్టంగా కనిపిస్తుండటమే ఈ నిర్ణయానికి ప్రధాన కారణమని తెలుస్తోంది.

'ట్రూత్ సోషల్' వేదికగా ట్రంప్ కీలక వ్యాఖ్యలు

అధ్యక్షుడు ట్రంప్ తన సోషల్ మీడియా ప్లాట్‌ఫామ్ 'ట్రూత్ సోషల్' వేదికగా ఈ వివరాలను వెల్లడించారు. పశ్చిమాసియాలోని పలు మిత్రదేశాలతో పాటు ఇరాన్ కూడా దాడులను నిలిపివేయాలని అమెరికాను కోరినట్లు ఆయన తెలిపారు. "ప్రపంచ ప్రయోజనాలు, ప్రాంతీయ శాంతిభద్రతలు.. ఇరాన్ మనుగడను దృష్టిలో ఉంచుకుని సైనిక చర్యలను తాత్కాలికంగా వాయిదా వేస్తున్నాం. యుద్ధం కంటే చర్చల ద్వారా లభించే పరిష్కారమే ఎల్లప్పుడూ శ్రేయస్కరం" అని ట్రంప్ పేర్కొన్నారు. ఈ నిర్ణయానికి ఇజ్రాయెల్ ప్రధాని బెంజమిన్ నెతన్యాహు కూడా మద్దతు తెలిపారని ట్రంప్ వ్యాఖ్యానించారు. అయితే దీనిపై ఇజ్రాయెల్ ప్రభుత్వం నుండి ఇప్పటివరకు ఎటువంటి అధికారిక ప్రకటన వెలువడలేదు.

హెచ్చరికలు.. క్లిష్టమైన పరిస్థితులు

ఒకవైపు చర్చల మాటలు వినిపిస్తున్నప్పటికీ ప్రాంతీయంగా భయాందోళనలు పూర్తిగా తొలగిపోలేదు. ఈ వారాంతంలో తమపై ఎలాంటి సైనిక చర్యలకు దిగొద్దని ఇరాన్, అమెరికాను తీవ్రంగా హెచ్చరించింది. ఒకవేళ దాడులు జరిగితే ఊహించని రీతిలో ప్రతీకారం ఉంటుందని స్పష్టం చేసింది. సౌదీ అరేబియా, యూఏఈలోని కీలక చమురు క్షేత్రాలు ఖతార్, ఇజ్రాయెల్ ప్రధాన సహజ వాయువు (గ్యాస్) ప్రాజెక్టులను లక్ష్యంగా చేసుకుంటామని హెచ్చరించింది.

మధ్యవర్తిత్వంలో ఖతార్, పాకిస్థాన్

ఈ ఉద్రిక్తతలను తగ్గించి ఇరు దేశాలను చర్చల మేజాపైకి తీసుకురావడానికి అంతర్జాతీయంగా మధ్యవర్తిత్వ ప్రయత్నాలు వేగవంతమయ్యాయి. ఖతార్ , పాకిస్థాన్ దేశాలు విడివిడిగా అమెరికా, ఇరాన్ ఉన్నతాధికారులతో దౌత్యపరమైన చర్చలు జరుపుతున్నట్లు సమాచారం.

ఆశలు రేపుతున్న ప్రతిపాదిత అంశాలు

ఈ ఒప్పందం గనుక కార్యరూపం దాల్చితే పశ్చిమాసియాలో శాంతి పునరుద్ధరణకు బలమైన పునాది పడుతుంది. హార్ముజ్ జలసంధి వాణిజ్య నౌకల రవాణాకు దీనిని పూర్తిగా పునరుద్ధరించడం... ఇరాన్ తన వివాదాస్పద అణు కార్యక్రమాలను నిలిపివేయడం. అంతర్జాతీయ చమురు మార్కెట్‌లో ధరలు స్థిరపడటంతో పాటు ప్రపంచ ఆర్థిక వ్యవస్థపై సానుకూల ప్రభావం పడుతుంది.

ప్రస్తుతం ప్రపంచ దేశాల దృష్టి మొత్తం ఈ ప్రతిపాదిత ఒప్పందంపైనే నెలకొంది. చర్చలు విజయవంతమై యుద్ధ మేఘాలు తొలగిపోతాయో లేక ఉద్రిక్తతలు మరో మలుపు తిరుగుతాయో వేచి చూడాల్సి ఉంది.