కుప్పకూలిన ఢిల్లీ విమానాశ్రయం.. 800 పైగా విమానాలు ఆలస్యం!

ఢిల్లీలోని ఇందిరా గాంధీ అంతర్జాతీయ విమానాశ్రయం (IGIA) శుక్రవారం రోజున ఒక పెను సాంకేతిక సమస్యతో అక్షరాలా స్తంభించిపోయింది. ఎయిర్ ట్రాఫిక్ కంట్రోల్ (ATC) వ్యవస్థలో తలెత్తిన ప్రధాన లోపం కారణంగా 800కి పైగా విమానాల సర్వీసులు ఆలస్యమయ్యాయి. ఈ అనూహ్య అంతరాయం దేశవ్యాప్తంగా విమాన ప్రయాణాలను ప్రభావితం చేయగా, వేలాది మంది ప్రయాణికులు గంటల తరబడి విమానాశ్రయ టెర్మినల్స్‌లో వేచి ఉండాల్సి వచ్చింది.

*సమస్యకు మూలం: AMSS వైఫల్యం

విమాన సర్వీసుల అంతరాయానికి అసలు కారణం Automatic Message Switching System (AMSS) అనే కీలక భాగంలో తలెత్తిన లోపమేనని అధికారులు స్పష్టం చేశారు. ఈ AMSS వ్యవస్థ ATCకి విమానాల యొక్క ఫ్లైట్ ప్లాన్ డేటాను పంపడంలో.. వాటిని ట్రాక్ చేయడంలో అత్యంత ముఖ్యమైన పాత్ర పోషిస్తుంది.

శుక్రవారం ఉదయం ఈ వ్యవస్థ ఆకస్మాత్తుగా పనిచేయడం ఆపేయడంతో, ATC సిబ్బంది అన్ని విమాన వివరాలను మానవీయంగా (Manual) నిర్వహించాల్సిన పరిస్థితి ఏర్పడింది. ఈ మాన్యువల్ ఆపరేషన్ కారణంగా విమానాల టేకాఫ్.. ల్యాండింగ్‌లలో భారీ ఆలస్యం జరిగింది.

* అత్యవసర పునరుద్ధరణ చర్యలు

సమస్య తలెత్తిన వెంటనే ఎయిర్‌పోర్ట్స్ అథారిటీ ఆఫ్ ఇండియా (AAI) ఇంజినీర్లు , సాంకేతిక నిపుణుల బృందం రంగంలోకి దిగింది. వీరికి ఎలక్ట్రానిక్స్ కార్పొరేషన్ ఆఫ్ ఇండియా లిమిటెడ్ (ECIL) నిపుణులు సహకరించారు. రాత్రంతా అవిశ్రాంతంగా శ్రమించిన అనంతరం, సాయంత్రం నాటికి కీలకమైన AMSS వ్యవస్థను పునరుద్ధరించగలిగారు.

అయినప్పటికీ, భారీగా పేరుకుపోయిన విమానాల బ్యాక్‌లాగ్‌ను క్లియర్ చేయడానికి మరికొన్ని గంటల సమయం పట్టింది. ఈ ప్రభావం కేవలం ఢిల్లీకే పరిమితం కాలేదు. ముంబై, జైపూర్, లక్నో, చండీగఢ్, అమృత్‌సర్ వంటి ప్రధాన నగరాల విమానాశ్రయాల్లోనూ విమాన సర్వీసులు ఆలస్యమయ్యాయి.

వాతావరణ సమాచారం అందించే వ్యవస్థకు సైతం అంతరాయం

AMSS లోపంతో పాటు, పైలట్లకు రన్‌వే పరిస్థితులు, ముఖ్యమైన వాతావరణ వివరాలు అందించే Automatic Terminal Information System (ATIS) కూడా ఈ సమస్యతో ప్రభావితమైంది. ఈ వ్యవస్థ కూడా పనిచేయకపోవడంతో, పైలట్లకు సమాచారం అందించడం, విమానాలకు క్లియరెన్స్ ఇవ్వడం వంటి ప్రక్రియలు మరింత ఆలస్యమై, గందరగోళానికి దారితీసింది.

విమానాశ్రయంలో తీవ్ర ఇబ్బందులు ఎదుర్కొన్న ప్రయాణికులకు ఇండిగో, ఎయిర్ ఇండియా, స్పైస్‌జెట్ వంటి ప్రధాన ఎయిర్‌లైన్స్‌లు విజ్ఞప్తి చేస్తూ, విమానాశ్రయానికి బయలుదేరే ముందు తమ ఫ్లైట్ స్టేటస్‌ను తప్పనిసరిగా ఒకసారి తనిఖీ చేయాలని సూచించాయి.

*పూర్తి స్థాయి విచారణకు ఆదేశం

శుక్రవారం రాత్రి నాటికి పరిస్థితి కొంతవరకు అదుపులోకి వచ్చినప్పటికీ, వారాంతం వరకూ కొన్ని ఆలస్యాలు కొనసాగే అవకాశం ఉందని అధికారులు తెలియజేశారు. AAI ఈ మొత్తం ఘటనపై పూర్తి స్థాయి విచారణకు ఆదేశించింది. భవిష్యత్తులో ఇలాంటి సాంకేతిక లోపాలు మళ్లీ రాకుండా పటిష్టమైన చర్యలు తీసుకుంటామని AAI హామీ ఇచ్చింది.