'ఏడు ఇటుకల' మిస్టరీ: ఆరు హత్యలా? ఏడు హత్యలా? బాలిక తండ్రి మరణం వెనుక కూడా రాజ్‌కుమారేనా?

రంగారెడ్డి జిల్లా షాబాద్ మండలం దైవాలగూడలో జరిగిన సామూహిక హత్యలు తెలంగాణ చరిత్రలోనే అత్యంత భయానక నేరాల్లో ఒకటిగా నిలిచిపోయాయి. మొదట ఇది ఆరు హత్యల కేసుగా నమోదైనా... ఇప్పుడు గ్రామంలో వినిపిస్తున్న మాట మాత్రం వేరే కథ చెబుతోంది. "ఇవి ఆరు కాదు... ఏడు హత్యలు" అంటున్నారు స్థానికులు.

ఆ అనుమానానికి బలం చేకూర్చిన అంశం... హత్య జరిగిన ప్రదేశంలో నిందితుడు పేర్చి పెట్టిన ఏడు ఇటుకలు. ఆ ఏడో ఇటుక ఎవరి కోసం? గత ఏడాది అనుమానాస్పదంగా చనిపోయిన బాలిక తండ్రి మరణానికి కూడా రాజ్‌కుమారే కారణమా? ఇప్పుడు ఇదే ప్రశ్న గ్రామాన్ని, పోలీసులను వెంటాడుతోంది.

ఒకే రాత్రిలో రెండు కుటుంబాల అంతం

పోక్సో కేసులో తనపై ఫిర్యాదు చేసిన కుటుంబంపై నిందితుడు రాజ్‌కుమార్ పగను గుండెల్లో పెట్టుకున్నాడు. బెయిల్‌పై బయటకు వచ్చిన తర్వాత ప్రతీకారం తీర్చుకోవడమే రోజుల తరబడి ప్లాన్ వేసినట్లు తెలుస్తోంది. అర్ధరాత్రి వేళ ముందుగా బాధితురాలి ఇంట్లోకి చొరబడ్డాడు. గాఢ నిద్రలో ఉన్న బాలిక తల్లి, నానమ్మను కత్తితో నరికి చంపేశాడు. అక్కడితో ఆగకుండా 17 ఏళ్ల బాలికను బలవంతంగా తీసుకెళ్లి నాగర్‌కుంట చెరువు వద్ద హత్య చేశాడు. ఆ తర్వాత నేరుగా తన ఇంటికి చేరుకుని భార్య సరిత, మూడేళ్ల కుమారుడు, రెండేళ్ల కుమార్తెను కూడా అత్యంత కిరాతకంగా చంపేశాడు. మొత్తం ఆరుగురు ప్రాణాలు క్షణాల్లో బలి అయ్యాయి. ఘాతుకం అనంతరం తన తల్లిదండ్రులకు ఫోన్ చేసి... "ఆరుగురిని చంపేశాను... నేనూ చనిపోతున్నాను" అని చెప్పి పరారయ్యాడు.

కానీ గ్రామం చెబుతున్న కథ వేరు... ఏడో హత్య నిజమేనా?

స్థానికుల మాటల్లో మాత్రం ఈ కేసు ఇక్కడితో ముగియదు. వారి అనుమానం ప్రకారం... గత ఏడాది బాధిత బాలిక తండ్రి మల్లేష్ ఆకస్మిక మరణం కూడా సహజం కాదట. మల్లేష్‌కు మద్యం తాగే అలవాటు ఉండేది. ఆ కారణంగా ఆయన మరణాన్ని అందరూ సహజంగానే భావించారు. కానీ తర్వాత జరిగిన పరిణామాలు చూస్తే... ఆయన మరణం వెనుక కూడా రాజ్‌కుమార్ ఉండొచ్చన్న అనుమానాలు వ్యక్తమవుతున్నాయి. ఈ అనుమానానికి కారణం... రాజ్‌కుమార్ స్వయంగా చేసిన బెదిరింపులేనని కుటుంబ సభ్యులు చెబుతున్నారు.

"మీ ఇంటి పెద్దను చంపాను..."

బాలికను వేధించడం తట్టుకోలేక కుటుంబ సభ్యులు తీవ్రంగా అభ్యంతరం చెప్పారు. ఒకసారి కాలేజీ వద్ద బాలిక చేయి పట్టుకుని లాగడంతో ఆమె తల్లి అడ్డుకుంది. ఆ సమయంలో రాజ్‌కుమార్ చేసిన హెచ్చరిక ఇప్పుడు కేసులో కీలకంగా మారింది. "మీ ఇంటి పెద్దను చంపినట్టే... మీ అందరినీ చంపేస్తా" అని అప్పుడే బెదిరించాడని కుటుంబ సభ్యులు చెబుతున్నారు. అప్పుడు వరకు మల్లేష్ మరణాన్ని సహజంగానే భావించిన కుటుంబానికి... ఈ మాటలతో అనుమానం మొదలైంది.

పోక్సో కేసు... ప్రతీకారానికి బీజం

మే 16న రాజ్‌కుమార్‌పై పోక్సో కేసు నమోదైంది. అప్పటి నుంచి అతడు పరారీలో ఉన్నాడు. అనంతరం బెయిల్ తెచ్చుకుని సుమారు 15 రోజుల క్రితం గ్రామానికి వచ్చాడు. అయితే బయటకు మాత్రం చాలా మంచివాడిలా నటించాడని గ్రామస్థులు చెబుతున్నారు. ఎవరితోనూ గొడవపడలేదు.. నవ్వుతూ మాట్లాడాడు. కానీ లోపల మాత్రం ప్రతీకారం కోసం ప్రతి అడుగు ప్లాన్ చేశాడని ఇప్పుడు అందరూ అనుమానిస్తున్నారు.

తన పిల్లల్ని కూడా బలి ఇవ్వాలని ముందే నిర్ణయించుకున్నాడా?

రాజ్‌కుమార్ ఇంట్లో జరిగిన మరో సంఘటన ఇప్పుడు చర్చనీయాంశమైంది. హత్యలకు రెండు రోజుల ముందు అతని చిన్న కుమారుడు ఒక ఉంగరం మింగేశాడు. వెంటనే ఆసుపత్రికి తీసుకెళ్లాలని కుటుంబ సభ్యులు చెప్పినా... రాజ్‌కుమార్ పట్టించుకోలేదట. సాధారణ తండ్రి అయితే వెంటనే ఆసుపత్రికి పరుగెత్తేవాడు, కానీ అతను అలా చేయలేదు. అందుకే... అప్పటికే తన కుటుంబాన్ని కూడా చంపేయాలని నిర్ణయించుకున్నాడని బంధువులు అనుమానిస్తున్నారు.

భార్యపై అమానుష వేధింపులు

రాజ్‌కుమార్ ప్రవర్తన పెళ్లికి ముందే వివాదాస్పదంగా ఉండేదని గ్రామస్థులు చెబుతున్నారు. సరితకు మరో సంబంధం వచ్చినా... ఆత్మహత్య చేసుకుంటానని బెదిరించి పెళ్లి చేసుకున్నాడట. పెళ్లి తర్వాత కూడా ఆమెను "అందంగా లేవు... నిన్ను చేసుకుని తప్పు చేశాను" అంటూ మానసికంగా, శారీరకంగా వేధించేవాడని కుటుంబ సభ్యులు చెబుతున్నారు. సరితకు విడాకులు తీసుకుని రావాలని ఆమె కుటుంబం ఎన్నిసార్లో చెప్పినా... "మారతాడు" అనే ఆశతో ఆ కుటుంబం ఎదురు చూసింది. చివరకు అదే ఆమె ప్రాణాలు తీసింది.

స్నేహితుడి ఇంటిపైనే కన్ను

బాధిత బాలిక కుటుంబంతో రాజ్‌కుమార్‌కు మొదట మంచి స్నేహం ఉండేదట. బాలిక తండ్రితో కలిసి తిరిగేవాడు. ఆ పరిచయంతోనే బాలికపై కన్నేసి, వేధించడం మొదలుపెట్టాడు. కుటుంబం హెచ్చరించడంతో... వారి ఇంటికి వెళ్లకుండా ఆపేశారు. అయితే గ్రామస్థుల ఆరోపణల ప్రకారం... వారి ఇంటి సీసీటీవీ కెమెరాలను కూడా తన మొబైల్‌కు కనెక్ట్ చేసుకుని ఎవరు వస్తున్నారు... ఎవరు వెళ్తున్నారు అన్నది గమనించేవాడట. ఈ ఆరోపణలను పోలీసులు ఇంకా అధికారికంగా ధృవీకరించలేదు.

ఏడు ఇటుకల మిస్టరీ... అసలు అర్థమేంటి?

ఈ కేసులో అత్యంత సంచలన అంశం... నాగర్‌కుంట చెరువు వద్ద కనిపించిన ఏడు ఇటుకలు. బాలికను హత్య చేసిన ప్రదేశంలో ఒకదానిపై ఒకటి క్రమపద్ధతిలో ఏడు ఇటుకలను పేర్చి ఉంచినట్లు పోలీసులు గుర్తించారు. ఇది క్షుద్రపూజలా? మూఢనమ్మకమా? లేక తాను చేసిన హత్యలకు ప్రతీకగా పెట్టాడా? లేదంటే... గ్రామస్థులు చెబుతున్నట్లుగా ఏడో హత్యకు సంకేతమా? అన్నది అనుమానంగా మారింది. ఇది ఇప్పుడు దర్యాప్తులో అత్యంత కీలకమైన మిస్టరీగా మారింది. మల్లేష్ మరణానికి, ప్రస్తుత హత్యలతో సంబంధం ఉందా? అనే అంశం దర్యాప్తులో తేలాల్సి ఉంది.

పోలీసులపై తీవ్ర ఆరోపణలు

బాధిత కుటుంబ సభ్యులు పోలీసులపైనా తీవ్ర ఆరోపణలు చేస్తున్నారు. మే 16న పోక్సో ఫిర్యాదు చేసినప్పటికీ... నిందితుడిపై కఠిన చర్యలు తీసుకోలేదని అంటున్నారు. బాలిక మేనమామ సురేష్ ఆవేదన వ్యక్తం చేస్తూ "పోలీసులు మా ఫిర్యాదును సీరియస్‌గా తీసుకుని ఉండి ఉంటే... ఈ రోజు ఆరుగురు బతికి ఉండేవారు" అని ఆరోపించారు. గ్రామస్థులు కూడా పోలీసుల నిర్లక్ష్యమే ఈ ఘోరానికి కారణమంటూ ఆందోళన చేపట్టారు.

రాజ్ కుమార్ పై నమోదు చేసిన ఎఫ్ఐఆర్ లో సంచలన విషయాలు వెలుగులోకి వస్తున్నాయి. గతంలో బాలిక తండ్రిని చంపింది కూడా రాజ్ కుమార్ యేనా? అన్న అనుమానాలు వస్తున్నాయి. రాజ్ కుమార్ ఆ బాలికను 6 నెలలుగా వేధిస్తున్నాడు. కాలేజీకి వెళ్లే సమయంలోనూ వేధించాడు. దీంతో రాజ్ కుమార్ భయంతో కాలేజీకి కూడా బాలిక వెళ్లడం లేదు. పరీక్షల సమయంలో బాలిక బయటకు వచ్చినా రాజ్ కుమార్ తన వెంట రావాలంటే లాక్కెళ్లేవాడని తెలిసింది.

ప్రస్తుతం పోలీసులు అన్ని కోణాల్లో దర్యాప్తు కొనసాగిస్తున్నారు. గ్రామంలో వినిపిస్తున్న ఆరోపణలు, అనుమానాలు అధికారికంగా ఇంకా నిర్ధారించబడలేదు. దర్యాప్తు పూర్తయిన తర్వాతే అసలు నిజానిజాలు వెలుగులోకి వచ్చే అవకాశం ఉంది.