ఒక్క కారే.. దుబారా ఖర్చులకు చెక్.. కేంద్రం కొత్త పాలసీ..

ప్రభుత్వ వాహనాల దుర్వినియోగానికి చెక్ పెట్టడమే కాకుండా ప్రజల పన్నుల ద్వారా సమకూరే ప్రజాధనాన్ని మరింత బాధ్యతాయుతంగా, సమర్థవంతంగా వినియోగించేందుకు కేంద్ర ప్రభుత్వం అత్యంత కీలకమైన నిర్ణయం తీసుకుంది. "వన్ ఆఫీసర్ – వన్ అఫీషియల్ కార్" పేరుతో ఒక నూతన మార్గదర్శకాన్ని అమల్లోకి తీసుకొచ్చింది. పరిపాలనా వ్యవస్థలో పారదర్శకత పెంచడం, అనవసర ఖర్చులకు కత్తెర వేయడమే లక్ష్యంగా ఈ కొత్త విధానాన్ని ప్రవేశపెట్టారు.

ఒకటి కంటే ఎక్కువ బాధ్యతలు ఉన్నా ఒకే కారు

ఇప్పటివరకు కొంతమంది ఉన్నతాధికారులు ఒకటి కంటే ఎక్కువ మంత్రిత్వ శాఖలు, విభాగాలు లేదా ప్రభుత్వ రంగ సంస్థల్లో అదనపు బాధ్యతలు నిర్వహిస్తున్నప్పుడు, ఆయా సంస్థల నుంచి వేర్వేరుగా అధికారిక వాహనాలను పొంది వినియోగించే అవకాశం ఉండేది. కానీ కొత్త నిబంధన ప్రకారం ఒక అధికారి ఎన్ని అదనపు బాధ్యతలు నిర్వర్తిస్తున్నప్పటికీ వారికి ఒకే ఒక అధికారిక వాహనం మాత్రమే కేటాయిస్తారు.

శాఖలన్నింటికీ స్పష్టమైన ఆదేశాలు

కేంద్ర ఆర్థిక మంత్రిత్వ శాఖ పరిధిలోని డిపార్ట్‌మెంట్ ఆఫ్ ఎక్స్‌పెండిచర్ ఈ మేరకు అన్ని కేంద్ర మంత్రిత్వ శాఖలు, విభాగాలు, ప్రభుత్వ రంగ సంస్థలు , స్వయం ప్రతిపత్తి సంస్థలకు స్పష్టమైన ఉత్తర్వులు జారీ చేసింది. ఈ నిబంధనలను తక్షణమే తప్పనిసరిగా అమలు చేయాలని ఆదేశించింది.

వ్యక్తిగత వినియోగంపై పూర్తి నిషేధం

ప్రభుత్వ రంగ సంస్థలు లేదా స్వయం ప్రతిపత్తి సంస్థలకు చెందిన వాహనాలను వ్యక్తిగత లేదా అధికారికేతర అవసరాలకు ఉపయోగించడాన్ని కేంద్రం పూర్తిగా నిషేధించింది. ప్రభుత్వ వాహనాలను కేవలం అధికారిక పనులకు మాత్రమే వినియోగించాలని స్పష్టం చేసింది. ఈ నిబంధనలను ఉల్లంఘించే వారిపై కఠిన చర్యలు ఉంటాయని అధికారులు హెచ్చరించారు.

వినియోగంలో లేని వాహనాలపై ఆదేశాలు

ప్రస్తుతం వినియోగంలో లేని లేదా అదనంగా ఉన్న ప్రభుత్వ వాహనాలను సురక్షిత ప్రదేశాల్లో పార్క్ చేయాలని, సరైన అనుమతి లేకుండా వాటిని ఎట్టి పరిస్థితుల్లోనూ వాడకూడదని స్పష్టం చేశారు. ప్రతి శాఖ తమ పరిధిలోని వాహనాల వినియోగంపై క్రమం తప్పకుండా పర్యవేక్షణ నిర్వహించాలని ఆదేశించారు.

కేంద్ర ప్రభుత్వం తీసుకువచ్చిన ఈ "వన్ ఆఫీసర్ – వన్ అఫీషియల్ కార్" విధానం ప్రభుత్వ యంత్రాంగంలో రవాణా వ్యయాన్ని గణనీయంగా తగ్గించడమే కాకుండా పరిపాలనలో జవాబుదారీతనాన్ని పెంచుతుంది. అనవసర వ్యయాలను అరికట్టి, ప్రభుత్వ వనరులను సరైన రీతిలో వినియోగించుకోవడానికి ఈ నిర్ణయం ఒక కీలకమైన అడుగుగా నిలుస్తుందని నిపుణులు మరియు అధికారులు అభిప్రాయపడుతున్నారు.