మెక్రాన్‌కు భార్య చెంపదెబ్బ?.. ఫ్రాన్స్‌లో వైరల్ అయిన ‘ఫస్ట్ కపుల్’ కథ!

అంతర్జాతీయ రాజకీయ వేదికలపై ఫ్రాన్స్ అధ్యక్షుడు ఎమాన్యుయెల్ మెక్రాన్ అంటే ఒక పవర్‌ఫుల్ లీడర్. జీ-7 సదస్సులైనా నాటో మీటింగులైనా ఆయన మాటే ఒక సంచలనం. కానీ ఇప్పుడు ప్రపంచమంతా మెక్రాన్ రాజకీయ వ్యూహాల గురించి కాకుండా ఆయన వ్యక్తిగత జీవితం గురించి, ముఖ్యంగా ఆయన భార్య బ్రిజిట్టే మెక్రాన్ ఇచ్చినట్లుగా చెబుతున్న ఒక 'షాక్' గురించి చర్చించుకుంటోంది. “ప్రెసిడెంట్ ఫోన్‌లో చాట్… ఫస్ట్ లేడీకి హాట్!” అన్న చందంగా ఫ్రాన్స్ ఎలిసీ ప్యాలెస్‌లో ఇప్పుడు హై-వోల్టేజ్ డ్రామా నడుస్తోందని సామాజిక మాధ్యమాలు హోరెత్తిపోతున్నాయి.

ఒక పుస్తకం... వెయ్యి చర్చలు!

ఇటీవల ఒక ఫ్రెంచ్ జర్నలిస్టు రాసిన పుస్తకం పారిస్ రాజకీయ వర్గాల్లో బాంబు పేల్చింది. సాధారణంగా దేశాధినేతల మధ్య దౌత్యపరమైన విభేదాలు ఉండటం సహజం. కానీ మెక్రాన్ విషయంలో అది 'మ్యారిటల్ వార్' వైవాహిక యుద్ధం గా మారిందని ఆ పుస్తకం కథనం. ఒక ప్రముఖ నటికి మెక్రాన్ ఫోన్‌లో పంపిన “మీరు చాలా ఆకర్షణీయంగా ఉన్నారు…” అనే మెసేజ్ ఫస్ట్ లేడీ బ్రిజిట్టే కంట పడటమే ఈ రచ్చకు కారణమని సమాచారం. దీంతో నెటిజన్లు ఊరుకుంటారా? “లవ్, లిబర్టీ, ఈక్వాలిటీ” నినాదాలు పక్కన పెట్టి “చాట్ చేస్తే… ఛెళ్లుమనే అవకాశం ఉంది!” అంటూ కొత్త స్లోగన్స్ అందుకున్నారు.

ఆ పాత వీడియో.. కొత్త విశ్లేషణలు!

గతంలో వియత్నాం పర్యటనలో విమానం దిగేటప్పుడు జరిగిన ఒక చిన్న సంఘటన వీడియో ఇప్పుడు మళ్లీ తెరపైకి వచ్చింది. అప్పట్లో అది ఒక ఫ్రెంచ్ స్టైల్ సరదా అనుకున్నారంతా. కానీ ఇప్పుడు సోషల్ మీడియా డిటెక్టివ్‌లు ఆ వీడియోను స్లో మోషన్‌లో విశ్లేషిస్తూ రకరకాల థియరీలు పుట్టిస్తున్నారు "ఇది కేవలం కోపం కాదు, అధికారం ఎవరి చేతుల్లో ఉందో చెప్పే సిగ్నల్." "పుతిన్‌ను ఎదిరించడం సులభమేమో కానీ మేడమ్‌ను కాదని మెసేజ్ చేయడం కష్టం!" అంటూ సెటైర్లు వేస్తున్నారు.

ట్రంప్ స్టైల్ అడ్వైజ్!

ఈ వ్యవహారంలో అమెరికా అధ్యక్షుడు డొనాల్డ్ ట్రంప్ ఎంట్రీ ఇవ్వడం మరో విశేషం. గతంలోనే ఆయన ఇలాంటి విషయాలపై స్పందిస్తూ “ఇలాంటి వ్యక్తిగత చర్చలు తలుపులు మూసుకుని చేసుకోవాలి” అని వ్యాఖ్యానించినట్లు వార్తలు రావడంతో నెటిజన్లు ఆయనను “వైట్ హౌస్ రిలేషన్‌షిప్ అడ్వైజర్” అని పిలుస్తూ మీమ్స్ వర్షం కురిపిస్తున్నారు.

పారిస్ కేఫేల్లో హాట్ టాపిక్స్

ప్రస్తుతం పారిస్ వీధుల్లో పొలిటికల్ ఎజెండా కంటే “మెక్రాన్ ఫోన్ పాస్‌వర్డ్ ఏమిటి?” అన్నదే పెద్ద ప్రశ్నగా మారింది. సామాన్య ప్రజల నుంచి విశ్లేషకుల వరకు అందరూ చలోక్తులు విసురుతున్నారు. "దేశాన్ని నడపడం కంటే ఇంటిని నడపడం కష్టం." అంటూ కామెంట్స్ చేస్తున్నారు.

నిజమా? మార్కెటింగా?

ఈ వార్తలు ఎంతవరకు నిజం అన్నది పక్కన పెడితే ఒక పుస్తకం అమ్మకాల కోసం చేసే మార్కెటింగ్ గిమ్మిక్కా లేక నిజంగానే ఎలిసీ ప్యాలెస్‌లో ఎమర్జెన్సీ నడుస్తోందా అన్నది తేలాల్సి ఉంది. ఏది ఏమైనా అంతర్జాతీయ సంక్షోభాల కంటే వాట్సాప్ చాట్లే ప్రమాదకరమని ఈ ఉదంతం మరోసారి నిరూపించింది. పాపం మెక్రాన్... బయట దేశాలను శాంతింపజేయడం కంటే ఇంట్లో శాంతిని నెలకొల్పడమే ఇప్పుడు ఆయన ముందున్న అతిపెద్ద సవాలు!