ఇంటర్నెట్ ను ఏఐ అంతం చేస్తుందా?

మనం ఏదైనా సమాచారం కావాలంటే వెంటనే గూగుల్‌లో వెతుకుతాం. అప్పుడు గూగుల్ మనకు కొన్ని వెబ్‌సైట్‌ల లింక్‌లను చూపిస్తుంది. ఆ లింక్‌లపై క్లిక్ చేసి వెబ్‌సైట్‌లలోకి వెళ్లి కావాల్సిన సమాచారాన్ని చూసుకుంటాం. అక్కడ ఉండే ప్రకటనలను కూడా చూస్తాం. దీనివల్ల వెబ్‌సైట్‌లకు డబ్బులు వస్తాయి. ఇంటర్నెట్ మొదలైనప్పటి నుంచీ ఇదే ప్రాసెస్ కొనసాగుతోంది. దీన్నే సింపుల్ బార్గెయిన్ అంటారు. అయితే ఇప్పుడు ఆర్టిఫిషియల్ ఇంటెలిజెన్స్ (AI) ఈ పద్ధతిని మార్చేస్తోంది. AI వల్ల మనం చూసిన ఇంటర్నెట్ ఇక మీదట అలా ఉండకపోవచ్చు అని కొందరు నిపుణులు అంటున్నారు. నిజంగా AI ఇంటర్నెట్‌ను నాశనం చేస్తుందా? లేక కొత్త రూపాన్ని ఇస్తుందా? అనేది వివరంగా తెలుసుకుందాం.

-ఇంటర్నెట్ స్వభావంలో మార్పు

ఇంటర్నెట్ స్వభావం పూర్తిగా మారిపోయిందని స్టాక్ ఓవర్‌ఫ్లో అనే కంపెనీ సీఈఓ ప్రశాంత్ చంద్రశేఖర్ చెప్పారు. ఏఐ ఇప్పుడు చాలా వెబ్‌సైట్‌లకు జనం వెళ్లడాన్ని ఆపేస్తోందని ఆయన అభిప్రాయపడ్డారు. అంటే మనం ఏదైనా సమాచారం అడిగినప్పుడు, ఏఐ నేరుగా ఆన్సర్ చేస్తే మనం వెబ్‌సైట్‌లకు వెళ్లాల్సిన అవసరం ఉండదు. దీనివల్ల వెబ్‌సైట్‌లకు వచ్చే ఆదాయం తగ్గిపోతుంది.

- కొత్త ఏఐ బ్రౌజర్‌లు, ఏజెంట్‌లు

ఇటీవల పెర్ప్లెక్సిటీ అనే ఒక ఏఐ కంపెనీ కామెట్ అనే కొత్త వెబ్ బ్రౌజర్‌ను రిలీజ్ చేసింది. ఇది స్క్రోల్ చేయడం కంటే మాట్లాడినట్లు ఉంటుందని గిజ్మోడో అనే ఒక టెక్ వెబ్‌సైట్ చెప్పింది. అంటే, మనం చాలా పేజీలు ఓపెన్ చేసి లింక్‌లపై నొక్కకుండా, ఈ బ్రౌజర్ మనం అడిగిన దానికి సరైన సమాధానాన్ని నేరుగా అందిస్తుంది.

అలాగే ఓపెన్ ఏఐ కూడా త్వరలో ఆపరేటర్ అనే తన సొంత ఏఐ ఏజెంట్‌ను తీసుకురాబోతోంది. ఇది మనుషులు వెబ్‌సైట్‌లను చూసినట్లే, నొక్కడం, రాయడం, పైకి కిందకి కదపడం వంటివి చేయగలదని అంటున్నారు. ఈ పోటీలో వెనుకబడకుండా గూగుల్ కూడా తన సెర్చ్ ఇంజిన్‌కు ఏఐ మోడ్‌ను తీసుకొచ్చింది. ఇందులో నార్మల్ సెర్చ్ రిజల్ట్స్‌కు బదులుగా ఒక చాట్‌బాట్ మన ప్రశ్నలకు చిన్న వ్యాసం లాగా సమాధానం ఇస్తుంది.

- ఇంటర్నెట్‌కు కొత్త భవిష్యత్తు?

ఈ మార్పులు సక్సెస్ అయితే మొత్తం ఇంటర్నెట్ పనితీరునే పూర్తిగా మార్చేస్తాయని గిజ్మోడో అభిప్రాయపడింది. వార్తలు ఇచ్చేవాళ్లు, ప్రకటనలు ఇచ్చేవాళ్లు, ఆన్‌లైన్‌లో వస్తువులు అమ్మేవాళ్లు... వారి వెబ్‌సైట్‌లు ఈ ఏఐ ఏజెంట్లను స్కిప్ చేసే అవకాశం ఉంది. అయితే, ఇంటర్నెట్ మాత్రం ఎక్కడికీ పోవడం లేదని నిపుణులు అంటున్నారు. ప్రమాదంలో ఉన్నది ఓపెన్ వెబ్ అని కొందరు భయపడుతున్నారు.

ఈ కొత్త ఇంటర్నెట్ సమాధానాలను ఎప్పుడూ సులభంగా ఇస్తుంది కానీ, ఓపెన్ వెబ్‌ను ఇంతలా పాపులర్ చేసిన కొన్ని విషయాలకు ముగింపు పలకవచ్చు. అంటే మనం ఆన్‌లైన్‌లో ఒకదాని తర్వాత ఒకటి చూస్తూ, అనుకోకుండా కొత్త విషయాలను కనుగొనే అవకాశం కోల్పోవచ్చు. ఇది కేవలం సమాచారం మాత్రమే అందించే ఒక మిషన్‌గా మారే అవకాశం ఉంది. మరి ఈ మార్పులు ఇంటర్నెట్‌ను ఏ విధంగా ప్రభావితం చేస్తాయో వేచి చూడాలి.