నిద్ర లక్షణాలు, వ్యాధుల మధ్య సంబంధం?

ఆరోగ్యం, నిద్ర మధ్య ఉన్న సంబంధంపై జరుగుతున్న పరిశోధనల్లో ఓ కొత్త అధ్యయనం కీలక విషయాలను వెల్లడించింది. యాంత్రికంగా కొలిచిన నిద్ర లక్షణాలు అనేక వ్యాధులతో ఎలా సంబంధం కలిగి ఉన్నాయో ఈ పరిశోధన స్పష్టంగా చూపింది. యూకే బయోబ్యాంక్ ప్రాజెక్ట్‌లో భాగంగా 88,461 మంది పాల్గొన్న వారి నుంచి సేకరించిన డేటాతో నిద్ర వ్యవధి, ప్రారంభ సమయం, నిద్ర రిథమ్, మగత నిద్ర వంటి లక్షణాలను నిశితంగా విశ్లేషించారు. ఈ అధ్యయనంలో నిద్ర రిథమ్, ముఖ్యంగా రోజువారీ స్థిరత్వం.. రాత్రివేళల చురుకుదనం, విశ్రాంతి మధ్య వ్యత్యాసం (Relative Amplitude) అనే రెండు అంశాలను ప్రధానంగా పరిగణించారు. ఈ నిద్ర లక్షణాలు ఏకంగా 172 వ్యాధులతో సంబంధం కలిగి ఉన్నట్లు గుర్తించారు. ఇందులో 42 వ్యాధులకు నిద్ర లక్షణాలు గణనీయంగా ప్రమాదాన్ని రెట్టింపు చేశాయని తేలింది.

వృద్ధాప్య సంబంధ వ్యాధి: రిలేటివ్ ఆంప్లిట్యూడ్ తక్కువగా ఉన్నవారిలో ఈ వ్యాధి వచ్చే ప్రమాదం 3.36 రెట్లు ఎక్కువగా ఉంది. గాంగ్రీన్ అనే వ్యాధి ఇంటర్ డైలీ స్టెబిలిటీ తక్కువగా ఉన్నవారిలో హాజర్డ్ రేషియో 2.61గా నమోదైంది. కాలేయ వైఫల్యం వారిని గమనిస్తే.. రాత్రి 12:30 తర్వాత నిద్రపోయే వారిలో ఈ ప్రమాదం 2.57 రెట్లు అధికంగా ఉంది. అంతేకాకుండా పార్కిన్సన్ (37.05%), టైప్ 2 డయాబెటిస్ (36.12%), , మూత్ర సంబంధిత వ్యాధులు (21.85%) వంటి వ్యాధుల్లో 20% పైగా భారం నిద్రకు సంబంధించినదేనని ఈ అధ్యయనం వెల్లడించింది.

- సబ్జెక్టివ్ vs ఆబ్జెక్టివ్ కొలతలు: కీలక వ్యత్యాసాలు

ముఖ్యంగా గమనించదగిన విషయం ఏమిటంటే, సగం కంటే ఎక్కువ వ్యాధుల సంబంధాలు నిద్ర రిథమ్‌తో మాత్రమే ప్రత్యేకంగా కనిపించాయి. గతంలో వ్యక్తిగత నివేదికల ఆధారంగా చేసిన నిద్ర అధ్యయనాల్లో ఈ విషయం వెలుగులోకి రాలేదు. ఈ కొత్త సంబంధాలను ఎన్ హేన్స్ డేటా సహాయంతో తిరిగి ధృవీకరించారు. అలాగే, గతంలో సబ్జెక్టివ్ నిద్ర డేటాతో చేసిన అధ్యయనాలను తిరిగి విశ్లేషించినప్పుడు కొన్ని ఆసక్తికరమైన విషయాలు బయటపడ్డాయి. కొంతమంది తక్కువ నిద్రపోయే వారు తాము ఎక్కువ నిద్రపోతున్నట్లు చెప్పడం వల్ల, కొన్ని వ్యాధుల విషయంలో తప్పుడు సంబంధాలు కనిపించినట్లు గుర్తించారు. ఉదాహరణకు ఇస్కీమిక్ హార్ట్ డిసీజ్ , డిప్రెషన్ విషయంలో ఇది బలంగా కనిపించింది.

ఈ అధ్యయనం నుంచి మనం ఏం నేర్చుకోవాలి?

ఈ నూతన పరిశోధన స్పష్టంగా కొన్ని ముఖ్యమైన విషయాలను తెలియజేసింది. కేవలం నిద్ర వ్యవధి మాత్రమే కాకుండా, నిద్ర ప్రారంభ సమయం, నిద్ర స్థిరత్వం, మరియు నిద్ర వ్యంగతం వంటి అనేక పారామితులు ఆరోగ్యంపై ప్రభావం చూపుతాయి. వ్యక్తిగత నివేదికల ద్వారా సేకరించిన నిద్ర సమాచారం కంటే, యాంత్రికంగా కొలిచిన కొలతల మధ్య స్పష్టమైన వ్యత్యాసాలు ఉన్నాయి. ఆరోగ్యపరంగా నిజమైన, లోతైన అవగాహన కోసం, వాస్తవిక నిద్ర కొలతలే ఎక్కువ ఉపయోగకరమని ఈ అధ్యయనం సూచిస్తోంది.

భవిష్యత్ పరిశోధనలకు మార్గనిర్దేశం

భవిష్యత్తులో నిద్రకు సంబంధించిన పరిశోధనలలో బహుళ-పరిమాణ, ఆబ్జెక్టివ్ కొలతలు కీలక పాత్ర పోషిస్తాయని ఈ అధ్యయనం గట్టిగా సమర్థిస్తోంది. రోజువారీ నిద్రను నియమితంగా పాటించడం, నిద్ర నాణ్యతను మెరుగుపరచుకోవడం వంటివి ఆరోగ్యాన్ని బలోపేతం చేయగలవని ఇది స్పష్టం చేస్తోంది. మీ నిద్ర అలవాట్లపై శ్రద్ధ వహించడం మీ మొత్తం ఆరోగ్యాన్ని మెరుగుపరచడంలో కీలక పాత్ర పోషిస్తుందని గుర్తుంచుకోండి.