నాని గేమ్‌ ప్లాన్ ఛేంజ్‌.. మరో 'దసరా' కి రెడీ

నేచురల్ స్టార్ నాని హీరోగా వచ్చిన 'దసరా' పాజిటివ్ రెస్పాన్స్ ను దక్కించుకుంది. పాన్ ఇండియా రేంజ్ లో భారీ రేంజ్ విజయాన్ని సొంతం చేసుకుంటుందని.. ఓ కాంతార.. ఓ కేజీఎఫ్‌ మాదిరిగా ఏడాది అంతా కూడా గుర్తుంచుకునే విధంగా దసరా ఉంటుందని యూనిట్ సభ్యులు చాలా ప్రచారం చేశారు. కానీ చివరకు నిరాశే మిగిలింది.

దసరా ఫలితంపై పెద్దగా పట్టింపు లేకుండా నాని వెంటనే తన తదుపరి సినిమా ను శౌర్యువ్‌ దర్శకత్వంలో మొదలు పెట్టాడు. మృణాల్‌ ఠాకూర్ హీరోయిన్ గా నటిస్తున్న ఆ సినిమాకు ఇటీవలే 'హాయ్‌ నాన్న' అనే టైటిల్‌ ను కన్ఫర్మ్‌ చేశాడు. దసరా సినిమా తో పోల్చితే హాయ్‌ నాన్న సినిమాలో నాని పాత్ర చాలా సాఫ్ట్ గా ఉండబోతున్నట్లు తాజాగా విడుదలైన టీజర్ ను చూస్తే అర్థం అవుతుంది.

హాయ్ నాన్న తర్వాత నాని చేయబోతున్న సినిమా ఇప్పటికే కన్ఫర్మ్‌ అయింది. వివేక్ ఆత్రేయ దర్శకత్వంలో ఒక సినిమాను ప్లాన్‌ చేశారు. స్క్రిప్ట్‌ వర్క్ కూడా దాదాపుగా పూర్తి అయిందని.. హాయ్‌ నాన్న విడుదలకు ముందే ఈ సినిమా ప్రారంభం అవ్వబోతుంది అనుకుంటూ ఉండగా నాని ప్లాన్‌ ఛేంజ్ చేసుకున్నట్లుగా ఇండస్ట్రీ వర్గాల ద్వారా సమాచారం అందుతోంది.

హాయ్‌ నాన్న సినిమా తర్వాత వివేక్ ఆత్రేయ దర్శకత్వంలో కాకుండా శ్రీకాంత్ ఓదెల దర్శకత్వంలో సినిమా చేయాలని నిర్ణయించుకున్నట్లు తెలుస్తోంది. వీరి కాంబోలో వచ్చిన దసరా సినిమా కమర్షియల్ గా భారీ విజయాన్ని సొంతం చేసుకోకున్నా కూడా విమర్శకుల ప్రశంసలు పొందింది. అంతే కాకుండా శ్రీకాంత్‌ ఓదెలపై నానికి చాలా నమ్మకంను కలిగించింది.

అందుకే మరోసారి శ్రీకాంత్ ఓదెలతో కలిసి తెలంగాణ నేపథ్యంలోని కథతో నాని సినిమాను చేసేందుకు సిద్ధం అయ్యాడు. హాయ్ నాన్న సినిమా లో నాని చాలా సాఫ్ట్ గా కనిపించబోతున్నాడు.. ఆ తర్వాత శ్రీకాంత్‌ ఓదెల తో చేయబోతున్న సినిమా లో మళ్లీ దసరా సినిమాలో మాదిరిగా చాలా రఫ్‌ గా కనిపించబోతున్నట్లుగా తెలుస్తోంది.

నాని శ్రీకాంత్‌ ఓదెల దర్శకత్వంలో సినిమాను చేసేందుకు సిద్ధం అయిన నేపథ్యంలో దర్శకుడు వివేక్ ఆత్రేయ తన హిట్ మూవీ బ్రోచేవారెవరురా సినిమాకు సీక్వెల్‌ ను రూపొందించే పనిలో పడ్డాడు అంటూ వార్తలు వస్తున్నాయి. ఈ రెండు సినిమాల గురించి అధికారిక ప్రకటన వచ్చే వరకు వెయిట్‌ చేయాల్సిందే.