వెంకీ అట్లూరి రూట్ మారిందా?

డైరెక్ట‌ర్ వెంకీ అట్లూరి కెరీర్‌ ఇప్పుడు మరో కీలక దశలోకి వెళ్తున్నట్లు కనిపిస్తోంది. తొలి ప్రేమ, మిస్టర్ మజ్ను, రంగ్ దే సినిమాలతో తెలుగు ప్రేక్షకులకు పరిచయమైన వెంకీ అట్లూరి.. ఆ తర్వాత తన కథలను ఇతర భాషల మార్కెట్‌కు తీసుకెళ్లే ప్రయత్నం చేశారు. ముఖ్యంగా తమిళ హీరో ధనుష్‌తో చేసిన సార్ సినిమా ఆయన కెరీర్‌కు కొత్త మార్కెట్‌ను పరిచయం చేసింది. ఆ తర్వాత కూడా ఇతర భాషల హీరోలైన దుల్క‌ర్ స‌ల్మాన్ తో ల‌క్కీ భాస్క‌ర్, సూర్య‌తో విశ్వ‌నాధ్ అండ్ స‌న్స్ లాంటి వరుస ప్రాజెక్టులు చేయడంతో వెంకీ అట్లూరి కెరీర్‌ ట్రాక్‌లో స్పష్టమైన మార్పు కనిపించింది. అలాంటి వెంకీ ఇప్పుడు మళ్లీ టాలీవుడ్ హీరో నానితో సినిమా చేయబోతున్నారనే వార్త ఆసక్తిని పెంచుతోంది.

వెంకీ అట్లూరి విషయంలో ఈ మార్పును కేవలం మరో తెలుగు సినిమా అనే కోణంలో చూడాల్సిన అవసరం లేదు. ఒక డైరెక్ట‌ర్ గా తన కథలను వేర్వేరు మార్కెట్లకు తీసుకెళ్లిన తర్వాత తిరిగి తెలుగు హీరోతో సినిమా చేయడం అంటే.. తనకు బాగా తెలిసిన ఇండస్ట్రీలో మరింత పెద్ద స్థాయిలో కథను చెప్పేందుకు సిద్ధమవుతున్నారనుకోవ‌చ్చు. ఇతర భాషల హీరోల‌తో క‌లిసి వ‌ర్క్ చేసిన ఎక్స్‌పీరియెన్స్, అక్కడి మార్కెట్‌ అంచనాలు, కథను యూనివర్సల్‌గా ట్రీట్ చేసే విధానం వంటి అంశాలు ఇప్పుడు ఆయన తర్వాతి తెలుగు సినిమాపై ప్రభావం చూపే అవకాశం ఉంది.

మరోవైపు వెంకీ అట్లూరి గత సినిమాలను గమనిస్తే.. ప్రేమ, ఫ్యామిలీ, ఎమోష‌న్స్ తో పాటు సామాజిక అంశాలను కమర్షియల్ ఎంటర్‌టైనర్‌ ఫార్మాట్‌లో చెప్పే ప్రయత్నం కనిపిస్తుంది. ఏ భాష హీరోతో చేసినా తన కథల్లోని ఎమోష‌న్ ను కనెక్ట్ అయ్యేలా చేయడంపై ఆయన ఫోక‌స్ చేశారు. అందుకే నానితో చేయబోయే సినిమా కూడా ఆయన గత తెలుగు సినిమాల తరహాలోనే ఉంటుందా? లేక గ‌త ఎక్స్‌పీరియెన్స్ తో కొత్త ట్రీట్‌మెంట్‌ను తీసుకొస్తారా? అనే ఆసక్తి నెలకొంది.

ఇప్పటికే నాని వరుస ప్రాజెక్టులతో బిజీగా ఉన్న నేపథ్యంలో ఈ కాంబినేషన్‌ కంటే.. వెంకీ అట్లూరి తిరిగి టాలీవుడ్ హీరోతో వ‌ర్క్ చేయ‌నుండ‌టం ఇప్పుడు ఎక్కువగా చర్చకు వస్తోంది. ఒక దశలో తెలుగు డైరెక్ట‌ర్ గా మొదలై, ఇతర భాషల్లో తన మార్కెట్‌ను విస్తరించిన వెంకీ అట్లూరి.. ఇప్పుడా ఎక్స్‌పీరియెన్స్ తో మళ్లీ టాలీవుడ్ హీరోతో కొత్త దశను ప్రారంభించబోతున్నారా అనేది ఆసక్తికరంగా మారింది. ఈ సినిమా ఆయన కెరీర్‌లో మరో మలుపుగా నిలుస్తుందా అనేది అఫీషియ‌ల్ అనౌన్స్‌మెంట్ వ‌చ్చిన త‌ర్వాతే క్లారిటీ రానుంది.