పిచ్చెక్కిన ట్రంప్ : హోర్ముజ్ లో నౌకలపై దాడి చేస్తారా?

అమెరికా అధ్యక్షుడు డొనాల్డ్ ట్రంప్ తీసుకున్న తాజా సంచలన నిర్ణయం ప్రపంచాన్ని ఒక్కసారిగా ఉలిక్కిపడేలా చేసింది. ఇరాన్‌తో చర్చలు పూర్తిగా విఫలమైన నేపథ్యంలో ప్రపంచ ఇంధన సరఫరాకు గుండెకాయ వంటి హోర్ముజ్ జలసంధి పై అమెరికా ఆంక్షలు విధిస్తున్నట్లు ప్రకటించడం అంతర్జాతీయంగా పెను సంచలనానికి దారి తీసింది. అమెరికా నౌకాదళం తక్షణమే ఈ మార్గాన్ని తన నియంత్రణలోకి తీసుకుంటుందని ట్రంప్ ప్రకటించడంతో పశ్చిమ ఆసియాలో యుద్ధ మేఘాలు కమ్ముకున్నాయి.

ఏమిటీ హోర్ముజ్ సంక్షోభం?

ప్రపంచవ్యాప్తంగా సరఫరా అయ్యే ముడి చమురులో దాదాపు మూడవ వంతు ఈ చిన్న జలసంధి గుండానే వెళ్తుంది. ఇప్పుడు ట్రంప్ తీసుకున్న నిర్ణయం ప్రకారం ఇరాన్ అనుమతితో ప్రయాణించే ఏ నౌకనైనా అమెరికా అడ్డుకునే అవకాశం ఉంది. ఇది కేవలం వాణిజ్య ఆంక్ష మాత్రమే కాకుండా నేరుగా సైనిక చర్యకు సంకేతంగా నిపుణులు భావిస్తున్నారు. ఈ నిర్ణయం గ్లోబల్ ఆయిల్ మార్కెట్‌ను అతలాకుతలం చేసే ప్రమాదం ఉంది.

ఐదు దేశాలకు ఇరాన్ ఊరట.. అమెరికా స్పందన ఏమిటి?

మరోవైపు ఇరాన్ వ్యూహాత్మకంగా వ్యవహరిస్తూ ఐదు దేశాలకు ప్రత్యేక రాయితీలు ప్రకటించింది. భారత్, చైనా, రష్యా, ఇరాక్, పాకిస్తాన్. ఈ దేశాలు తమతో వాణిజ్యం కొనసాగించవచ్చని.. వీటికి హోర్ముజ్ మార్గంలో ఎటువంటి ఆటంకాలు ఉండవని ఇరాన్ స్పష్టం చేసింది. అయితే ఇక్కడే అసలు చిక్కు వచ్చి పడింది. అమెరికా ఆంక్షలను ధిక్కరించి ఈ దేశాల నౌకలు ప్రయాణిస్తే అమెరికా నౌకాదళం వాటిపై దాడులు చేస్తుందా? అన్నది ఇప్పుడు మిలియన్ డాలర్ల ప్రశ్న. ముఖ్యంగా చైనా, రష్యా, భారత్ వంటి అగ్రరాజ్యాలు అణుశక్తి కలిగి ఉన్న దేశాలు కావడం ఈ ఉద్రిక్తతను మరింత తీవ్రం చేస్తోంది.

భారతదేశంపై ప్రభావం.. దౌత్యపరమైన అగ్నిపరీక్ష

భారతదేశానికి ఈ పరిస్థితి అత్యంత క్లిష్టమైనది. మన దేశ ఇంధన అవసరాల్లో మెజారిటీ భాగం మధ్యప్రాచ్యం నుంచే తీరుతుంది. చమురు ధరలు పెరిగితే దేశీయంగా ద్రవ్యోల్బణం పెరిగి సామాన్యుడిపై భారం పడుతుంది. ఒకవైపు అమెరికాతో బలమైన రక్షణ సంబంధాలు ఉన్నాయి.. మరోవైపు ఇరాన్‌తో చారిత్రక, వాణిజ్య బంధం ఉంది. ఈ రెండింటి మధ్య సమతుల్యత పాటించడం భారత్‌కు ఇప్పుడు పెద్ద సవాలుగా మారింది.

సముద్ర గర్భంలో పొంచి ఉన్న ప్రమాదం

పరిస్థితిని మరింత జటిలం చేస్తూ హోర్ముజ్ మార్గంలో తాము మైన్లను అమర్చామని ఇరాన్ ప్రకటించింది. వీటిని గుర్తించడం, నిర్వీర్యం చేయడం తమకు మాత్రమే సాధ్యమని వారు హెచ్చరిస్తున్నారు. అంటే అమెరికా అనుమతి ఉన్నా లేకపోయినా ఈ మార్గంలో ప్రయాణించే నౌకలకు ప్రాణహాని తప్పదనే సంకేతాలను ఇరాన్ పంపింది. ఒకవేళ పొరపాటున ఏదైనా నౌకపై దాడి జరిగితే అది కేవలం ప్రాంతీయ పోరుగా మిగిలిపోకుండా మూడవ ప్రపంచ యుద్ధానికి దారితీసే అవకాశం ఉందని విశ్లేషకులు ఆందోళన వ్యక్తం చేస్తున్నారు.

అనిశ్చితిలో ప్రపంచం

ప్రస్తుతానికి ప్రపంచ దేశాలన్నీ ట్రంప్ తదుపరి అడుగుపైనే కళ్లు పెట్టాయి. అగ్రరాజ్యాల మధ్య అహంకారం, భౌగోళిక రాజకీయ ఆధిపత్యం చివరకు ప్రపంచ శాంతిని పణంగా పెడుతున్నాయన్న వాదనలు వినిపిస్తున్నాయి. రాబోయే కొద్ది రోజుల్లో హోర్ముజ్ జలసంధి వద్ద జరిగే పరిణామాలు ప్రపంచ వాణిజ్య భవిష్యత్తును, చమురు ధరలను.. అంతర్జాతీయ భద్రతను శాసించనున్నాయి. శాంతియుత చర్చల ద్వారా ఈ సమస్య పరిష్కారం కాకపోతే, మానవాళి భారీ మూల్యాన్ని చెల్లించుకోవాల్సి రావచ్చు.