త్రిష గోల్డెన్ ఛాన్స్ వ‌దిలేసుకుందా?

భారతీయ చలనచిత్ర రంగంలోనే అత్యంత ప్రతిష్టాత్మకమైన ప్రాజెక్టుగా భావిస్తున్న కమల్ హాసన్ - రజనీకాంత్ మల్టీస్టారర్ చిత్రం గురించి ఓ సంచలన వార్త కోలీవుడ్ వర్గాల్లో చక్కర్లు కొడుతోంది. `జైల‌ర్` ఫేమ్ దర్శకుడు నెల్సన్ దిలీప్‌కుమార్ తెరకెక్కించనున్న ఈ భారీ యాక్షన్ డ్రామాలో కథానాయికగా నటించాల్సిన స్టార్ హీరోయిన్ త్రిష ప్రాజెక్ట్ నుండి తప్పుకున్నట్లు వస్తున్న లీకులు చిత్ర పరిశ్రమను షాక్‌కు గురిచేస్తున్నాయి. ఇద్దరు దిగ్గజ నటుల కాంబినేషన్‌లో రాబోతున్న ఈ క్రేజీ సినిమాలో అవకాశం వదులుకోవడం హాట్ టాపిక్‌గా మారింది.

త్రిష‌ తప్పుకోవడానికి ప్రధాన కారణం రెమ్యునరేషన్ అంశమేనని ఇండస్ట్రీ వర్గాల సమాచారం. ఈ ప్రతిష్టాత్మక ప్రాజెక్ట్ కోసం త్రిష ఏకంగా 12 కోట్ల రూపాయల భారీ పారితోషికాన్ని డిమాండ్ చేసినట్లు వినిపిస్తోంది. ప్రస్తుతం సౌత్ ఇండియాలోనే మోస్ట్ వాంటెడ్ హీరోయిన్‌గా దూసుకుపోతున్న త్రిష‌ మార్కెట్ క్రేజ్‌కు అనుగుణంగానే ఈమొత్తాన్ని అడిగినట్లు తెలుస్తోంది. ఇద్దరు సూపర్ స్టార్స్ ఉన్న సినిమాలో హీరోయిన్ పాత్రకు అంత బడ్జెట్ కేటాయించడం మేకర్స్‌కు లీగల్ అండ్ ఫైనాన్షియల్ సమీకరణాల పరంగా వర్కవుట్ కాలేదని టాక్.

మరోవైపు తప్పుకోవడానికి కేవలం డబ్బు మాత్రమే కారణం కాదన్న‌ది మ‌రో వెర్ష‌న్. స్క్రిప్ట్ పరంగా త్రిష పాత్రకు ఉన్న ప్రాధాన్యత కూడా ఓ కారణం కావచ్చని విశ్లేషకులు భావిస్తున్నారు. కమల్ హాసన్, రజనీకాంత్ వంటి ఇద్దరు లార్జర్-ద్యాన్-లైఫ్ నటులు ఒకే స్క్రీన్‌పై కనిపిస్తున్నప్పుడు సహజంగానే కథ మొత్తం వారి చుట్టూనే తిరుగుతుంది. ఇలాంటి భారీ మల్టీస్టారర్‌లో హీరోయిన్ పాత్ర గ్లామర్ బొమ్మగా లేదా పరిమిత సీన్లకే పరిమితమయ్యే ప్రమాదం ఉంది. అందుకే ప్రాధాన్యత లేని పాత్ర చేయడం ఇష్టం లేకే త్రిష ఈ నిర్ణయం తీసుకుని ఉండొచ్చ‌నే వాదన కూడా ఉంది.

దర్శకుడు నెల్సన్ దిలీప్‌కుమార్ తన సినిమాల్లో హీరోయిన్ క్యారెక్టర్లను డార్క్ కామెడీ , యాక్షన్ బ్యాక్‌డ్రాప్‌లో వైవిధ్యంగా చూపిస్తుంటారు. గతంలో రజనీకాంత్‌తో తీసిన `జైల‌ర్` భారీ విజయాన్ని అందుకుంది. ఇప్పుడు కమల్, రజనీలను ఒకే ఫ్రేమ్‌లో చూపించేందుకు ఆయన సిద్ధమవుతున్న తరుణంలో త్రిష లాంటి స్టార్ నటి దూరం కావడం సినిమా బిజినెస్ క్రేజ్‌పై కొంత ప్రభావం చూపే అవకాశం ఉంది. ప్రస్తుతం చిత్ర యూనిట్ త్రిష స్థానంలో మరో టాలెంటెడ్ అగ్ర కథానాయికను ఎంపిక చేసే పనిలో పడినట్లు కోలీవుడ్ సమాచారం. ఈ చిత్రానికి సంబంధించి త్రిష నో చెప్పడం వెనుక అసలు నిజం ఏంట‌నేది? అధికారికంగా స్పందిస్తే తప్ప క్లారిటీ రాదు. ఈ లీక్ మాత్రం సోషల్ మీడియాలో విపరీతమైన చర్చకు దారితీస్తోంది.