డిజిటల్ పైరసీ.. రివ్యూ బాంబింగ్‌లపై ఉక్కుపాదం!

సినీ పరిశ్రమను పట్టిపీడిస్తున్న అతిపెద్ద సమస్యల్లో డిజిటల్ పైరసీ ఒకటనే విషయం తెలిసిందే. అయితే ఈ మధ్య కాలంలో రివ్యూ బాంబింగ్ (సినిమా విడుదలైన వెంటనే ఉద్దేశపూర్వకంగా ప్రతికూల సమీక్షలు ఇచ్చి నష్టపరచడం) అనే సరికొత్త ట్రెండ్ చిత్ర నిర్మాతల పాలిట శాపంగా మారింది. ఈ రెండు తీవ్రమైన సమస్యలపై కేంద్ర సహాయ మంత్రి, ప్రముఖ నటుడు సురేష్ గోపి స్పందించారు. చలనచిత్ర రంగాన్ని రక్షించుకోవడానికి డిజిటల్ దాడులకు వ్యతిరేకంగా కఠినమైన చట్టపరమైన రక్షణలు అవసరమని డిమాండ్ చేశారు.

సరికొత్త సాంకేతికత అందుబాటులోకి వచ్చిన తర్వాత చిత్ర పరిశ్రమలో పెట్టుబడులు పెట్టే నిర్మాతలకు భద్రత కరువైందని సురేష్ గోపి ఆవేదన వ్యక్తం చేశారు. కేవలం కొంతమంది స్వార్థ ప్రయోజనాల కోసం .. ఉద్దేశపూర్వకంగా సినిమాలను దెబ్బతీయడానికి డిజిటల్ ప్లాట్‌ఫారమ్‌లను వాడుకుంటున్నారని పేర్కొన్నారు. ఈ విషయంపై స్వయంగా కేంద్ర హోంమంత్రి అమిత్ షాను కలవబోతున్నట్లు వెల్లడించారు. చట్టవిరుద్ధమైన చర్యలను అరికట్టడానికి బలమైన చట్టాలను తీసుకురావాలని హోంమంత్రికి అధికారికంగా విజ్ఞప్తి చేయనున్నట్లు తెలిపారు.

ఒక సినిమాను నిర్మించడానికి నిర్మాతలు ఎంతో శ్రమను, కోట్లాది రూపాయలు పెట్టుబడిగా పెడతారు. కానీ సినిమా థియేటర్లలోకి వచ్చిన మొదటి రోజే కనీసం చూడకుండానే కొందరు సోషల్ మీడియాలో నెగెటివ్ ప్రచారానికి తెరలేపుతున్నారు. ఈ రివ్యూ బాంబింగ్ వల్ల సినిమా భవితవ్యం క్షణాల్లో మారిపోతోందని.. థియేటర్లకు వచ్చే ప్రేక్షకుల సంఖ్య దారుణంగా పడిపోతోందని సురేష్ గోపి ఆందోళన వ్యక్తం చేశారు. ఇది కేవలం ఒక సినిమాపై జరిగే దాడి కాదని.. ఆ సినిమాను నమ్ముకున్న వందలాది మంది కార్మికుల పొట్ట గొట్టడమేనని అభిప్రాయపడ్డారు.

ఎంత అడ్డుకట్ట వేస్తున్నా సరికొత్త రూపాల్లో దూసుకొస్తున్న‌ డిజిటల్ పైరసీ కూడా చిత్రసీమను అతలాకుతలం చేస్తోంది. థియేటర్లలో విడుదలైన కొన్ని గంటల్లోనే హై-క్వాలిటీ ప్రింట్లు ఆన్‌లైన్‌లో ప్రత్యక్షం కావడం వల్ల కలెక్షన్లపై తీవ్ర ప్ర‌భావం పడుతోందన్నారు. ప్రస్తుతమున్న ఐటీ యాక్ట్ చట్టాలు ఆధునిక సైబర్ నేరాలను పూర్తిగా అదుపు చేయలేకపోతున్నాయని.. అందుకే కేంద్ర ప్రభుత్వం జోక్యం చేసుకుని మరింత కఠినమైన చట్టపరమైన చట్రాన్ని రూపొందించాల్సిన అవసరం ఉందని మంత్రి గుర్తుచేశారు.

సౌత్ ఇండస్ట్రీతో పాటు బాలీవుడ్‌లో కూడా ఈ సమస్యల తీవ్రత రోజురోజుకూ పెరుగుతోంది. ముఖ్యంగా మలయాళ చిత్ర పరిశ్రమలో రివ్యూ బాంబింగ్‌పై గత కొంతకాలంగా పెద్ద ఎత్తున కోర్టులలో కూడా చర్చలు జరుగుతున్నాయి. ఇలాంటి తరుణంలో సినిమా నేపథ్యం ఉన్న ఒక వ్యక్తి కేంద్ర మంత్రిగా బాధ్యతలు చేపట్టి నేరుగా హోంశాఖ దృష్టికి సమస్యలను తీసుకెళ్లాలని నిర్ణయించుకోవడం చిత్ర పరిశ్రమ వర్గాల్లో సరికొత్త ఆశలను రేకెత్తిస్తోంది.

కళను, వినోదాన్ని వ్యాపార కోణంలోనే కాకుండా ఎంతో మందికి ఉపాధి కల్పించే ఒక పరిశ్రమగా చూడాల్సిన బాధ్యత అందరిపైనా ఉంది. సురేష్ గోపి చేయబోయే ప్రతిపాదనకు కేంద్ర హోంమంత్రిత్వ శాఖ నుండి సానుకూల స్పందన వస్తుందని ఇండస్ట్రీ వర్గాలు బలంగా నమ్ముతున్నాయి. సాంకేతికతను సద్వినియోగం చేసుకోవాలే తప్ప వ్యవస్థలను నాశనం చేయడానికి వాడకూడదనే సందేశాన్ని ఈ ప్రతిపాదన స్పష్టం చేస్తోంది. ఒకవేళ కేంద్రం దీనిపై కఠిన చట్టాలు తెస్తే అది భారతీయ సినిమా భవిష్యత్తును మార్చేసే మైలురాయి అవుతుంది.