బిగ్ న్యూస్ విన్నారా.. బిగ్ బాస్ 7లో ష‌కీలా

బుల్లితెర‌పై బిగ్ బాస్ సంద‌డి గురించి తెలిసిందే. తెలుగు-త‌మిళం-హిందీ-క‌న్న‌డం-మ‌ల‌యాళంలో బిగ్ బాస్ విజ‌య‌వంతంగా ర‌న్ అవుతోంది. ఇక తెలుగు నాట నాగార్జున హోస్ట్ గా బిగ్ బాస్ సీజ‌న్ 6 విజ‌య‌వంతంగా పూర్త‌యిన సంగ‌తి తెలిసిందే. త‌దుప‌రి బిగ్ బాస్ 7 కి రంగం సిద్ధ‌మ‌వుతోంది. ఇప్ప‌టికే ఇంటి స‌భ్యులు ఎవ‌రు? అంటూ ఆరాలు మొద‌ల‌య్యాయి. ర‌క‌ర‌కాల పేర్లు తెర‌పైకొస్తున్నాయి.

తాజా స‌మాచారం మేర‌కు.. తెలుగు బిగ్ బాస్ 7లో ఈసారి శృంగార చిత్రాల నాయ‌కిగా ప‌రిచ‌యం ఉన్న మ‌ల‌యాళ‌ నటి షకీలా ప్రవేశించనుంద‌ని క‌థ‌నాలొస్తున్నాయి. నిజానికి ప్ర‌తిసారీ బిగ్ బాస్ తెలుగు ప్రారంభానికి ముందు ఇంటిలోకి ష‌కీలా ప్ర‌వేశం ఉంటుంద‌ని ప్ర‌చారం సాగింది. కానీ అది ఇప్ప‌టివ‌ర‌కూ సాధ్య‌ప‌డ‌లేదు. ఇరుగు పొరుగున అవ‌కాశాలొచ్చినా కానీ తెలుగు బిగ్ బాస్ లో ఛాన్స్ ద‌క్కించుకోలేక‌పోయింది.

నిజానికి శృంగార‌ సినిమాల‌తో మలయాళ ప‌రిశ్ర‌మ‌ను ద‌శాబ్ధాల పాటు ఏలిన ష‌కీలా కాల‌క్ర‌మంలో రెగ్యుల‌ర్ చిత్రాల న‌టిగా రూపాంత‌రం చెందింది. తొలిగా త‌మిళంలో ఎంట్రీ ఇచ్చిన ఈ బ్యూటీ ఆ త‌ర్వాత తెలుగులో తేజ ద‌ర్శ‌క‌త్వంలో న‌టించింది. సంపూ న‌టించిన‌ `కొబ్బరి మట్ట` చిత్రంలోను ష‌కీలా న‌టించిన సంగ‌తి తెలిసిందే. ప్ర‌స్తుతం బిగ్ బాస్ రియాలిటీ షోలోకి ప్రవేశించడం ద్వారా తన అదృష్టాన్ని పరీక్షించుకోవడానికి సిద్ధంగా ఉంది. ఇప్పటికే త‌న‌ పరిచయ వీడియోను బిగ్ బాస్ టీమ్ రెడీ చేసింద‌ని కూడా గుస‌గుస‌లు వినిపిస్తున్నాయి.

ఇక ష‌కీలా గతంలోకి వెళితే.. బిగ్ బాస్ త‌న‌కు కొత్తేమీ కాదు. 2014లో బిగ్ బాస్ కన్నడ సీజన్ 2లో క‌నిపించింది. ఇంటి నుంచి నెల రోజుల్లో బ‌య‌ట‌కు వెళ్లింది. తమిళనాడులో అనేక టీవీ రియాల్టీ షోలలో పాల్గొంది. వాటిలో కొన్నిటిని గెలుపొందింది. త‌దుప‌రి తెలుగు బిగ్ బాస్ సీజ‌న్ లో ఏమేర‌కు ప్ర‌తిభ క‌న‌బ‌రుస్తుందో వేచి చూడాలి. నిజానికి ష‌కీలాకు తెలుగు యూత్ లోను భారీ ఫాలోయింగ్ ఉంది. ఒక ప్ర‌ముఖ తెలుగు హీరో ష‌కీలా అంటే ప‌డి చ‌చ్చిపోయేవాడ‌న్న విష‌యాన్ని ష‌కీలా ఆటోబ‌యోగ్ర‌ఫీలో ప్ర‌స్థావించిన సంగ‌తి తెలిసిందే. కానీ ఆ హీరో పేరును మాత్రం ప్ర‌స్థావించ‌లేదు.