ఈ సీనియర్ హీరోలకు హీరోయిన్స్ కరువయ్యారా? పిల్లల వెంట పడ్డారేంటి?

సినిమా అంటేనే ఒక రంగుల లోకం. అక్కడ వయసుతో సంబంధం లేకుండా పాత్రలు ప్రాణం పోసుకుంటాయి. అయితే, గత కొంతకాలంగా టాలీవుడ్‌లో సీనియర్ హీరోలు తమ కంటే సగం వయసున్న, ఇంకా చెప్పాలంటే తమ పిల్లల వయసున్న హీరోయిన్లతో జతకట్టడం పెద్ద చర్చకు దారితీస్తోంది. ఇది కేవలం వెండితెరపై వినోదం మాత్రమేనా లేక సమాజంపై దీని ప్రభావం ఏమైనా ఉందా? అసలు మన మేకర్స్ ఆలోచనా ధోరణిలో మార్పు రావలసిన సమయం ఆసన్నమైందా? అనే ప్రశ్నలు ఇప్పుడు గట్టిగా వినిపిస్తున్నాయి.

వెండితెరపై వయసు గ్యాప్:

టాలీవుడ్ అగ్ర హీరోలు 60, 70 ఏళ్ల వయసులో కూడా కుర్ర హీరోలతో పోటీ పడుతూ సినిమాలు చేస్తున్నారు. ఇది వారి క్రమశిక్షణకు నిదర్శనమే అయినా, హీరోయిన్ల ఎంపిక విషయంలో మాత్రం పెద్ద వ్యత్యాసం కనిపిస్తోంది. ఉదాహరణకు, సంక్రాంతి బ్లాక్ బస్టర్ 'మన శంకర వర ప్రసాద్ గారు' చిత్రంలో మెగాస్టార్ చిరంజీవి వయసు 70 ఏళ్లు కాగా, హీరోయిన్ నయనతార వయసు 40 ఏళ్లు. దాదాపు 30 ఏళ్ల గ్యాప్ ఉన్నా వీరిద్దరి కెమిస్ట్రీని ప్రేక్షకులు ఆదరించారు. కానీ, రవితేజ నటించిన 'భర్త మహాశయులకు విజ్ఞప్తి' (BMW) సినిమాలో డింపుల్ హయతి, ఆషికా రంగనాథ్ లాంటి కుర్ర భామలను ఎంచుకోవడం వల్ల వయసు వ్యత్యాసం 30 ఏళ్లకు పైగానే ఉంటోంది. ఇది చూసేందుకు కొంత ఎబ్బెట్టుగా ఉంటుందని కొంతమంది నెటిజన్లు విమర్శిస్తున్నారు. మరికొంతమంది విమర్శిస్తున్నారు.

సమాజంపై ప్రభావం.. మార్పు ఎవరిలో రావాలి?:

సినిమా అనేది సమాజానికి ప్రతిబింబం లాంటిది. హీరో వయసు పెరిగినా హీరోయిన్ మాత్రం ఎప్పుడూ 20 లేదా 30 ఏళ్లలోనే ఉండాలనే ధోరణి మహిళలపై ఉన్న వివక్షతను సూచిస్తుందని విశ్లేషకులు భావిస్తున్నారు. నటి వయసు 35 దాటితే ఆమెను 'అక్క, అమ్మ' పాత్రలకు పరిమితం చేసే ఇండస్ట్రీ, హీరోలకు మాత్రం 'నిత్య యవ్వనం' అపాదిస్తోంది. ఇక ఈ ధోరణి మారాలంటే మొదట ప్రేక్షకుల్లో మార్పు రావాలి. సీనియర్ హీరోలు తమ వయసుకు తగ్గ పాత్రలు చేస్తూ, తమ వయసుకు సరిపోయే నటీమణులతో నటించినప్పుడు కూడా ఆదరిస్తేనే దర్శకులు, నిర్మాతలు కొత్తగా ఆలోచిస్తారు. కేవలం గ్లామర్ కోసమే పడచు పిల్లలను ఎంచుకోవడం వల్ల కథలో సహజత్వం లోపిస్తోంది.

సోషల్ మీడియా యుగంలో ప్రేక్షకులు ప్రతి విషయాన్ని భూతద్దంలో పెట్టి చూస్తున్నారు. గతంలో ఎన్టీఆర్-శ్రీదేవి మధ్య 40 ఏళ్ల గ్యాప్ ఉన్నా ఆదరించిన జనం, ఇప్పుడు మాత్రం ముసలి హీరోలు పిల్లల వెంట పడుతున్నారంటూ ట్రోల్ చేస్తున్నారు. అయితే, దీనికి ఒక కారణం సీనియర్ హీరోయిన్లు ఇండస్ట్రీలో కరువవ్వడం కూడా కావచ్చు. అనుష్క, నయనతార, త్రిష లాంటి వారు అడపా దడపా కనిపిస్తున్నా, అందరు హీరోలకు సరిపోయే స్థాయిలో సీనియర్ భామలు అందుబాటులో లేరు. అయినప్పటికీ, కథ డిమాండ్ మేరకు కాకుండా కేవలం కమర్షియల్ లెక్కల కోసమే వయసు వ్యత్యాసాన్ని పట్టించుకోకపోవడం వల్ల సినిమాల్లోని 'సోల్' మిస్ అవుతోందనేది కాదనలేని సత్యం.

గమనిక: పైన పేర్కొన్న సమాచారం ఇండస్ట్రీలోని ప్రస్తుత పోకడలు, సోషల్ మీడియాలో జరుగుతున్న చర్చల ఆధారంగా రూపొందించబడింది. ఇది ఎవరినీ వ్యక్తిగతంగా విమర్శించే ఉద్దేశంతో రాసినది కాదు.