రేణు దేశాయ్ అసలైన సెకండ్ ఇన్నింగ్స్!

ఒకానొక దశలో నటిగా తనకంటూ ప్రత్యేకమైన గుర్తింపు తెచ్చుకున్న రేణు దేశాయ్ చాలా కాలం పాటు నటనకు దూరంగా ఉంటూ దర్శకత్వం ..సామాజిక సేవా కార్యక్రమాలపై దృష్టి పెట్టారు. మాస్ మహారాజా రవితేజ `టైగర్ నాగేశ్వరరావు` చిత్రంతో వెండితెరకు రీఎంట్రీ ఇచ్చినప్పటికీ ఆ సినిమా ఆశించిన స్థాయిలో విజయం సాధించకపోవడంతో ఆ పునరాగమనం పెద్దగా ప్రభావం చూపలే కపోయింది. అయితే నటనపై ఉన్న మక్కువను ఏమాత్రం తగ్గించుకోని రేణు మొక్కుబడి పాత్రలతో కాకుండా తనలోని అసలైన నటిని పరిచయం చేసే బలమైన పాత్రల కోసం ఎదురు చూశారు. రొటీన్ కమర్షియల్ హంగులకు దూరంగా, నటనకు పూర్తి ఆస్కారం ఉన్న ఇంటెన్స్ అండ్ ఎమోషనల్ రోల్స్‌తోనే తన సెకండ్ ఇన్నింగ్స్‌ను గట్టిగా ప్లాన్ చేసుకుంటున్నట్లు తెలుస్తోంది.

ప్రస్తుతం ఇండియన్ ఫిల్మ్ ఇండస్ట్రీలో ప్రయోగాత్మక చిత్రాలకు, పవర్‌ఫుల్ క్యారెక్టరైజేషన్స్‌కు విశేష స్పందన లభిస్తోంది. ఈ నేపథ్యంలో రేణు దేశాయ్ ఎంచుకున్న తదుపరి ప్రాజెక్ట్ అందరి దృష్టిని ఆకర్షిస్తోంది. స్టార్ హీరో ధనుష్ నటిస్తున్న ప్రతిష్టాత్మక `ఓం` చిత్రంలో ఒక కీలక పాత్రకు గ్రీన్ సిగ్నల్ ఇచ్చారు. ఇందులో ఏకంగా లెజెండరీ నటుడు మమ్ముట్టికి జోడీగా ఆమె నటిస్తుండటం విశేషం. పేరుకు మాత్రమే కాకుండా సినిమా కథనాన్ని మలుపు తిప్పే అత్యంత శక్తివంతమైన మరియు భావోద్వేగభరితమైన పాత్రలో ఆమె కనిపించనున్నారు.

మమ్ముట్టి లాంటి దిగ్గజ నటుడి సరసన నటించడం సాధారణమైన విషయం కాదు. ఈ పాత్ర ద్వారా ఆమె తన నటనలోని మరో కోణాన్ని వెండితెరపై ఆవిష్కరించే అవకాశం ఉందని సినీ వర్గాలు భావిస్తున్నాయి. వయసుకు తగినట్లుగా గ్లామర్ పాత్రలకే పరిమితం కాకుండా వైవిధ్యమైన నటనకు ప్రాధాన్యత ఇస్తూ ముందుకు సాగడం ఆమె పరిణతికి నిదర్శనం. వ్యక్తిగతంగా ఎన్నో బాధ్యతలను నిర్వర్తిస్తూనే నటిగా కెరీర్‌ను మళ్లీ గాడిలో పెట్టడానికి ఈ తరహా చిత్రాలు సరైన వేదికగా మారుతున్నాయి.

ఇలాంటి గ్లోబల్ ప్రాజెక్ట్‌లతో పాటు కంటెంట్ ఓరియెంటెడ్ సినిమాలను ఎంచుకోవడం ద్వారా రేణు దేశాయ్ తన సెకండ్ ఇన్నింగ్స్‌కు బలమైన పునాది వేసుకుంటున్నారు. ఈ సినిమాతో నటిగా మరోసారి ప్రేక్షకులను ఆశ్చర్యపరచడం ఖాయంగా కనిపిస్తోంది. సౌత్ సినిమాలలో అక్క, వదిన, లేదా బలమైన కుటుంబ నేపథ్యం ఉన్న పాత్రలకు ఎప్పుడూ మంచి డిమాండ్ ఉంటుంది. తెలుగు తెరపై అలాంటి పాత్రలకు తగిన నటీమణుల కొరత ఉన్న సమయంలో రేణు దేశాయ్ లాంటి మెచ్యూర్డ్ ఇమేజ్ ఉన్న నటి ఈ బాట పట్టడం సానుకూల పరిణామం. ఇలాంటి పవర్‌ఫుల్ అండ్ ఎమోషనల్ క్యారెక్టర్స్‌ను క్రమం తప్పకుండా ఎంచుకుంటే టాలీవుడ్‌లో వరుస అవకాశాలు క్యూ కట్టడం ఖాయం. కేవలం రీఎంట్రీ ఆర్టిస్ట్‌గా కాకుండా కథను మోసే కీలక నటిగా సెకండ్ ఇన్నింగ్స్‌ను విజయవంతంగా నడిపించగల సామర్థ్యం కనబరుస్తున్నారు.