150 కోట్లు.. రవితేజ రేంజ్ ఇక్కడే మారింది

‘ఇరుముడి’తో రవితేజ కెరీర్‌లో కొత్త రికార్డ్ చేరింది. మేకర్స్ విడుదల చేసిన పోస్టర్ ప్రకారం సినిమా ప్రపంచవ్యాప్తంగా రూ.150 కోట్ల గ్రాస్ దాటింది. ఇది రవితేజ కెరీర్‌లో తొలి రూ.150 కోట్ల సినిమా. మొదటి వారం ముగిసే సరికి ట్రేడ్ అంచనాల్లో దాదాపు రూ.125 కోట్ల దగ్గర ఉన్న సినిమా, రెండో వీకెండ్ మొదలయ్యాక మళ్లీ స్పీడ్ అందుకుంది. కొత్త సినిమాలు వచ్చినా షోలు తగ్గలేదు.

ముఖ్యంగా నైజాం లెక్క స్ట్రాంగ్ గా ఉంది. ట్రేడ్ రిపోర్ట్స్ ప్రకారం ఈ ఏరియాలోనే ‘ఇరుముడి’ రూ.50 కోట్లకు పైగా గ్రాస్ అందుకుంది. రవితేజ సినిమాలకు నైజాంలో ఇలాంటి నంబర్ రావడం ఇదే మొదటిసారి. పైగా ఈ సినిమా నైజాం హక్కులు రవితేజ దగ్గర ఉన్నట్లు ఇప్పటికే వార్తలు వచ్చాయి. అందుకే అక్కడ కలెక్షన్స్ పెరిగే కొద్దీ ఈ హిట్ అతనికి బాక్సాఫీస్ రికార్డుతో పాటు బిజినెస్ పరంగా కూడా పెద్ద లాభం ఇచ్చే అవకాశం ఉంది.

‘ఇరుముడి’ ముందు రవితేజ కెరీర్ హయ్యెస్ట్ గ్రాసర్ ‘ధమాకా’. ఆ సినిమా దాదాపు రూ.82 కోట్ల వరల్డ్‌వైడ్ గ్రాస్ దగ్గర నిలిచినట్లు ట్రేడ్ లెక్కలు ఉన్నాయి. ‘ఇరుముడి’ నాలుగో రోజుకే ఆ నంబర్ దాటేసింది. ఇప్పుడు రూ.150 కోట్ల మార్క్ కూడా చేరడంతో తన పాత కెరీర్ రికార్డును దాదాపు రెండింతలు చేసే రేంజ్ లో వెళ్లింది. ఒకప్పుడు రూ.100 కోట్ల మార్క్ కూడా రవితేజకు దూరంగా ఉండగా, ఈ సినిమా ఆ లెక్కను చాలా త్వరగా అందుకుంది.

రెండో వారం హోల్డ్ కూడా గట్టిగానే ఉంది. ‘టాక్సిక్’ రావడంతో మొదట ‘ఇరుముడి’కి కొన్ని చోట్ల షోలు తగ్గాయి. కానీ రెండో శుక్రవారం నుంచి మళ్లీ కలెక్షన్స్ పెరిగినట్లు ట్రాకింగ్ లెక్కలు చెబుతున్నాయి. ఫ్యామిలీ ఆడియన్స్ ఇంకా రావడం, వీకెండ్‌లో కొన్ని సెంటర్లలో హౌస్‌ఫుల్ షోలు నమోదవడం వల్ల రూ.150 కోట్ల మార్క్ త్వరగా వచ్చింది. అంటే మొదటి వీకెండ్ ఓపెనింగ్స్‌తోనే ఈ నంబర్ రాలేదు. రెండో వారంలో కూడా సినిమా తన రన్‌ను కొనసాగించింది.

ఇప్పటికే ఈ సినిమా ప్రీ రిలీజ్ బిజినెస్‌తో పోలిస్తే భారీ రిటర్న్స్ ఇచ్చిన ప్రాజెక్ట్‌గా మారింది. పెద్ద బడ్జెట్ సినిమాలు రూ.200 - 300 కోట్ల గ్రాస్ చేసినా బ్రేక్ ఈవెన్ కోసం ఇబ్బంది పడుతున్న ఈ ఏడాదిలో, ‘ఇరుముడి’ మాత్రం తక్కువ బిజినెస్‌తో వచ్చి చాలా త్వరగా లాభాల్లోకి వెళ్లింది. అందుకే రూ.150 కోట్ల నంబర్ కంటే డిస్ట్రిబ్యూటర్లకు వచ్చిన రిటర్న్స్ ఈ సినిమాకు మరింత ముఖ్యమైన లెక్క.

ఇప్పుడు ‘ఇరుముడి’ ముందు ఉన్న తర్వాతి టార్గెట్ రూ.200 కోట్ల మార్క్. అది దాటుతుందా లేదా అన్నది రెండో ఆదివారం తర్వాత మరింత క్లియర్ అవుతుంది. అయితే ఈ హిట్ తర్వాత రవితేజ తన తర్వాతి సినిమాల డీల్స్ ఎలా మార్చుకుంటాడన్నది కూడా చూడాలి. హషిత్ గోలి సినిమా, వివేక్ ఆత్రేయ సినిమా ముందే కుదిరాయి. వాటి తర్వాత ఎలాంటి కథలు సెలెక్ట్ చేసుకుంటాడో చూడాలి.