పోస్ట్ ప్రొడక్షన్‌లో ఆలస్యం.. స్టార్ సినిమాలకు కొత్త చిక్కులు!

ఒక‌ప్ప‌టిలా సినిమా షూటింగ్ పూర్తయిందంటే ఇక రిలీజ్‌కు అంతా సిద్ధమైనట్టే అనే రోజులు పోయాయి. ముఖ్యంగా భారీ బడ్జెట్, స్టార్ హీరోలు, పాన్ ఇండియా స్థాయి సినిమాల విషయంలో అసలు పరీక్ష షూటింగ్ తర్వాతే మొదలవుతోంది. వీఎఫ్ఎక్స్, సీజీ వర్క్, రీ-రికార్డింగ్, బ్యాక్‌గ్రౌండ్ స్కోర్, డబ్బింగ్, డీఐ, ఫైనల్ ఎడిటింగ్ వంటి పనులు సినిమాను అనుకున్న సమయానికి ప్రేక్షకుల ముందుకు తీసుకురావడంలో కీలకంగా మారాయి. దీంతో ఒకప్పుడు నిర్మాతలు ముందుగానే లాక్ చేసే రిలీజ్ డేట్స్.. ఇప్పుడు పరిస్థితులకు అనుగుణంగా మారే అవకాశాలు పెరిగాయి.

ప్రస్తుతం దసరా సీజన్ చుట్టూ జరుగుతున్న పరిణామాలు కూడా ఇదే విషయాన్ని మరోసారి స్పష్టం చేస్తున్నాయి. అక్టోబర్ 15న థియేటర్లలోకి రావాల్సిన భారీ బ‌డ్జెట్ మూవీ రిలీజ్ షెడ్యూల్‌లో మార్పు వస్తే.. దాని ఎఫెక్ట్ ఒక్క ఆ సినిమాకే పరిమితం కాదు. అదే విండో కోసం ఎదురు చూస్తున్న ఇతర సినిమాల‌కు కూడా అది కొత్త అవకాశాలను తెరుస్తుంది. ముఖ్యంగా ఫెస్టివల్ సీజన్‌లో మంచి థియేట్రికల్ స్పేస్, ఎక్కువ షోలు, ఫ్యామిలీ ఆడియ‌న్స్ స‌పోర్ట్ అంశాలు ఉండటంతో నిర్మాతలు కీలక డేట్స్ ను వదులుకోవడానికి అంత సులభంగా సిద్ధపడరు.

ఇక్కడే మరో ఆసక్తికరమైన పరిణామం కనిపిస్తోంది. రెండు సినిమాలు తమ షూటింగ్ దశను దాదాపుగా పూర్తి చేసుకుని, ప్రస్తుతం త‌మ సినిమాకు సంబంధించిన చివరి పనులపై దృష్టి పెట్టిన పరిస్థితిలో ఒకే డేట్‌పై ఆసక్తి చూపుతున్న‌ట్టు తెలుస్తోంది. ఒకవేళ అనుకున్న సినిమా వెనక్కి వెళితే ఖాళీ అయ్యే స్లాట్ కోసం నిఖిల్ స్వ‌యంభు, ధ‌నుష్ ఓమ్ చాప్ట‌ర్1 సినిమాల టీమ్స్ తమ ప్లానింగ్‌ను వేగంగా మార్చుకునే అవకాశ‌ముంది. అంటే ఒక సినిమా రిలీజ్ డేట్ మారడం.. మరో సినిమాకు అనూహ్యమైన ఫెస్టివల్ విండోగా మారొచ్చు.

అయితే ఇలాంటి టైమ్ లో డేట్‌ను ముందుగా అనౌన్స్ చేయ‌డం కంటే, ఫైనల్ అవుట్‌పుట్‌పై పూర్తి నమ్మకం రావడం నిర్మాతలకు మరింత ముఖ్యం. ముఖ్యంగా వీఎఫ్ఎక్స్ ఓరియెంటెడ్ సినిమాల్లో చిన్న ఆలస్యం కూడా రిలీజ్ డేట్‌పై ఎఫెక్ట్ చూపే అవకాశం ఉంటుంది. అదే సమయంలో పోటీ సినిమాల సంఖ్య, థియేటర్ల లభ్యత, మార్కెట్ పరిస్థితులు కూడా నిర్ణయంలో భాగమవుతున్నాయి. అందుకే ఇప్పుడు స్టార్ సినిమాల విషయంలో షూటింగ్ ఎప్పుడు పూర్తయింది? కంటే ఫైనల్ కాపీ ఎప్పుడు రెడీ అవుతుంద‌నేదే అసలు ప్రశ్నగా మారింది. దసరా వంటి కీలక సీజన్‌లో ఒకే డేట్ కోసం రెండు సినిమాలు పోటీ పడుతున్న పరిస్థితి.. రాబోయే రోజుల్లో రిలీజ్ రేసును మరింత ఆసక్తికరంగా మార్చే అవకాశముంది.