సుజీత్ డెసిష‌న్ తో నాని షెడ్యూల్ మారుతుందా?

హిట్3 స‌క్సెస్ తో మరోసారి తన మార్కెట్‌ను మరింత బలోపేతం చేసుకున్న నాని, ప్రస్తుతం కెరీర్‌లో అత్యంత బిజీ దశలో ఉన్న హీరోల్లో ఒకరిగా కనిపిస్తున్నారు. ఇప్పటికే ది ప్యారడైజ్ వంటి భారీ ప్రాజెక్ట్‌తో పాటూ డైరెక్ట‌ర్ సుజీత్ తో ఓ సినిమా చేయనున్నట్లు చాలాకాలంగా ఇండస్ట్రీలో చర్చ జరుగుతోంది. ఇప్పుడు ఆ లిస్ట్ లో డైరెక్ట‌ర్ వెంకీ అట్లూరి కూడా చేరినట్లు తెలుస్తోంది. సితార ఎంటర్‌టైన్‌మెంట్స్ బ్యానర్‌పై నాగ వంశీ నిర్మించనున్న ఈ ప్రాజెక్ట్ ప్రస్తుతం ప్రీ ప్రొడక్షన్ దశలో ఉండగా, షూటింగ్ 2026 చివర్లో ప్రారంభం కానున్నట్లు సమాచారం.

అయితే ఈ కొత్త కాంబినేషన్ కంటే ఇప్పుడు ఇండస్ట్రీ దృష్టిని ఎక్కువగా ఆకర్షిస్తున్న అంశం నాని నెక్ట్స్ షూటింగ్ షెడ్యూల్. దీనికి కారణం డైరెక్ట‌ర్ సుజీత్ తీసుకునే డెసిష‌నే కావడం విశేషం. సుజీత్ ముందుగా నానితో బ్లడీ రోమియో ను స్టార్ట్ చేస్తాడా లేక ప‌వ‌న్ క‌ళ్యాణ్ ఓజీ2కు ప్రాధాన్యం ఇస్తారా అనే అంశంపై క్లారిటీ రావాల్సి ఉంది. ఈ నిర్ణయమే నాని- వెంకీ అట్లూరి సినిమా ఎప్పుడు సెట్స్‌పైకి వెళ్తుందో కూడా నిర్ణయించే అవకాశాలు కనిపిస్తున్నాయి.

ఇండస్ట్రీ వర్గాల సమాచారం ప్రకారం, సుజీత్ ముందుగా బ్లడీ రోమియోను ప్రారంభిస్తే, నాని- వెంకీ అట్లూరి సినిమా కాస్త లేట్ గా మొదలయ్యే అవకాశ‌ముంది. అలా కాకుండా సుజీత్ తన ప్రియారిటీని ఓజీ2 వైపు మళ్లిస్తే, ఆ మధ్యలో వచ్చిన గ్యాప్‌ను ఉపయోగించుకుని నాని వెంకీ అట్లూరి సినిమాను ముందుగానే ప్రారంభించే అవకాశాలు ఉన్నాయని టాలీవుడ్‌లో చర్చ సాగుతోంది. అంటే ఒక డైరెక్ట‌ర్ ప్రాజెక్ట్ ప్లానింగ్, మరో రెండు భారీ సినిమాల టైమ్‌లైన్‌ను ప్రభావితం చేసే పరిస్థితి ఏర్పడిందన్న మాట.

ఇక వెంకీ అట్లూరి విషయానికి వస్తే, గత కొన్నేళ్లుగా వరుస స‌క్సెస్‌ల‌తో స్టార్ హీరోల నమ్మకాన్ని సంపాదించుకున్న డైరెక్ట‌ర్ గా ఎదిగారు. స్ట్రాంగ్ ఎమోష‌న్స్, ఫ్యామిలీ ఆడియ‌న్స్ ను ఆకట్టుకునే కథనం, కమర్షియల్ అంశాల సమతుల్యతతో ఆయన రూపొందించిన సినిమాలు మంచి గుర్తింపు తెచ్చుకున్నాయి. అందుకే ఇప్పుడు ప్రముఖ హీరోల లైనప్‌లో ఆయన పేరు వరుసగా వినిపిస్తోంది. అలాంటి డైరెక్ట‌ర్‌తో నాని తొలిసారి జతకట్టడం కూడా ఈ ప్రాజెక్ట్‌పై అంచనాలను మరింత పెంచుతోంది.

మరోవైపు, నిర్మాత నాగ వంశీ, సితార ఎంటర్‌టైన్‌మెంట్స్ నిర్మాణ విలువలు కూడా ఈ సినిమాపై ఆసక్తిని పెంచుతున్నాయి. డైరెక్ట‌ర్, హీరో, నిర్మాతల కాంబినేషన్‌ను బట్టి ఇది భారీ స్థాయిలో రూపొందే అవకాశముందని సినీ వర్గాలు భావిస్తున్నాయి. అఫీషియ‌ల్ గా స్టోరీ, జానర్ లేదా బడ్జెట్‌పై ఎలాంటి అనౌన్స్‌మెంట్ రాకపోయినా, ఈ కాంబో ఇప్పటికే మంచి బజ్‌ను సొంతం చేసుకుంది. మొత్తానికి, నాని లైనప్ ఎంత బలంగా ఉన్నప్పటికీ, అందులో నెక్ట్స్ స్టెప్ ఎటు పడుతుందనేది మాత్రం సుజీత్ తీసుకునే నిర్ణయంపైనే ఆధారపడినట్లు కనిపిస్తోంది.