హిట్లకంటే నిలదొక్కుకోవడమే గొప్పది: కిరణ్ అబ్బవరం

ఆది సాయి కుమార్ హీరోగా నటించిన తాజా చిత్రం “శంబాల” ఈ నెల 25న థియేటర్లలో విడుదలకు సిద్ధమవుతోంది. ఈ సందర్భంగా చిత్ర బృందం ఘనంగా ప్రీ రిలీజ్ ఈవెంట్ నిర్వహించింది. ఈ కార్యక్రమానికి హీరో కిరణ్ అబ్బవరం ముఖ్య అతిథిగా హాజరయ్యారు. ఈ వేదికపై కిరణ్ అబ్బవరం మాట్లాడిన మాటలు శంబాల టీమ్‌కు మరింత ధైర్యాన్ని, ఉత్సాహాన్ని ఇచ్చాయి.

ఈ ఈవెంట్‌లో కిరణ్ అబ్బవరం, ఆది తండ్రి సీనియర్ నటుడు సాయి కుమార్‌తో తనకు ఉన్న అనుబంధాన్ని గుర్తు చేసుకున్నారు. అలాగే ఆది సాయి కుమార్ సినీ ప్రయాణాన్ని ప్రశంసిస్తూ ఆయనకు బెస్ట్ విశెస్ తెలిపారు.

కిరణ్ అబ్బవరం మాట్లాడుతూ, “శంబాల మూవీ గురించి ప్రతి ఒక్కరూ పాజిటివ్‌గా మాట్లాడుతున్నారు. ఆది అన్నకు ఈ సినిమా పెద్ద హిట్ ఇవ్వాలి” అన్నారు. అలాగే తన కెరీర్‌లో సాయి కుమార్ పాత్రను గుర్తు చేస్తూ, “ఇండస్ట్రీలో నాకు దగ్గరగా తెలిసిన పెద్ద హీరో సాయి కుమార్ గారే. ఆయన నా ‘ఎస్ ఆర్ కల్యాణమండపం’ సినిమాలో నటించడం నా కెరీర్ గ్రోత్‌కు చాలా ఉపయోగపడింది” అని చెప్పారు.

అంతేకాదు, “ఆ సినిమా ఆయన లేకుండా ఎలా ఉండేదో నాకు తెలియదు. అప్పటి నుంచి నా ప్రతి సినిమాకు సాయి కుమార్ గారు నన్ను ఎంకరేజ్ చేస్తూనే ఉన్నారు” అని తెలిపారు. సాయి కుమార్ చెప్పిన మాటలు తన జీవితానికి మార్గదర్శకంగా మారాయని చెబుతూ, “సక్సెస్, ఫెయిల్యూర్ కాదు… క్రమశిక్షణే ముఖ్యమని ఆయన చెప్పిన మాటలు నా కెరీర్‌లో చాలా ఉపయోగపడ్డాయి” అన్నారు.

సాయి కుమార్ వ్యక్తిత్వాన్ని ప్రశంసిస్తూ, “సాయి గారు ఇండస్ట్రీలో అందరూ బాగుండాలని కోరుకునే మనసున్న వ్యక్తి. అందుకే ఆయన పిలిస్తే అందరూ ఈవెంట్స్‌కు వస్తారు” అని కిరణ్ అన్నారు.

ఆది సాయి కుమార్ కెరీర్ గురించి మాట్లాడుతూ, “ఆది అన్న ‘ప్రేమ కావాలి’ సినిమా టైమ్‌లో నేను బీటెక్ చేస్తున్నాను. ఆ సినిమా పాటలకు డ్యాన్స్ చేయని స్టూడెంట్ ఉండేవాడు కాదు” అని గుర్తు చేసుకున్నారు. అలాగే, “దాదాపు 14 ఏళ్లుగా ఆది అన్న కంటిన్యూగా ఎఫర్ట్స్ పెట్టి సినిమాలు చేయడం చాలా పెద్ద విషయం. హిట్లు కొట్టడం ఒకెత్తు అయితే, ఇండస్ట్రీలో నిలదొక్కుకోవడం మరో ఎత్తు” అన్నారు. చివరగా, “శంబాల మూవీ పెద్ద సక్సెస్ కావాలని మనస్ఫూర్తిగా కోరుకుంటున్నాను” అంటూ తన స్పీచ్‌ను ముగించారు.

కిరణ్ అబ్బవరం మాటలతో శంబాల టీమ్‌లో కొత్త ఉత్సాహం కనిపించింది. ఈ సినిమా ఆది సాయి కుమార్ కెరీర్‌కు మరో మంచి మైలురాయిగా నిలుస్తుందని అభిమానులు ఆశిస్తున్నారు.