హీరోలతో రొమాన్స్ మాత్రమే కాదు.. సిస్టర్స్ గా కూడా..

ఒకప్పుడు హీరోయిన్స్ అంటే హీరోల పక్కన గ్లామర్ రోల్స్ కి మాత్రమే సరిపోతారు అనే రోజుల నుంచి యాక్షన్ పర్ఫామెన్స్ చేసే స్థాయికి చేరుకున్నారు. పాత్ర డిమాండ్ చేస్తే ఎలాంటి పాత్రలోనైనా సరే నటించడానికి సిద్ధం అయిపోతున్నారు. ఈ క్రమంలోనే ఒకప్పుడు హీరోలతో రొమాన్స్ చేసిన ఎంతో మంది హీరోయిన్లు అదే హీరోల పక్కన సిస్టర్స్ గా నటించి అందరిని ఆశ్చర్యపరిచారు. ఇకపోతే అలా హీరోల పక్కన హీరోయిన్లుగా నటించి, ఆ తర్వాత కాలంలో అదే హీరో పక్కన సిస్టర్స్ గా నటించిన ఆ హీరోయిన్స్ ఎవరో ఇప్పుడు చూద్దాం..

సావిత్రి - ఎన్టీఆర్ :

సావిత్రి, ఎన్టీఆర్ కాంబినేషన్లో మిస్సమ్మ, బండ రాముడు, మాయాబజార్, గుండమ్మ కథ, కుటుంబ గౌరవం, చంద్రహారం వంటి సినిమాలు వచ్చాయి. ఇందులో వీరిద్దరూ జంటగా నటించారు. అయితే అలా ఎన్నో చిత్రాలలో ఎన్టీఆర్ సరసన హీరోయిన్గా చేసిన ఈమె.. ఆ తర్వాత రక్తసంబంధం సినిమాలో ఎన్టీఆర్ కి చెల్లెలుగా నటించింది.

శోభన్ బాబు - శ్రీదేవి:

టాలీవుడ్ సినీ ఇండస్ట్రీలో అద్భుతమైన ఆన్ స్క్రీన్ కెమిస్ట్రీ పండించి.. ప్రేక్షకులను ఆకట్టుకున్న జోడీలలో శోభన్ బాబు - శ్రీదేవి జంట కూడా ఒకటి. వీరిద్దరి కాంబినేషన్లో 1979లో వచ్చిన కార్తీకదీపం సినిమా మంచి విజయాన్ని అందుకుంది. ఆ తర్వాత ఇల్లాలు, కక్ష వంటి సినిమాలలో జంటగా నటించి ఆకట్టుకున్నారు. అలా శోభన్ బాబు పక్కన హీరోయిన్గా రొమాన్స్ చేసిన ఈమె.. 1979లో వచ్చిన బంగారు చెల్లెలు చిత్రంలో ఆయనకు సోదరిగా నటించి ఆకట్టుకుంది. ముఖ్యంగా ఈ సినిమాలో వీరిద్దరి మధ్య వచ్చే "విరిసిన సిరిమల్లె.. పెరిగే జాబిల్లి" పాట సూపర్ హిట్ గా నిలిచింది

ఎన్టీఆర్ - వాణిశ్రీ:

హీరో హీరోయిన్లుగా వీరిద్దరి కాంబినేషన్లో జీవిత చక్రం, నిండు హృదయాలు, రైతుబిడ్డ, మనుషుల్లో దేవుడు, ఎదురులేని మనిషి, అదృష్ట జాతకుడు వంటి సినిమాలు వచ్చాయి. అయితే చిట్టి చెల్లెలు అనే సినిమాలో ఎన్టీఆర్ కి చెల్లెలుగా నటించింది వాణిశ్రీ.

చిరంజీవి - ఖుష్బూ:

వీరిద్దరూ కలసి శుభగృహ గ్రూపు అనే ఒక రియల్ ఎస్టేట్ ప్రకటన కోసం జంటగా కనిపించారు. అయితే అంతకుముందు 2006లో స్టాలిన్ సినిమాలో చిరంజీవికి సోదరి పాత్రలో నటించింది ఖుష్బూ.

చిరంజీవి - నయనతార:

మెగాస్టార్ చిరంజీవి నటించిన హిస్టారికల్ మూవీ సైరా నరసింహారెడ్డి సినిమాలో చిరంజీవి సరసన హీరోయిన్గా నటించిన నయనతార.. ఇప్పుడు మరొకసారి మన శంకర్ వరప్రసాద్ గారు అనే సినిమాలో కూడా జతకట్టింది. ఈ సినిమా ఇంకా విడుదల కాలేదు. ఇకపోతే చిరంజీవి సరసన హీరోయిన్గా నటించిన ఈమె 2022లో గాడ్ ఫాదర్ సినిమాలో చిరంజీవికి చెల్లిగా నటించింది.

ఇలా వీరంతా కూడా ఈ హీరోల పక్కన హీరోయిన్గా నటించి ఆ తర్వాత సోదరీమణులుగా కూడా నటించి ఆకట్టుకున్నారు.ఇకపోతే మరికొంతమంది స్టార్ హీరోయిన్స్ ఆ స్టార్ హీరోల పక్కన హీరోయిన్ గా నటించకపోయినా.. చెల్లెలుగా నటించి మెప్పించారు. ఇక ఆ జాబితా విషయానికి వస్తే..

మంచు విష్ణు - కాజల్ అగర్వాల్ (మోసగాళ్లు ), అల్లరి నరేష్ - కార్తీక్ నాయర్ (బ్రదర్ అఫ్ బొమ్మాలి), శ్రీహరి - త్రిష (నువ్వొస్తానంటే నేనొద్దంటానా, కింగ్), ఉపేంద్ర - నిత్యామీనన్ (సన్నాఫ్ సత్యమూర్తి), రాజశేఖర్ - మీరాజాస్మిన్ (గోరింటాకు), పవన్ కళ్యాణ్ - సంధ్య (అన్నవరం), బాలకృష్ణ - దేవయాని (చెన్నకేశవరెడ్డి) , నితిన్ - సింధుతులాని (ఇష్క్).