కాక్‌టెయిల్2 సెన్సార్ సర్టిఫికేట్ వెనుక అసలు కథ ఇదేనా?

సినిమా రిలీజ్ కు ముందే విలాసవంతమైన లొకేషన్లు, స్టైలిష్ విజువల్స్, ఆకర్షణీయమైన ప్రమోషన్లతో మంచి బజ్‌ను సొంతం చేసుకున్న కాక్‌టెయిల్2, రిలీజ్ తర్వాత మరో కారణంతో చర్చనీయాంశంగా మారింది. ఈ సినిమాకు లభించిన A సర్టిఫికేట్ ప్రేక్షకుల్లో పెద్ద ఎత్తున చర్చకు దారితీసింది. ముఖ్యంగా సినిమా చూసిన తర్వాత పలువురు ఈ సర్టిఫికేషన్‌పై ఆశ్చర్యం వ్యక్తం చేస్తున్నారు. 2012లో రిలీజైన ఒరిజినల్ కాక్‌టెయిల్ ప్రేమ, స్నేహం, సంబంధాల చుట్టూ తిరిగే యూత్‌ఫుల్ ఎంటర్‌టైనర్‌గా గుర్తింపు పొందిన విష‌యం తెలిసిందే. అందువల్ల సీక్వెల్ కూడా అదే తరహాలో ఉంటుందని చాలా మంది భావించారు. అయితే కాక్‌టెయిల్2 కథలో పాత్రల మధ్య సంఘర్షణలు, సంబంధాల సంక్లిష్టత వంటి అంశాలకు ఎక్కువ ప్రాధాన్యం ఇచ్చార‌ని ఆడియ‌న్స్ అభిప్రాయ‌ప‌డుతున్నారు. కొందరు నెటిజన్లు ఇది మామూలు ల‌వ్‌స్టోరీ కాదని, రిలేషన్‌షిప్ డ్రామాగా రూపొందిందని వ్యాఖ్యానిస్తున్నారు.

అయితే ఎన్ని వివ‌ర‌ణలు ఉన్నప్పటికీ, ఈ సినిమాకు A సర్టిఫికేట్ అవసరమా అనే ప్రశ్న మాత్రం సోషల్ మీడియాలో కొనసాగుతోంది. పలువురు ప్రేక్షకులు సినిమాలో మ‌రీ ఎక్కువ‌గా బోల్డ్ లేదా షాకింగ్ కంటెంట్ కనిపించలేదని అభిప్రాయపడుతున్నారు. ఈ నేప‌థ్యంలో ఇత‌ర సినిమాల‌తో పోలికలు కూడా తెరపైకి వస్తున్నాయి. ఇటీవల రిలీజైన కొన్ని సినిమాల్లో మరింత గ్లామర్, ఇంటిమేట్ సీన్స్ ఉన్నప్పటికీ U/A 16+ సర్టిఫికేట్ లభించగా, కాక్‌టెయిల్2కు A సర్టిఫికేట్ రావడం చర్చకు కారణమైంది. ఈ నేపథ్యంలో మరో ఆసక్తికర వాదన కూడా వినిపిస్తోంది. A సర్టిఫికేట్‌ను చిత్ర ప్రమోషన్‌లో భాగంగా ఉపయోగించి ఆసక్తిని పెంచే ప్రయత్నం జరిగి ఉండవచ్చని కొందరు నెటిజన్లు అభిప్రాయపడుతున్నారు. గతంలో కొన్ని సినిమాలు వివాదాలు, సెన్సార్ సర్టిఫికేషన్ డిస్క‌ష‌న్స్ ద్వారా ఎక్కువ వార్త‌ల్లో నిలిచి, సినిమాకు మంచి ప్ర‌మోష‌న్స్ ద‌క్కిన సందర్భాలను ఉదాహరణగా చూపిస్తూ, కాక్‌టెయిల్2 విషయంలో కూడా అలాంటి స్ట్రాట‌జీ ఉండొచ్చని సోషల్ మీడియాలో పోస్టులు కనిపిస్తున్నాయి.

మరోవైపు, A సర్టిఫికేట్ ఎఫెక్ట్ ఫ్యామిలీ ఆడియన్స్‌పై ఎలా ఉంటుందనే అంశం కూడా చర్చకు వస్తోంది. సాధారణంగా ఫ్యామిలీ ఆడియ‌న్స్ అంద‌రూ కలిసి చూడగల సినిమాల‌కే ఎక్కువ ప్రాధాన్యం ఇస్తుంటారు. ఈ నేపథ్యంలో A రేటింగ్ కారణంగా కొంతమంది ఆడియ‌న్స్ థియేటర్లకు దూరంగా ఉండే అవకాశం ఉందని ట్రేడ్ వర్గాలు విశ్లేషిస్తున్నాయి. అదే సమయంలో యూత్ ఆడియ‌న్స్ లో మాత్రం ఈ సర్టిఫికేట్ ఆసక్తిని పెంచినట్లు కనిపిస్తోంది.

అయితే సెన్సార్ స‌ర్టిఫికేట్ మొద‌ట్లో ఓపెనింగ్ బ‌జ్ ను తీసుకురాగలదేమో గానీ, లాంగ్ ర‌న్ స‌క్సెస్‌ను డిసైడ్ చేసేది మాత్రం కంటెంటే అని ఇండ‌స్ట్రీ వ‌ర్గాలు అభిప్రాయ‌ప‌డుతున్నాయి. కంటెంట్ మాత్రమే. A సర్టిఫికేట్ చుట్టూ మొద‌లైన డిస్క‌ష‌న్ కాక్‌టెయిల్2కు ఎక్స్‌ట్రా బ‌జ్ ను తీసుకొచ్చినప్పటికీ, ఆ బ‌జ్ బాక్సాఫీస్ వద్ద ఎంతవరకు కలెక్షన్లుగా మారుతుందనేది రానున్న రోజుల్లో తేలనుంది.