ఆ తప్పు మళ్లీ చేయనంటున్న బన్నీ వాసు!

టాలీవుడ్‌లో కంటెంట్ ఓరియెంటెడ్ సినిమాలకు ఇటీవల మంచి ఆదరణ లభిస్తున్న నేపథ్యంలో మరో ఆసక్తికరమైన ప్రాజెక్ట్ రూపుదిద్దుకుంటోంది. నిర్మాత బన్నీ వాసు నేతృత్వంలోని బ్యానర్, సుకుమార్ రైటింగ్స్ కలిసి ప్రియ‌ద‌ర్శి ప్రధాన పాత్రలో ఉంచి ఓ కొత్త సినిమాను నిర్మించేందుకు సిద్ధమవుతున్నట్లు సినీ వర్గాల్లో బలమైన చర్చ జరుగుతోంది. ఇప్పటికే ఈ ప్రాజెక్ట్‌కు సంబంధించిన ప్రాథమిక చర్చలు పూర్తయ్యాయని, త్వరలోనే అధికారిక ప్రకటన కూడా వచ్చే అవకాశాలు ఉన్నాయని సమాచారం.

ఇండ‌స్ట్రీలో త‌న‌కంటూ ప్రత్యేక గుర్తింపు సంపాదించుకున్న ప్రియదర్శి, కథకు ప్రాధాన్యత ఉన్న సినిమాల ఎంపికలో ప్రత్యేక శ్రద్ధ చూపిస్తున్నారు. కమర్షియల్ అంశాలతో పాటు ఎమోష‌న్స్ ను సమతూకంగా మేళవించే కథలను ఎంచుకుంటూ తన మార్కెట్‌ను కూడా విస్తరించుకుంటున్నారు. అలాంటి టైమ్ లో బన్నీ వాసు, సుకుమార్ రైటింగ్స్ కలయికలో ఆయన చేయబోతున్న ఈ కొత్త సినిమా ఇండస్ట్రీలో ఆసక్తిని పెంచుతోంది. ఈ ప్రాజెక్ట్‌లో హీరోయిన్ ఎంపిక విషయంలో మేకర్స్ పెద్ద సర్‌ప్రైజ్ ప్లాన్ చేస్తున్నారని సమాచారం. సాధారణంగా ఊహించని ఓ నటిని ఈ సినిమాలో హీరోయిన్‌గా తీసుకురావాలనే ఆలోచనలో ఉన్నట్లు తెలుస్తోంది. దీంతో ఈ సినిమా గురించి ప్రేక్షకుల్లో మరింత ఆసక్తి నెలకొంది. కథ, నటీనటుల ఎంపిక, టెక్నికల్ టీమ్ వంటి అంశాలపై ప్రస్తుతం తుది నిర్ణయాలు జరుగుతున్నాయని సమాచారం.

అయితే ఈ కొత్త ప్రాజెక్ట్ చర్చలోకి రావడంతో బన్నీ వాసు, ప్రియదర్శి కాంబినేషన్‌లో గతంలో వచ్చిన మిత్రమండలి సినిమా కూడా మరోసారి ప్రస్తావనకు వస్తోంది. మంచి అంచనాల మధ్య రిలీజైన ఆ సినిమా బాక్సాఫీస్ వద్ద ఆశించిన స్థాయిలో స‌క్సెస్‌ను అందుకోలేకపోయింది. ముఖ్యంగా కామెడీ ఎంటర్‌టైనర్‌గా తెరకెక్కిన ఆ సినిమా ప్రేక్షకులను పూర్తిస్థాయిలో ఆకట్టుకోలేకపోవడంతో నిర్మాతగా బన్నీ వాసు నిరాశ చెందాల్సి వచ్చింది. ఆ సినిమా రిలీజ్ త‌ర్వాత బన్నీ వాసు చేసిన కామెంట్స్ సైతం అప్పట్లో చర్చనీయాంశంగా మారాయి. మిత్రమండలి విషయంలో కొన్ని కీలకమైన పొరపాట్లు జరిగాయని ఆయన స్వయంగా అంగీకరించారు. ముఖ్యంగా సినిమా ఫైనల్ కాపీని పూర్తిగా చూసుకోకుండానే రిలీజ్ చేశానని, థియేటర్లలో ప్రేక్షకులు నవ్వుతారని భావించిన కొన్ని సీన్స్ ఆశించిన విధంగా పనిచేయలేదని ఆయన బహిరంగంగా వెల్లడించారు. నిర్మాతగా తీసుకోవాల్సిన కొన్ని జాగ్రత్తలను ఆ సమయంలో విస్మరించానని కూడా చెప్పడం విశేషం.

అందుకే ఇప్పుడు ప్రియదర్శితో చేయబోతున్న కొత్త సినిమా విషయంలో బన్నీ వాసు మరింత జాగ్రత్తగా వ్యవహరిస్తున్నారని తెలుస్తోంది. గత అనుభవాల నుంచి పాఠాలు నేర్చుకుని స్టోరీ డెవ‌ల‌ప్‌మెంట్ నుంచి ఫైనల్ అవుట్‌పుట్ వరకు ప్రతి అంశాన్ని దగ్గరుండి పర్యవేక్షించేలా ప్రణాళికలు రూపొందిస్తున్నారని ఇండస్ట్రీ వర్గాలు చెబుతున్నాయి. మరోవైపు సుకుమార్ రైటింగ్స్ భాగస్వామ్యం కూడా ఈ ప్రాజెక్ట్‌కు అదనపు బలం చేకూర్చే అంశంగా కనిపిస్తోంది.

ప్రియదర్శి ప్రస్తుతం ఉన్న ఫామ్, బన్నీ వాసు తీసుకుంటున్న జాగ్రత్తలు, సుకుమార్ రైటింగ్స్ టెక్నిక‌ల్ స‌పోర్ట్ వంటి అంశాలు కలిసి ఈ సినిమాపై మంచి అంచనాలను పెంచుతున్నాయి. గతంలో ఎదురైన నిరాశను పక్కనబెట్టి ఈసారి బలమైన కంటెంట్‌తో ప్రేక్షకుల ముందుకు వచ్చి బాక్సాఫీస్ వద్ద విజయాన్ని అందుకుంటారా లేదా అనేది ఆసక్తికరంగా మారింది. అధికారిక ప్రకటన వెలువడే వరకు ఈ ప్రాజెక్ట్‌పై సినీ అభిమానుల్లో ఉత్కంఠ కొనసాగనుంది.