ఎన్టీఆర్ డైలాగ్ తో అదరగొట్టిన భాగ్యశ్రీ

సోషల్ మీడియాలో ఎప్పుడూ ఏదో ఒక కొత్త అప్డేట్ తో హడావిడి చేసే భాగ్యశ్రీ బోర్సే ఇప్పుడు ఒక సరికొత్త వీడియోతో అందరిని ఎట్రాక్ట్ చేసింది. సాధారణంగా గ్లామర్ ఫోటోలతో ఫ్యాన్స్ కు టచ్ లో ఉండే ఈ భామ.. ఈసారి మాత్రం తనలోని అసలైన టాలెంట్ ను బయటపెట్టింది. ఆమె అద్భుతంగా చెప్పిన ఒక లెజెండరీ డైలాగ్ వీడియో ఇప్పుడు నెట్టింట తెగ వైరల్ అవుతోంది.

తెలుగు సినిమా చరిత్రలో ఎన్టీఆర్ నటించిన దాన వీర శూర కర్ణ సినిమాకు ఎంతటి క్రేజ్ ఉందో ప్రత్యేకంగా చెప్పాల్సిన అవసరం లేదు. అందులో దుర్యోధనుడి పాత్రలో ఆయన చెప్పిన 'ఎంత మాట ఎంత మాట' అనే డైలాగ్ ఇప్పటికీ ఒక ఎపిక్ లాగా నిలిచిపోయింది. అంతటి కష్టమైన పౌరాణిక డైలాగ్ ను భాగ్యశ్రీ చాలా సునాయాసంగా చెప్పేయడం అందరినీ ఆశ్చర్యపరుస్తోంది.

అసలు తెలుగు మాతృభాష కాని ఒక నటి ఇంత స్పష్టంగా డైలాగ్ చెప్పడం నిజంగా మెచ్చుకోవాల్సిన విషయమే. ఈ వీడియోలో ఆమె పలికిన ప్రతి పదం చాలా స్పష్టంగా ఉంది. క్షత్రియ పరీక్ష, కుల పరీక్ష లాంటి పదాలను పలకడంలో ఆమె తీసుకున్న జాగ్రత్త క్లియర్ గా తెలుస్తోంది. ఆ డైలాగ్ కు తగ్గట్టుగా కళ్ళతో ఆమె ఇచ్చిన ఎక్స్ ప్రెషన్స్ సీన్ కు మరింత అందాన్ని తీసుకొచ్చాయి. కేవలం డైలాగ్ బట్టీ పట్టకుండా దాని అర్థం తెలుసుకుని ఫీల్ తో చెప్పినట్లు ఆమె హావభావాలు చూస్తే మనకు ఇట్టే అర్థమైపోతుంది.

బ్లూ కలర్ శారీలో మెరిసిపోతూ చాలా అందంగా కనిపిస్తున్న భాగ్యశ్రీ.. ఏదో క్యాజువల్ గా మాట్లాడుతున్నట్లు అనిపిస్తూనే సడన్ గా ఆ పవర్ ఫుల్ డైలాగ్ తో సర్ ప్రైజ్ చేసింది. సాధారణంగా నిలబడి ఆమె ఆ రేంజ్ లో డైలాగ్ చెబుతుంటే పక్కన ఉన్న హీరో అఖిల్, యాంకర్ సుమ కూడా అలా ఆశ్చర్యంగా చూస్తుండిపోయారు. చేతులతో యాక్షన్ చేస్తూ, ఒక పర్ఫెక్ట్ టైమింగ్ తో ఎక్కడా తడబడకుండా ఆమె చెప్పిన విధానం ప్రతి ఒక్కరినీ భలే ఆకట్టుకుంటోంది.

ఈ వీడియో చూసిన నెటిజన్లు ఆమె స్క్రీన్ ప్రెజెన్స్ కు ఫిదా అయిపోతున్నారు. టాలీవుడ్ లో హీరోయిన్ గా రాణించాలి అంటే కేవలం అందం ఒక్కటే సరిపోదు, భాష మీద పట్టు కూడా చాలా అవసరం. ఇక్కడి ప్రేక్షకులు తమ భాషను గౌరవించి మాట్లాడే వారికి ఎప్పుడూ పెద్ద పీట వేస్తారు. ఇప్పుడు భాగ్యశ్రీ చేస్తున్న ఈ ప్రయత్నం చూస్తుంటే ఆమె తెలుగు ఇండస్ట్రీలో లాంగ్ ఇన్నింగ్స్ ఆడేలానే కనిపిస్తోంది.

ప్రస్తుతం అఖిల్ అక్కినేని హీరోగా వస్తున్న లెనిన్ సినిమాలో పల్లెటూరి అమ్మాయి భారతి పాత్రలో నటిస్తున్న ఈమెకు.. ఈ భాషా పట్టు ఆ డీగ్లామర్ క్యారెక్టర్ కు బాగా ప్లస్ అవుతుంది అనడంలో ఎలాంటి సందేహం లేదు. కొత్తగా ఇండస్ట్రీకి వచ్చే హీరోయిన్లు గ్లామర్ మీద పెట్టిన శ్రద్ధ భాష నేర్చుకోవడం మీద పెద్దగా పెట్టరు అనే ఒక టాక్ ఎప్పటినుంచో ఉంది. కానీ భాగ్యశ్రీ మాత్రం ఇలాంటి క్లిష్టమైన డైలాగ్ తో ఆ కామెంట్స్ కు గట్టిగా చెక్ పెట్టింది. తన నాచురల్ స్క్రీన్ ప్రెజెన్స్ తో పాటు ఇలాంటి డెడికేషన్ కంటిన్యూ చేస్తే టాలీవుడ్ లో ఆమె త్వరలోనే ఒక మంచి స్థాయికి చేరుకోవడం ఖాయం అని సినీ అభిమానులు అభిప్రాయపడుతున్నారు.