తెలంగాణ ఇమేజ్‌పై డిబేట్.. బద్రప్ప రియాక్షన్ హాట్ టాపిక్!

ప్రస్తుతం టాలీవుడ్‌లో తెలంగాణ బ్యాక్‌డ్రాప్ సినిమాల ట్రెండ్ నడుస్తోంది. ఈ క్రమంలో అనుపమ పరమేశ్వరన్, తరుణ్ భాస్కర్, అఖిల్ రాజ్ ప్రధాన పాత్రల్లో తెరకెక్కుతున్న చిత్రం ‘క్రేజీ కళ్యాణం’. భద్రప్ప గాజుల దర్శకత్వంలో వస్తున్న ఈ సినిమా టీజర్ లాంచ్ సందర్భంగా, సినిమాల్లో తెలంగాణ క్యారెక్టర్లపై వచ్చే విమర్శలు, తాగుబోతు పాత్రల చిత్రీకరణపై రిపోర్టర్లు అడిగిన ప్రశ్నలకు దర్శకుడు చాలా ఆసక్తికరంగా స్పందించారు.

తెలంగాణ బ్యాక్‌డ్రాప్‌లో క్రేజీ ప్రాజెక్ట్:

సంస్కృతి, యాస, భాషల నేపథ్యంలో వచ్చే సినిమాలు బాక్సాఫీస్ వద్ద విజయం సాధిస్తుండటంతో స్టార్స్ కూడా ఇలాంటి కథలపై ఆసక్తి చూపుతున్నారు. ఇక మలయాళ బ్యూటీ అనుపమ పరమేశ్వరన్ మొదటిసారి పక్కా తెలంగాణ అమ్మాయిగా అలరించబోతున్న చిత్రం ‘క్రేజీ కళ్యాణం’. శనివారం విడుదలైన ఈ సినిమా టీజర్‌కు ప్రేక్షకుల నుంచి మంచి స్పందన లభించింది.

తెలంగాణ క్యారెక్టర్లపై సాగుతున్న డిబేట్:

ప్రెస్ మీట్ సందర్భంగా ఓ విలేకరి స్పందిస్తూ.. "సినిమాల్లో తెలంగాణ అనగానే తాగుబోతు క్యారెక్టర్ ఉండాలనే ముద్ర పడిపోయింది, దీనిపై విమర్శలు వస్తున్నాయి కదా? ఇందులో తరుణ్ భాస్కర్ గారి క్యారెక్టర్ కూడా అలాగే ఉంటుందా?" అని ప్రశ్నించారు. ఈ ప్రశ్న ప్రస్తుతం టాలీవుడ్ వర్గాల్లో పెద్ద డిబేట్‌గా మారింది.

దర్శకుడు బద్రప్ప గాజుల వివరణ:

ఈ ప్రశ్నపై దర్శకుడు బద్రప్ప గాజుల క్లారిటీ ఇస్తూ స్పందించారు. "తెలంగాణ అంటేనే తాగుబోతులు అనే అపోహను మేము ప్రోత్సహించడం లేదు."తాగుబోతులంటే చిన్నచూపు చూడటం లేదా వేరేలా చూపించడం మా ఉద్దేశం కాదు. ఇక మా సినిమాలో తరుణ్ భాస్కర్ గారి పాత్ర ఎవరికీ హాని చేయని చాలా అమాయకమైనది" అని చెప్పారు.

సిట్యుయేషనల్ కామెడీ కోసమే:

సినిమాలోని కథాంశం, సన్నివేశాల పరంగా వచ్చే వినోదాన్ని పండించడానికే ఆ క్యారెక్టర్‌ను తీర్చిదిద్దామని బద్రప్ప స్పష్టం చేశారు. ఇక ఎవరినీ తక్కువ చేసి చూపించే ఆలోచన లేదని, గ్రామీణ నేటివిటీని మరియు సహజమైన హాస్యాన్ని మాత్రమే ప్రతిబింబించామని ఆయన తెలిపారు.

తెలంగాణ సంస్కృతిని, పాత్రలను గౌరవిస్తూనే వినోదాన్ని పండిస్తున్నామని 'క్రేజీ కళ్యాణం' దర్శకుడు ఇచ్చిన వివరణ అందరినీ ఆకట్టుకుంది. ఇక తరుణ్ భాస్కర్ ఇన్నోసెంట్ రోల్, అనుపమ తెలంగాణ యాసతో రాబోతున్న ఈ సినిమా వెండితెరపై ఎంతటి వినోదాన్ని పంచుతుందో చూడాలి.