ఈ జానర్‌కు ఫ్యాన్స్ ఫిదా.. టాలీవుడ్‌లో సూపర్ హిట్ సోషియో-ఫాంటసీ మూవీస్!

తెలుగు సినిమా ఇండస్ట్రీలో సోషియో-ఫాంటసీ, సైన్స్ ఫిక్షన్ కథలకు ఎప్పుడూ ఒక ప్రత్యేకమైన క్రేజ్ ఉంటుంది. మాయలు, మంత్రాలు, దేవుళ్లు, టైమ్ ట్రావెల్ వంటి కాన్సెప్ట్‌లతో వచ్చే సినిమాలను చూడటానికి మన ఆడియన్స్ ఎప్పుడూ ఇష్టపడతారు. అప్పట్లో మెగాస్టార్ చిరంజీవి నటించిన ‘అంజి’ సినిమా నుండి మొన్నటి ‘హను-మాన్’ వరకు, వెండితెరపై విజువల్ వండర్ క్రియేట్ చేసి బాక్సాఫీస్ వద్ద భారీ విజయాలు సాధించిన కొన్ని సూపర్ హిట్ సినిమాల విశేషాలు ఇప్పుడు చూద్దాం.

జగదేకవీరుడు అతిలోకసుందరి - ఎవర్ గ్రీన్ క్లాసిక్:

తెలుగు సినిమా చరిత్రలో సోషియో-ఫాంటసీ అనగానే అందరికీ మొదట గుర్తొచ్చే సినిమా 'జగదేకవీరుడు అతిలోకసుందరి' ఇక మెగాస్టార్ చిరంజీవి, శ్రీదేవి జంటగా దర్శకేంద్రుడు రాఘవేంద్రరావు తెరకెక్కించిన ఈ చిత్రం ఒక అద్భుతం. దేవకన్య భూమి మీదకు రావడం, ఆమె ఉంగరం పోవడం చుట్టూ తిరిగే ఈ కథ అప్పట్లో ఇండస్ట్రీ రికార్డులను తిరగరాసింది.

మగధీర -బాక్సాఫీస్ చరిత్రను మార్చిన ఇండస్ట్రీ హిట్:

దర్శకధీరుడు రాజమౌళి, రామ్ చరణ్ కాంబినేషన్‌లో వచ్చిన 'మగధీర' టాలీవుడ్ రేంజ్‌ను మార్చేసింది. పునర్జన్మలు, కాలభైరవ వీరత్వం, ఘోరా విలనిజం కలగలిపిన ఈ ఫాంటసీ చిత్రం ప్రేక్షకులకు సరికొత్త అనుభూతిని ఇచ్చింది. విజువల్స్, గ్రాఫిక్స్ పరంగా ఈ సినిమా సృష్టించిన వండర్స్ అన్నీ ఇన్నీ కావు.

హను-మాన్- తక్కువ బడ్జెట్.. వందల కోట్ల వసూళ్లు:

ఇటీవలి కాలంలో టాలీవుడ్‌లో వచ్చిన అతిపెద్ద విజువల్ మ్యాజిక్ 'హను-మాన్'. ప్రశాంత్ వర్మ దర్శకత్వంలో తేజ సజ్జా హీరోగా వచ్చిన ఈ చిత్రం, అంజనాద్రి అనే ఊరి నేపథ్యంలో సాగుతుంది. హనుమంతుడి శక్తులు ఒక సామాన్యుడికి వస్తే ఎలా ఉంటుందనే పాయింట్‌తో అద్భుతమైన గ్రాఫిక్స్‌తో తక్కువ బడ్జెట్ లోనే వందల కోట్ల వసూళ్లు సాధించింది.

కార్తికేయ 2 , బింబిసార - కొత్త తరం ట్రెండ్ సెట్టర్స్:

నిఖిల్ నటించిన 'కార్తికేయ 2' పురాణాలు, ద్వారక నగర రహస్యాలు, సైన్స్ మేళవింపుతో దేశవ్యాప్తంగా సూపర్ హిట్ అయింది. అలాగే కళ్యాణ్ రామ్ నటించిన 'బింబిసార' టైమ్ ట్రావెల్, క్రూరమైన రాజు ప్రస్తుత కాలంలోకి రావడం అనే సోషియో-ఫాంటసీ కాన్సెప్ట్‌తో వచ్చి ప్రేక్షకులను బాగా ఆకట్టుకుంది.

విరూపాక్ష , యమ సిరీస్ సినిమాలు -వినోదం, మిస్టరీ:

సాయి ధరమ్ తేజ్ నటించిన 'విరూపాక్ష' అతీంద్రియ శక్తులు, చేతబడుల మిస్టరీ థ్రిల్లర్‌గా వచ్చి బ్లాక్ బస్టర్ హిట్‌గా నిలిచింది. ఇకపోతే మాయాలోకం, యమధర్మరాజు కాన్సెప్ట్‌లతో వచ్చిన 'యమదొంగ', 'యమలీల' వంటి సినిమాలు ప్రేక్షకులను కడుపుబ్బా నవ్వించి, భారీ కలెక్షన్లు సాధించాయి.

కథలో కొత్తదనం ఉంటూ, దానికి కాస్త గ్రాఫిక్స్, ఫాంటసీ ఎలిమెంట్స్ తోడైతే మన తెలుగు ప్రేక్షకులు ఆ సినిమాను ఎక్కడికో తీసుకెళ్తారు. అందుకే దర్శకులు కూడా కొత్త ఐడియాలతో ఈ జానర్ సినిమాలను తీయడానికి ఆసక్తి చూపిస్తున్నారు. రాబోయే రోజుల్లో కూడా ఇలాంటి మరిన్ని అద్భుతమైన కథలు టాలీవుడ్ నుండి వచ్చి ప్రేక్షకులను అలరిస్తాయని ఆశిద్దాం.